حڪومت پاران سزا ماڻيندڙن جا انٽرويو روڪرائڻ جو فيصلو، اڳوڻن حڪمرانن سرڪاري خرچ تي دورا ڪيا، حساب وٺنداسين: وزيراعظم

اسلام آباد (بيورو) وزيراعظم عمران خان عدالتن مان سزا ماڻيندڙ ماڻهن جي ٽي وي انٽرويوز تي ڳڻتي جو اظهار ڪندي چيو آهي ته ڪنهن به سزا يافتا شخص جي انٽرويو جي اجازت نه هجڻ گهرجي. وزيراعظم جي صدارت هيٺ وفاقي ڪابينا جو اجلاس ٿيو، جنهن ۾ 12 نڪاتي ايجنڊا تي غور ڪيو ويو. اجلاس دوران اڳوڻي وزيراعظم نواز شريف ۽ اڳوڻي صدر آصف زرداري جي دور ۾ خرچن تي تفصيلي بريفنگڏني وئي، جنهن ۾ عمران خان کي ٻڌايو ويو ته نواز شريف جي دور ۾ پرڏيهي دورن تي 1421.5 ملين، جڏهن ته آصف زرداري جي دور ۾ 183.5 ملين رپيا خرچ ٿيا. ذريعن جو چوڻ آهي ته وفاقي ڪابينا سزا يافتا ماڻهن جي ٽي وي انٽرويوز تي ڳڻتي جو اظهار ڪندي اهڙا انٽرويو نشر ڪرڻ خلاف پيمرا سان رابطي جو فيصلو ڪيو آهي. وزيراعظم عمران خان چيو ته ڪنهن به سزا يافتا شخص جي انٽرويو جي اجازت نه هجڻ گهرجي، اڳوڻا حڪمران قومي ناڻي تي دورا ڪندا رهيا، ملڪ ۽ قوم کي انهن پرڏيهي دورن سان ڇا حاصل ٿيو؟ اڳوڻن دورن ۾ اڏايل دولت جي هڪ هڪ پئسي جو حساب ورتو ويندو. خواجا آصف جي بطور بچاءُ واري وزير دبئي ۾ ملازمت ۽ اقامو جي معاملي جو نوٽيس ورتو ويو. رپورٽ موجب وفاقي ڪابينا خواجا آصف جي اقامو رکڻ جي تحقيقات جو فيصلو ڪندي سوال اٿاريو ويو ته بچاءُ وارو وزير غير ملڪي ڪمپني ۾ 10 لکن کي ملازمت ڇو ڪندو رهيو؟ تعليم واري وفاقي وزير شفقت محمود چيو  ته اڳوڻي وزيراعظم نواز شريف پنهنجي چئن سالن جي دور ۾ هڪ ارب 84 ڪروڙ رپيا ٻاهرين ملڪ دورن تي خرچ ڪيا. جڏهن ته آصف زرداري بطور صدر هڪ ارب 42 ڪروڙ رپين جا 134 دورا ڪيا. ڪابينا جي اجلاس کانپوءِ پريس ڪانفرنس ڪندي تعليم واري وفاقي وزير شفقت محمود جو چوڻ هو ته اجلاس ۾ گذريل ٻن دورن جي 10 سالن ۾ ملڪي قرضو 6 هزار ارب کان وڌي 30 هزار ارب تائين پهچڻ جا معاملا بحث هيٺ آيا. جڏهن ته ملڪي قرض وڌي رهيا هئا ته حڪمرانن جي شاهه خرچين جو ٻڌي ڪري وار اُڀا ٿي وڃن ٿا. تعليم واري وفاقي وزير موجب آصف زرداري پنهنجي ٻاهرين ملڪن جي 134 دورن دوران هڪ ارب 42 ڪروڙ خرچ ڪيا. جڏهن ته هو مجموعي طور تي 257 ڏينهن ملڪ کان ٻاهر رهيو. جڏهن ته نواز شريف بطور وزيراعظم چئن سالن ۾ هڪ ارب 84 ڪروڙ رپيا ٻاهرين ملڪن جي دورن تي خرچ ڪيا. هو مجموعي طور تي 262 ڏينهن ملڪ کان ٻاهر  رهيو. شفقت محمود پريس بريفنگ دوران وڌيڪ چيو ته مسلم ليگ (ن) جي حڪومتي دور ۾ خواجا آصف وزير به هو ته ٻاهرين ملڪ جي ڪمپني جو ايڊوائيزر به هو. جاچ جي ضرورت آهي ته هو غير ملڪي ڪمپني جو ايڊوائيزر ڇو هو.03