ڌانڌلي ذريعي آيل حڪومت کي نٿا مڃون، پنهنجي موقف تي قائم آهيون: فضل الرحمان

اسلام آباد (بيورو) جي يو آءِ (ف) جي سربراهه مولانا فضل الرحمان چيو آهي ته اسان خطرناڪ ماڻهو ناهيون پر خطرو روڪڻ وارا آهيون، اسان کي نه چيڙايو نه ته توهان کي شڪست ڏئي ڇڏينداسين. آزادي مارچ کي خطاب ڪندي مولانا فضل الرحمان/ چيو ته اڄ ڊي چوڪ وڃڻ تي اعتراض ڪيو پيو وڃي، 2014 ۾ ڊي چوڪ تي 126  ڏينهن ڌرڻي تي اعتراض ڇو نه ڪيو ويو؟ 126 ڏينهن ڌرڻي جي تصوير دنيا لاءِ دلڪش هئي پر ان جي بدبوءِ اڄ به محسوس ڪئي پئي وڃي، اسان جي آزادي مارچ عوام جي مايوسي کي اميد ۾ تبديل ڪري ڇڏيو آهي، هن مارچ سان اسرائيل ۽ ان جا ساٿي پريشان آهن. هن چيو ته اسان ڌانڌلي سٽيل چونڊن کي نٿا مڃون، ٻين کي چور چوڻ آسان هوندو آهي پر حقيقون نه ٿيون لڪائي سگهجن، اسان لاڪ ڊائون ناهي ڪيو، حڪومت ڪنٽينر رکي پاڻ لاڪ ڊائون ڪري ڇڏيو، حڪومت جي ناڪام پاليسين سبب اڄ لکين ماڻهو بي روزگار ٿي ويا آهن، بجلي جي اگهه ۾ وري ٻه رپيا واڌ ڪئي وئي آهي، گئس ۽ پيٽرول جون قيمتون به آسمان تي پهتل آهن، روزاني بنياد تي قرض وڌي رهيا آهن. سندس چوڻ هو ته موجوده حڪومت ڪشمير کپائي ڇڏيو ۽ ڳوڙها ڳاڙي رهي آهي، ملڪ اندر پنهنجا دشمن بڻجڻ سان ڪشمير ڪاز پوئتي هليو ويو، جيستائين ڪشمير ڪميٽي مون وٽ هئي، ڪو ماءُ جو پٽ ڪجهه نه بگاڙي سگهيو، اڄ پاڪستان ۾ اسرائيل کي تسليم ڪرڻ جون ڳالهيون ٿي رهيون آهن، ڪيستائين حقيقتن کي لڪايو ويندو؟ فضل الرحمان چيو ته جنهن کي توهان احتساب چئي رهيا آهيو، ان کان هر شخص خوف محسوس ڪري رهيو آهي، نيب جي احتساب سبب ڪو بيورو ڪريٽ فائلن تي صحيح ڪرڻ لاءِ تيار ناهي، هاڻ انتقام جي نالي تي احتساب جو ڊرامو وڌيڪ نه هلندو. جي يو آءِ (ف) سربراهه چيو ته اسان کي نه چيڙايو، جيڪڏهن اسان کي چيڙايو ويو ته 24 ڪلاڪن ۾ توهان کي شڪست ٿيندي، اسان جو موقف صاف آهي ته ڌانڌلي ذريعي آيل حڪومت کي نٿا مڃون، ڪنهن ڪميشن کي تسليم نٿا ڪيون ۽ ڪميشن ٺاهڻ جي هر تجويز رد ڪيون ٿا، ٻيهر چونڊن جي مطالبي تي قائم آهيون، ان ۾ ڪا تبديلي نٿي اچي سگهي، توهان جيتري جلدي فيصلو ڪيو، ايتري جلدي معاملا ٺيڪ ٿي ويندا.