ٽراءِ سيريز: پاڪستان آسٽريليا کي 45 رنسن تان بدترين شڪست ڏئي حساب برابر ڪري ڇڏيو

هراري)اسپورٽس نيوز) ٽي ملڪي ٽي ٽوئنٽي سيريز جي پنجين ميچ ۾ پاڪستان آسٽريليا کي 45 رنسن تان شڪست ڏئي ڇڏي.هراري اسپورٽس ڪلب ۾ کيڏي ويل ميچ ۾ قومي ٽيم پهريان بيٽنگ ڪندي مقرر 20 اوورن ۾ 6 وڪيٽن جي نقصان تي 194 رنسون ٺاهيون جنهن جي جواب ۾ آسٽريلوي ٽيم 7 وڪيٽن تي 149 رنسون ٺاهي سگهي.سيريز جي سمورين ميچن ۾ جارحاڻي بيٽنگ ڪندڙ ڪينگروز ڪپتان ايرون فنچ هن ميچ ۾ پنهنجو جادو نه هلائي سگهيو ۽ صرف 16 رنسون ٺاهي آئوٽ ٿي ويو.اليڪس ڪيري 37 رنسن سان ناٽ آئوٽ رهيو جڏهن ته ڊي آر سي شارٽ 28، گلين ميڪسويل 10، ٽريوس هيڊ 7، نڪ ميڊنسن 5 ۽ مارڪس اسٽونس 16 رنسون ٺاهي آئوٽ ٿيا.گرين شرٽس طرفان شاهين آفريدي شاندار بالنگ جو مظاهرو ڪندي 3، محمد عامر، عثمان خان، شاداب خان ۽ فهيم اشرف هڪ، هڪ وڪيٽ حاصل ڪئي.ميچ ۾ زبردست ڪارڪردگي پيش ڪرڻ تي اوپننگ بيٽسمين فخرالزمان کي ميچ جو بهترين رانديگر قرار ڏنو ويو.ان کان اڳ آسٽريلوي ٽيم جي ڪپتان ايرون فنچ ٽاس کٽي پهريان سرفراز اليون کي بيٽنگ جي دعوت ڏني ته فخرالزمان ۽ حارث سهيل اننگز جي شروعات ڪئي ۽ 8 جي مجموعي اسڪور تي قومي ٽيم کي حارث سهيل جي شڪل ۾ خساري کي منهن ڏيڻو پيو جيڪو ڪابه رنس نه ٺاهي سگهيو.حسين طلعت ۽ فخرالزمان ٻئين وڪيٽ تي شاندار راند پيش ڪندي 72 رنسون جوڙيون ۽ ٽيم جو مجموعي اسڪور 80 تائين پهتو ته حسين طلعت ميڪسويل جي بال تي بولڊ ٿي ويو، هو هڪ ڇڪي ۽ 3 چوڪن جي مدد سان 25 بالن تي 30 رنسون ٺاهي سگهيو.ڪپتان سرفراز احمد 14 رنسون ٺاهي آئوٽ ٿيو ۽ آسٽريلوي بالرن جي خلاف مزاحمت ڪندڙ فخرالزمان 73 رنسن جي شاندار اننگز کيڏڻ کانپوءِ اسٽيونس جي بال تي ڪيچ آئوٽ ٿيو، هن پنهنجي اننگز ۾ 44 بالن تي 3 ڇڪا ۽ 9 چوڪا به لڳايا.