چوڌري نثار جون ڳالهيون تڪليف ڏينديون آهن: نواز شريف

لنڊن (ويب ڊيسڪ) اڳوڻي وزيراعظم نواز شريف چيو آهي ته چوڌري نثار جون ڳالهيون تڪليف ڏينديون آهن، جڏهن چوڌري نثار مون بابت ڳالهه ڪندو آهي ته ڏُک ٿيندو آ. لنڊن ۾ صحافين سان ڳالهائيندي نواز شريف چيو ته مان اڄ ڏينهن تائين چوڌري نثار جي ڳالهين جو جواب ناهي ڏنو، سندس ڳالهيون مون کي ڏکارو ڪنديون آهن، نٿو چاهيان ته انهن ڳالهين جو جواب ڏيان. هن چيو ته ڊالر 125 رپين تائين پهچي ويو، ان جي ذميواري ڪنهن تي لاڳو ٿئي ٿي، اسان جي حڪومت وڃڻ کانپوءِ ڊالر 104 رپين کان 125 رپين تائين ڪيئن پهتو. سندس چوڻ هو ته مان گهرواريءَ جي بيماري سبب لنڊن ۾ موجود آهيان، جيڪڏهن گهرواري جي بيماري عام نوعيت جي هجي ها ته ايترا ڏينهن لنڊن ۾ نه رهان ها. هن چيو ته منهنجي گهرواري زندگي ۽ موت جي ٻه واٽي تي بيٺل آهي، سندس صحت ۾ بهتري کانپوءِ ئي ڏيهه ورندس.