آمريڪي صدر ڊونالڊ ٽرمپ ايران تي معاشي پابنديون لڳائڻ جو اعلان ڪري ڇڏيو

0Shares

واشنگٽن(م ڊ) ايراني حڪومت تي فوري طور واڌو معاشي پابنديون لڳائڻ جو اعلان ڪندي آمريڪي صدر ڊونلڊ ٽرمپ چيو ته اهي پابنديون ان وقت تائين برقرار رهنديون، جيستائين ايران پنهنجو رويو تبديل نٿو ڪري. عراق ۾ آمريڪي فوجي اڏن تي ايران جي حملي کانپوءِ قوم کي خطاب ڪندي ڊونلڊ ٽرمپ چيو ته عراق ۾ آمريڪي اڏن تي حملن ۾ ڪو به جاني نقصان ناهي ٿيو ۽ احتياطي تدبيرن سبب ڪنهن به آمريڪي ۽ عراقي کي نقصان ناهي پهتو. هن چيو ته اڳواٽ وارننگ سسٽم بهترين ڪم ڪيو، آمريڪي فوج ڪنهن به قسم جي حالتن جي لاءِ تيار آهي ۽ ايران زوال جي طرف وڃي رهيو آهي، جيڪو سڀني لاڳاپيل ڌرين ۽ دنيا جي لاءِ خوشيءَ جهڙي ڳالهه آهي. هن جو چوڻ هو ته ايران دنيا ۾ دهشتگردي جي معاونت ڪندو رهيو آهي ۽ مهذب دنيا کي ڊيڄاريندو رهيو آهي، قومون ايران جو وچ اوڀر کي غير مستحڪم ڪرڻ وارو رويو گهڻي عرصي کان برداشت ڪري رهيون آهن، جڏهن ته هاڻ ايران کي ائين ڪجهه ڪرڻ نه ڏينداسين. آمريڪي صدر چيو ته منهنجي حڪم تي جنرل قاسم سليماني کي حملي ۾ قتل ڪيو ويو، هو دهشتگردن جي سرپرستي ڪندو رهيو هو ۽ آمريڪين تي حملن ۾ ملوث رهيو، ان کي پهرين ئي مارڻ کپي ها، هن حزب الله سميت ڪيترن ئي عسڪريت پسند گروپن کي تربيت فراهم ڪئي، جڏهن ته قاسم سليماني آمريڪي مفادن تي وڌيڪ حملن جي منصوبابندي ڪري رهيو هو، جڏهن ته اسان ان کي روڪي ورتو. ڊونلڊ ٽرمپ ايراني حڪومت تي فوري طور واڌو معاشي پابنديون لڳائڻ جو اعلان ڪندي چيو ته اهي پابنديون ان وقت تائين برقرار رهنديون جيستائين ايران پنهنجو رويو تبديل نٿو ڪري. هن چيو ته ايران جي هاڻوڪن ڏينهن ۾ عالمي پاڻين ۾ تيل جي جهازن تي حملا ڪيا، سعودي عرب ۾ چڙ ڏياريندڙ حملا ڪيا ۽ 2 آمريڪي ڊرون به تباهه ڪيا، تهران معاهدي کانپوءِ يمن، لبنان، افغانستان ۽ عراق ۾ تباهي ڦهلائي، جڏهن ته هاڻ معاملو برداشت کان ٻاهر ٿي چڪو هو ۽ هاڻ دنيا ايران کي پيغام ڏيندي ته ان جي دهشتگردي  هاڻ قبول نه ڪئي ويندي. هن جو چوڻ هو ته ايران نه صرف علائقي کي عدم استحڪام جو شڪار ڪيو، بلڪه عوام تي به سخت ۽ جارحاڻو تسلط قائم ڪري رکيو آهي، ايران ۾ ويجهڙائي ۾ ٿيندڙ مظاهرن ۾ سوين شهرين کي قتل ڪيو ويو.

0Shares

اپنا تبصرہ بھیجیں