سليڪٽيڊ لفظ تي پابندي وزيراعظم جي انا آهي: بلاول ڀٽو

اسلام آباد(بيورو) پاڪستان پيپلز پارٽي جي چيئرمين بلاول ڀٽو زرداري چيو آهي ته وزيراعظم جي انا سبب قومي اسيمبلي ۾ لفظ سليڪٽيڊ تي پابندي لاڳو ڪئي وئي. قومي اسيمبلي ۾ خيالن جو اظهار ڪندي بلاول ڀٽو زرداري چيو ته وزيرن جي غير سنجيدا رويي تي قوم کان معافي گهران ٿو، بلاول پشتون تحفظ موومينٽ جي قومي اسيمبلي ميمبر محسن داور ۽ علي وزير جا پروڊڪشن آرڊر جاري ڪرڻ جو مطالبو ورجايو. بلاول ڀٽو زرداري چيو ته وزيراعظم عمران خان جي قدمن سبب ملڪ سڙي رهيو آهي، سندس هر فيصلو غلط ثابت ٿئي ٿو، سياست، معيشت ۽ حڪومت سميت وزيراعظم جنهن کي هٿ لڳائي ٿو اهو خراب ٿي وڃي ٿو، سندس هر فيصلو ايئن آهي جيئن باهه تي تيل هاري رهيو آهي، حڪومت ٻٽي پاليسي بند ڪري پنهنجي بجيٽ واپس وٺي، حڪومت آءِ ايم ايف آڏو گوڏا کوڙي ڇڏيا آهن. بلاول ڀٽو زرداري قومي اسيمبلي ۾ لفظ سليڪٽيڊ تي پابندي تي تنقيد ڪندي چيو ته هڪ سال اڳ منهنجي تقرير ۾ جنهن لفظ تي وزيراعظم ڊيسڪ وڄائي اڄ اهو ئي لفظ منع قرار ڏنو ويو آهي، ملڪ ۾ عوام، صحافت ۽ سياست ڪجهه به آزاد ناهي، سليڪٽيڊ ڪو غير پارلياماني لفظ ناهي پر وزيراعظم جي انا جي ڪري اها پابندي لڳائي وئي ۽ تاريخي سينسرشپ ڪئي پئي وڃي، اها ڪهڙي آزادي آهي جو اسيمبلي ميمبر جا لفظ حذف ڪيا وڃن ٿا، نئون پاڪستان سينسرڊ پاڪستان آهي جيڪو نامنظور آهي، حڪومت باهه تي وڌيڪ تيل هاري رهي آهي، اپوزيشن جي آواز کي دٻائڻ سان ڪاوڙ ٻئي ڪٿي نڪرندي. بلاول ڀٽو چيو ته وزيراعظم نيرو جي بانسري وڄائي رهيو آهي، غريبن جو معاشي قتل ڪيو پيو وڃي، نيب گردي ۽ معيشت گڏ نٿا هلي سگهن، جيڪي ادارا پارليامينٽ جي ماتحت آهن ناهي احتساب ڪيئن ٿا ڪري سگهن حڪومت ن ليگ جو رڪارڊ ڪوڙي ڇڏيو روزانو 15 ارب قرض کڻي رهي آهي.03