مودي خطي جو هٽلر بڻجڻ چاهي ٿو، پاڪستان جي سلامتي لاءِ آخري حد تائين وڃي سگهون ٿا: وزيراعظم

اسلام آباد(بيورو) وزيراعظم عمران خان جو چوڻ آهي ته اسان جنگ نه ٿا چاهيون جڏهن ته ڀارت جنگ مڙهي ته منهن ٽوڙ جواب ڏينداسين. وزيراعظم عمران خان سنيئير صحافين سان ڳالهائيندي چيو ته اها عام رواجي جنگ آهي، اسان کي اها جنگ کٽڻي آهي، ڀارت ڪشمير تان توجهه هٽائڻ لاءِ ڪجهه به ڪري سگهي ٿو. عمران خان چيو ته هٿين خالي ڪشميرين تي وڌندڙ ڀارتي ظلمن سان عالمي قومن کي آگاهه ڪنداسين، ڀارت والاريل وادي ۾ هٿين خالي ڪشميرين  تي ظلم ڪري  رهيو آهي. هن چيو ته اسان دنيا کي ٻڌائينداسين ته مودي سرڪار ڪشميرين جي نسل ڪشي ڪري رهي آهي، ڀارت والاريل ڪشمير جا جاگرافيا تبديل ڪرڻ چاهي ٿو، مودي سرڪار هٽلر جهڙي سوچ رکي ٿي. وزيراعظم عمران خان چيو ته ڪشميرين جي سفارتي، سياسي ۽ اخلاقي حمايت جاري رکنداسين، اسان جنگ نه ٿا چاهيون، ڀارت جنگ مڙهي ته منهن  ٽوڙ جواب ڏينداسين، اها عام راءِ جي جنگ آهي، اسان کي اها جنگ کٽڻي آهي. عمران خان خدشو ظاهر ڪيو ته ڀارت ڪشمير تان توجهه هٽائڻ لاءِ ڪجهه به ڪري سگهي ٿو، مون نريندر مودي سان هميشه امن جي ڳالهه ڪئي. ان کان علاوه وزيراعظم عمران خان سماجي رابطن واري ويب سائٽ تي جاري پيغام ۾ چيو ته پوري دنيا منتظر آهي ته ڪرفيو هٽي ته ڏسون ته والاريل ڪشمير ۾ ڪشميرين سان ڇا ٿي رهيو آهي. عمران خان چيو آهي ته بندوق جي استعمال سان ڪشميرين جي آزادي واري تحريڪ زور وٺندي، اسان ڪشميرين جي سياسي، اخلاقي ۽ سفارتي حمايت جاري رکنداسين، مودي خطي جو هٽلر بڻجڻ چاهي ٿو، ڀارتي ظلمن خلاف سڄي دنيا کي آگاهي ڏينداسين، پاڪستان جي سلامتي لاءِ آخري حد تائين وينداسين. هوڏانهن پاڪستان ڪشمير ۾ ڀارتي قدمن خلاف سلامتي ڪائونسل ۾ وڃڻ جو اعلان ڪري ڇڏيو. اسلام آباد ۾ پريس ڪانفرنس ڪندي پرڏيهي وزير شاهه محمود قريشي چيو ته حڪومت والاريل ڪشمير ۾ ڀارتي قدمن خلاف سلامتي ڪائونسل ۾ وڃڻ جو فيصلو ڪيو آهي، 28 ملڪن کي قومي سلامتي ڪميٽي جي فيصلن ۽ ڪشمير جي حوالي سان پنهنجي ڳڻتي کان آگاهه ڪري ڇڏيو آهي. يورپي يونين کي باور ڪرايو آهي ته ڀارت ڳالهين کان لنوائيندو آهي ۽ جيڪڏهن يورپي يونين ڪشمير معاملي ۾ ٽياڪڙي جو ڪردار ادا ڪري سگهي ٿي ته پاڪستان تيار آهي، دُنيا ڏٺو آهي ته ڀارت امريڪي صدر ٽرمپ جي ٽياڪڙي وار آڇ کي به رد ڪري ڇڏيو آهي. پرڏيهي وزير خدشو ظاهر ڪيو آهي ته ڀارت ڪشمير مسئلي تان دُنيا جو ڌيان هٽائڻ لاءِ پلواما 2 جهڙو ڊرامو ڪري سگهي ٿو، ڀارتي سرڪار طرفان ڪشمير کي اندروني معاملو قرار ڏيڻ غلط آهي، اسان اُن کي رد ڪريون ٿا. شاهه محمود قريشي چيو ته پاڪستان طرفان فضائي حدود محدود ڪرڻ واريون خبرون غلط آهن، فيصلو ڪيو آهي ته سمجهوتا ايڪسپريس نه هلائي ويندي، باقي افغانستان سان واپار متاثر نه ٿيندو، اُن حوالي سان انڊراسٽينڊنگ (سمجهوتو) برقرار آهي. جڏهن ته ڪرتاپور راهداري جي حوالي سان واعدي تي قائم آهيون. هڪ سوال جي جواب ۾ پرڏيهي وزير چيو ته پاڪستان ڀارت جي ڪنهن به اڳرائي خلاف سيف گارڊ وٺندو، سياسي ۽ سفارتي آپشنز کي به ڏسي رهيا آهيون، ڀارت ڪيستائين هڪ ڪروڙ 40 لک ڪشميرين کي قيد ۾ رکندو، ڪشمير معاملي تي نهرو جا 14 واعدا موجود آهن.  پرڏيهي وزير شاهه محمود قريشي جو چوڻ هو ته ڀارت جو والاريل ڪشمير کي اندروني معاملو چوڻ قانوني طور تي غلط آهي ۽ اسان ان کي رد ڪريون ٿا، اهو تاثر درست ناهي ته آرٽيڪل 370 ڀارت جو اندروني معاملو آهي، نهرو ڪيترائي ڀيرا واعدو ڪيو ته ڪشمير جو فيصلو اتان جي عوام جي خواهش موجب ٿيندو.