اپوزيشن جي رهبر ڪميٽي سينيٽ چيئرمين کي هٽائڻ جي منظوري ڏئي ڇڏي، 25 جولاءِ تي جلسا ڪرڻ جو فيصلو

اسلام آباد (بيورو) اپوزيشن جي رهبر ڪميٽي 9 جولاءِ تي سينيٽ چيئرمين خلاف قرارداد آڻڻ ۽ 11 جولاءِ تي نئين چيئرمين جي گڏيل اميدوار جي نالي جي اعلان جو فيصلو ڪري ورتو. رپورٽ موجب حڪومت مخالف احتجاجي تحريڪ هلائڻ جي حوالي سان اپوزيشن جي 9 سياسي پارٽين جي 11 ميمبرن تي ٻڌل رهبر ڪميٽي جو پهريون اجلاس ٿيو، رهبر ڪميٽي جي سمورن ميمبرن اجلاس ۾ شرڪت ڪئي.اجلاس ۾ ن ليگ مان شاهد خاقان عباسي، احسن اقبال، پيپلز پارٽي مان فرحت الله بابر، نيئر بخاري، جي يو آءِ ف مان اڪرم خان دراني، نيشنل پارٽي مان مير حاصل بزنجو، اي اين پي مان ميان افتخار، پشتونخواهه ملي عوامي پارٽي مان عثمان ڪاڪڙ، قومي وطن پارٽي مان هاشم بابر، جميعت علماءِ پاڪستان مان اويس نوراني ۽ مرڪزي جميعت اهلحديث مان شفيق پسروري شرڪت ڪئي.رهبر ڪميٽي اجلاس کانپوءِ اپوزيشن اڳواڻن ميڊيا سان ڳالهايو، جي يو آءِ ف جي اڳواڻ اڪرم خان دراني چيو ته رهبر ڪميٽي هر ٻن مهينن لاءِ ڪنوينئر مقرر ڪرڻ جو فيصلو ڪيو آهي ۽ پهرين ٻن مهينن لاءِ مون کي ڪنوينئر مقرر ڪيو ويو آهي جڏهن ته رهبر ڪميٽي جو ايندڙ اجلاس 11 جولاءِ تي ٿيندو ۽ 25 جولاءِ تي ڪارو ڏينهن ملهايو ويندو.اڪرم دراني چيو ته 9 جولاءِ تي سينيٽ چيئرمين خلاف قرارداد جمع ڪرائي ويندي، 11 جولاءِ تي سينيٽ چيئرمين لاءِ گڏيل اميدوار جو نالو اعلان ڪيو ويندو، 25 جولاءِ تي صوبائي سطح تي جلسا ڪيا ويندا.اڪرام دراني جو چوڻ هو ته ملڪ ۾ هڪ نئون سياسي ڍانچو جوڙڻ تي ڪميٽي ڳڻتي جو اظهار ڪيو، جمهوري ماڻهن کي سياست کان پري رکڻ جي مذمت ڪريون ٿا، اڳوڻي فاٽا ۾ پولنگ اسٽيشن جي اندر فوجي بيهارڻ جي فيصلي کي رد ڪريون ٿا، قبائلي علائقن ۾ فوج جي مقرري جو نوٽيفڪيشن رد ڪيو ويو، اڳوڻي فاٽا جي ٻن ميمبرن جا پروڊڪشن آرڊر جاري ڪيا وڃن جڏهن ته سمورن سياسي پارٽي گهوٽڪي جي ضمني چونڊن ۾ پيپلز پارٽي جي حمايت جو اعلان ڪن ٿيون.03