بينظير ڀٽو ڪونڊوليزا رائيس جي پيرين پئي چيو ته مون کي ٻيهر وزيراعظم بڻايو: مراد سعيد

0Shares

اسلام آباد(بيورو) مواصلات بابت وفاقي وزير مراد سعيد چيو آهي ته ملڪ ۾ جيڪڏهن ڪو سرٽيفائيڊ نااهل آهي ته اهو نواز شريف آهي، جنهن ريڊيو، ايئرپورٽ سميت سڄو پاڪستان گروي رکي ڇڏيو. قومي اسيمبلي ۾ تقرير ڪندي مراد سعيد چيو ته سنڌ ۾ سڀ کان وڌيڪ عوام غربت جي ليڪي کان هيٺ زندگي گذاريندو آهي، ٿر سميت 50 سيڪڙو ٻار سنڌ ۾ غذائي کوٽ جو شڪار آهن، سنڌ ۾ ٻار خوراڪ جي کوٽ سبب مري رهيا آهن، ڇا اهي ڪنهن جا ٻار ناهن؟ ٿر ۾ 104 ارب پاڻي تي خرچ ڪرڻ جي دعويٰ ڪئي وئي پر ملڪ جو پئسو فالودي واري جي اڪائونٽ ۾ وڃي رهيو هو، پ پ عوام کان اٽو، لٽو ۽ اجهو کسيو، سپريم ڪورٽ به سنڌ کي ڪرپٽ ترين صوبو قرار ڏنو. هن چيو ته اڳوڻي حڪومت ريڊيو ۽ ايئرپورٽ سميت سڄو پاڪستان گروي رکي ڇڏيو، ان لاءِ اسان کي قرض وٺڻو پيو ۽ نواز شريف جو هڪ دورو عمران خان جي 6 دوران کان مهانگو هو، نواز شريف پنهنجي دور ۾ 110 ڪروڙن کان وڌيڪ جا ٻاهريان دورا ڪيا هئا ۽ رڳو پنهنجو ڪاروبار وڌائڻ جي ڳالهه ڪندو رهيو، جڏهن عمران خان آيو ته هن ٻاهرين دورن ۾ رڳو هڪ ڳالهه ڪئي ته مون کي پورهيت جو خيال رکڻو آهي، اهو منهنجي دل جي گهڻو ويجهو آهي. سندس چوڻ هو ته عمران خان قطر ويو، اتي هن پاڪستان ۾ سيڙپڪاري جي ڳالهه ڪئي، ملائيشيا جهاز موڪلي 300 پاڪستانين کي واپس گهرايو ۽ او آءِ سي ۾ وزيراعظم کي سٺي موٽ ملي، ملڪ ۾ جيڪڏهن ڪو سرٽيفائيڊ نااهل آهي ته اهو نواز شريف آهي، نواز شريف جا ٻار به جهاز استعمال ڪندا هئا، رائيونڊ گهر جي سيڪيورٽي لاءِ 100 ڪروڙن کان وڌيڪ خرچ ڪيو ويو. مراد سعيد چيو ته مريم نواز پنهنجي پيءُ نواز شريف جون سڀ بيماريون ٻڌايون ۽ چيو ته انهن جو علاج ٻاهر آهي، اهي هڪ اهڙي اسپتال به نه ٺاهي سگهيا، جتي سندن علاج ٿئي. وفاقي وزير مراد سعيد ايوان ۾ ڪونڊوليزا رائيس ۽ آمريڪا جي اڳوڻي صدر بارڪ اوباما جا ڪتاب به ڏيکاريا. هن چيو ته بينظير ڀٽو ڪونڊوليزا رائيس جي پيرين پئي چيو ته مون کي ٻيهر وزيراعظم بڻايو، آمريڪا اختيارين کي ان چيو ته آصف زرداري تي ڪرپشن جا ڪيس ختم ڪرائي آزاد ڪرايو وڃي، اهي اين آر او لاءِ آمريڪا جي پيرن تي ڪريا. سندس چوڻ هو ته بار بار سليڪٽڊ چوڻ وارا انهن طريقن سان اقتدار ۾ آيا، بلاول کي فورسز تي حملو ڪرڻ وارن جي پروڊڪشن آرڊر جو فڪر آهي، ذوالفقار علي ڀٽو ايوب خان جي تعريف ڪئي هئي، ن ليگ ۽ پ پ وارا مني لانڊرنگ ۽ بدعنواني جو حساب ڏين، آصف زرداري حسين حقاني سان گڏ سي آءِ اي ڊائريڪٽر سان ملاقات ڪئي، آصف زرداري سي آءِ اي ڊائريڪٽر کي چيو ته اتر وزيرستان ۾ ڊرون حملن جو ڪو به فڪر ناهي، نواز شريف پنهنجي علاج لاءِ سرڪاري خزاني مان خرچ ڪيو. وفاقي وزير چيو ته اهي پروڊڪشن آرڊر تي ايوان ۾ اچن ٿا ۽ غريب جيلن ۾ سڙي رهيا آهن، سنڌ ۾ 50 سيڪڙو ٻارڙا غذائي کوٽ جو شڪار آهن، سنڌ جي حڪمرانن پئسو جعلي اڪائونٽن ۾ وجهي ڇڏيو، سنڌ جا 52 سيڪڙو ٻارڙا اسڪولن کان ٻاهر آهن، ٿر ۾ پيئڻ جو پاڻي ناهي.

0Shares

اپنا تبصرہ بھیجیں