مريم نواز لاءِ وري ڏچو! احتساب عدالت نيب جي درخواست تي 19 جولاءِ تي طلب ڪري ورتو

اسلام  آباد/لاهور (بيورو) احتساب عدالت ايون فيلڊ ريفرنس ۾ جعلي ٽرسٽ ڊيڊ پيش ڪرڻ تي مسلم ليگ(ن) جي نائب صدر مريم نواز کي نوٽيس جاري ڪندي طلب ڪري ورتو آهي.نيب طرفان احتساب عدالت ۾ درخواست جمع ڪرائي وئي آهي مريم نواز ڪيليبري فونٽ واري جعلي ٽرسٽ ڊيڊ پيش ڪئي، جعلي دستاويز پيش ڪري انصاف جي فراهمي ۾ رنڊڪ وجهڻ جي ڪوشش ڪئي وئي جعلي دستاويز ڏيڻ تي جوابدار يا گواهه کي 10 قيد جي سزا ٿي سگهي ٿي، عدالت سيڪشن 30 تحت سزا ٻڌائي.  جنهن ۾ موقف اختيار ڪيو ويو آهي ته مريم نواز شريف طرفان ايون فيلڊ ۾ پيش ڪيل ٽرسٽ ڊيڊ جعلي ثابت ٿي آهي تنهن ڪري هن خلاف الڳ ڪارروائي ڪئي وڃي. اسلام آباد جي احتساب عدالت مريم نواز خلاف نيب جي درخواست ٻڌڻي لاءِ منظور ڪندي مريم نواز کي 19 جولاءِ تي طلب ڪري ورتو آهي.  احتساب عدالت جي جج محمد بشير مريم نواز کي نوٽيس جاري ڪيو آهي. ياد رهي ته گذريل سال اسلام آباد هاءِ ڪورٽ ايون فيلڊ ريفرنس ۾ احتساب عدالت جي طرفان اڳوڻي وزيراعظم نوازشريف، سندس نياڻي مريم نواز ۽ ناٺي ڪيپٽن(ر) صفدر کي ٻڌايل سزا معطل ڪندي ٽنهي ڄڻن کي آزاد ڪرڻ جو حڪم ڏنو هو جنهن کان پوءِ کين اڊيالا جيل مان آزاد ڪيو ويو هو. ٻئي طرف مسلم ليگ (ن) جي مرڪزي اڳواڻ ۽ نائب صدر مريم نواز احتساب عدالت ۾ طلبي جي معاملي تي عوام کان مشورو وٺي ڇڏيو. پنهنجي هڪ ٽوئيٽ ۾ مريم نواز چيو آهي ته منهنجي پريس ڪانفرنس ۾ سڀئي سازشون بي نقاب ٿيڻ کانپوءِ گهبراٽ ۾ حڪومت منهنجي خلاف هڪ ٻيو ڪيس ڪري ڇڏيو آهي. آئون عوام کان پڇان ٿي ته منهنجي سوالن جا جواب ملڻ بجاءِ مون کي نيب ۾ پيش ٿيڻ گهرجي؟ جيڪو آڊيو ۽ وڊيو جي ذريعي يرغمال هجي. مريم نواز عوام کي مخاطب ٿيندي چيو ته آئون توهان کان مشورو گهران ٿي ته مون کي هڪ ثابت شده انتقام جي سامهون پيش ٿيڻ جو بائيڪاٽ ڪرڻ گهرجي يا پيش ٿي نيب عدالت ۾ بيهي کير جو کير ۽ پاڻي جو پاڻي ڪرڻ گهرجي. هن چيو ته “گهرائڻو آهي ته پنهنجي رسڪ تي گهرائجو، منهنجون ڳالهيون ٻڌي نه سگهندئو نه سهي سگهندو، اهو نه ٿئي ته مٿو پٽيندا رهجي وڃو!”.03