سنڌ اسيمبلي ۾ محتسب اعليٰ جي مقرري جا اختيار گورنر کان وٺي وڏي وزير حوالي ڪرڻ جو بل منظور

ڪراچي (اسٽاف رپورٽر) سنڌ اسيمبلي ۾ محتسبِ اعليٰ جي مقرريءَ جا اختيار گورنر کان وٺي وڏي وزير حوالي ڪرڻ وارو ترميمي بِل منظور ٿي ويو. اجلاس ۾ پ پ ۽ پي ٽي آءِ ميمبرز وچ ۾ منهن ماري به ٿي. اسپيڪر آغا سراج دُراني جي صدارت هيٺ سنڌ اسيمبلي جو اجلاس ٿيو، جنهن ۾ شهيد الله بخش سومرو يونيورسٽي آف آرٽ اينڊ ڊزائين، آثار قديمه ڄامشورو ترميمي بل 2020ع ۽ محتسبِ اعليٰ جي مقرري وارو بل پيش ڪيو ويو. اسيمبلي ۾ محتسبِ اعليٰ جي مقرريءَ جا اختيار وڏي وزير کي ڏيڻ جي حوالي سان ترميمي بِل اتفاق راءِ سان منظور ڪيو ويو. اُن موقعي تي ڳالهائيندي وڏي وزير مراد علي شاهه چيو ته ڪي پي ۽ پنجاب جيان سنڌ ۾ به محتسبِ اعليٰ جا اختيار گورنر کان واپس وٺي وڏي وزير کي ڏيڻ چاهيون ٿا. اجلاس دوران پي ٽي آءِ ايم پي اي حليم عادل شيخ ۽ پ پ ايم پي اي تيمور ٽالپر وچ ۾ منهن ماري به ٿي، صوبائي وزير مُڪيش ڪمار بل پيش ڪيو ته اپوزيشن ميمبرز احتجاج بعد واڪ ائوٽ ڪري ويا، اُن باوجود ايوان مان بل منظور ڪيو ويو. بل جي منظوريءَ کان اڳ پ پ ايم پي اي تيمور ٽالپر ۽ پي ٽي آءِ ايم پي اي حليم عادل شيخ وچ ۾ منهن ماري به ٿي. صوبائي وزير مُڪيش ڪمار چاولا بِل پيش ڪيو ته حليم عادل شيخ سيٽ تان اُٿي اُن جي مخالفت ڪئي، جنهن تي پ پ جي تيمور ٽالپر کيس خاموش رهڻ لاءِ دڙڪا ڏنا. تيمور ٽالپر حليم عادل شيخ ڏانهن وڌڻ جي ڪوشش ڪئي ته پي ٽي آءِ ميمبرز به اڳيا اچي ويا. ٻئي طرف سنڌ جي وڏي وزير سيد مراد علي شاهه اسيمبلي جي فلور تي پاليسي بيان ڏيندي واضح چيو آهي ته سندس حڪومت ڪڏهن به درآمد ٿيندڙ گيس ( ايل اين جي) خريد نه ڪندي پر هن مطالبو ڪيو آهي ته قدرتي طور سنڌ جي عوام جو آئيني حق صوبي مان پيدا ٿيندڙ گيس جو قبول ڪيو وڃي. وفاقي وزير توانائي عمر ايوب خان ۽ وزيراعظم جي پيٽروليم بابت خاص مددگار  نديم بابر جي ميڊيا ٽاڪ بابت  جنهن ۾ انهن دعويٰ ڪئي آهي ته سنڌ حڪومت گيس جي اوسط قيمت (ڊبليو اي سي او جي) تي اتفاق ڪيو آهي، ان تي وڏي وزير چيو ته اهو سراسر بي بنياد آهي. هن چيو ته مون اهو معاملو سي سي آءِ جي اجلاس ۾ اٿاريو هو ۽ شرڪت ڪندڙن کي درخواست ڪئي هئي ته اهي صوبي مان پيدا ٿيندڙ گيس تي سنڌ جي ماڻهن واري آئيني حق کي قبول ڪن. هن وڌيڪ چيو ته وزيراعظم آرٽيڪل 158 تحت درخوات قبول ڪئي آهي. هن چيو ته سي سي آئي جو اجلاس 23 ڊسمبر 2019 تي ٿيو هو ۽ ٻن ڏينهن کانپوءِ 25 ڊسمبر تي هن وزيراعظم کي خط لکي آئين جي آرٽيڪل 158 جي لاڳو واري معاملي بابت آگاهه ڪيو. وزيراعظم پنهنجي جواب ۾ چيو ته هو (وڏو وزير) سي سي آئي اجلاس جي منٽن کي پهرين حاصل ڪندو. وزيراعظم صلاح ڏني ته اجلاس جي منٽن جو انتظار ڪري ۽ انهن کي ڏسي وٺو جيڪڏهن ان کي (وڏي وزير) تي ڪوبه اعتراض آهي ته هو (وزيراعظم) ان مطابق ختم ڪندو. هن وڌيڪ چيو ته سي سي آئي اجلاس جا ڪجهه منٽ  هڪ هفتي اندر ئي جاري ڪيا ويا هئا پر پوءِ به انتظار هلي رهيو آهي. وڏي وزير چيو ته سنڌ صوبي ۾ 25000 کان 26000 ايم ايم سي ايف ڊي گيس جي تياري ٿي رهي آهي پر ان عيوض کيس 800 کان 900 ايم ايم سي ايف ڊي مشڪل سان ملي رهي آهي. مراد علي شاهه ٻڌايو ته لوڪل گيس جو اگهه 820 رپيا/يونٽ آهي جڏهن ته ايل اين جي جو اگهه 1690 رپيا آهي. هن چيو ته هڪ پاسي اها (حڪومت) اسان کي پنهنجي گيس نه پئي ڏي ۽ ٻئي طرف مهانگو گيس خريد ڪرڻ تي مجبور به ڪري رهي آهي. هن چيو ۽ سوال ڪيو ته جيڪڏهن اسان گيس جي قومي پيداوار 70 فيصد پيدا ڪري رهيا آهيون ته اسان درآمدي گيس جو انتخاب ڇو ڪريون؟ ۽ وڌيڪ چيو ته اسان جو موقف بلڪل چٽو آهي ته عوام کي قدرتي گيس تي سندن آئيني حق ملندو آهي. وفاقي وزير ۽ وزيراعظم جي خاص مددگار  جي ميڊيا ٽاڪ جو ذڪر ڪندي وڏي وزير چيو ته انهن دعويٰ ڪئي آهي ته ايل اين جي خريد ڪرڻ تي اتفاق ڪيو آهي جيڪو سراسر بي بنياد بيان آهي. مراد علي شاهه چيو ته هن وزيراعظم کي هڪ ٻيو خط لکيو آهي جنهن ۾ هن اهڙن اهم معاملن تي پنهنجن وزيرن کي بي بنياد بيان ڏيڻ کان روڪڻ جي درخواست ڪئي آهي. وڏي وزير گيس جي معاملي تي وفاقي وزير ۽ خاص مددگار جي ميڊيا بيانن جي مذمت ڪندي چيو آهي ته اسان ڪڏهن به اوسط قيمت تي ايل اين جي قبول نه ڪنداسين پر چاهيون ٿا ته اسان جي قدرتي گيس سنڌ مان پيدا ڪئي وڃي.