پاڪستان ۽ قطر ۾ مني لانڊرنگ، دهشتگردن جي مالي مدد روڪڻ ۽ ڳجهي ڄاڻ جي مٽاسٽا وارن يادداشت نامن تي صحيحون

0Shares

اسلام آباد(بيورو) پاڪستان ۽ قطر ۾ مني لانڊرنگ، دهشتگردن جي مالي مدد روڪڻ ۽ ڳجهي ڄاڻ جي مٽاسٽا وارن يادداشت نامن تي صحيحون. تفصيل موجب قطر جو امير شيخ تميم بن حمد الثاني پنهنجي ٻن ڏينهن جي دوري تي اسلام آباد پهتو ته وزيراعظم عمران خان ايئرپورٽ تي آجيان ڪئي، قطر جي امير کي پاڪستان پهچڻ تي 21 توپن جي سلامي ڏني وئي، جنهن کانپوءِ مهمان وزيراعظم هائوس پهتو، وزيراعظم عمران خان سندس گاڏي پاڻ هلائي.  قطر جي امير شيخ تميم بن حمد الثاني جي وزيراعظم هائوس آمد تي کيس گارڊ آف آنر پيش ڪيو ويو، جي ايف 17 ٿنڊر جهازن معزز مهمان کي سلامي ڏني. قطر جي امير وزيراعظم هائوس ۾ ٻوٽو لڳايو، وزيراعظم معزز مهمان جو وزيرن سان تعارف ڪرايو، جڏهن ته قطر جي امير پنهنجي وفد جي ميمبرن جو وزيراعظم سان تعارف ڪرايو. وزيراعظم عمران خان ۽ قطر جي امير شيخ تميم بن حمد الثاني وچ ۾ نويڪلائي ملاقات ٿي، جڏهن ته وفدن جي سطح تي ڳالهيون پڻ ٿيون. پاڪستان پاران قيادت وزيراعظم عمران خان ۽ قطري وفد جي قيادت تميم بن حمد الثاني ڪئي. وزيراعظم هائوس ۾ تقريب دوران پاڪستان ۽ قطر وچ ۾ واپار، سيڙپڪاري سميت مختلف يادداشت نامن تي صحيحون ڪيون ويون. مني لانڊرنگ ۽ دهشتگردن جي مالي معاونت روڪڻ، ڳجهي ڄاڻ جي مٽاسٽا، ٻنهي ملڪن وچ ۾ سياحت ۽ واپار جي ترقي لاءِ سهڪار جي مفاهمتي يادداشت نامن سميت واپار ۽ سيڙپڪاري ۾ سهڪار لاءِ ورڪنگ گروپ جي يادداشت نامن تي صحيحون ڪيون ويون. تقريب دوران قطر جو امير ۽ وزيراعظم پڻ موجود رهيا. ٻئي طرف ذريعن جو چوڻ آهي ته قطر جو امير اڄ ايوان صدر ۾ صدر عارف علوي سان ملاقات ڪندو، قطر جو امير ايوان صدر ۾ سيڙپڪاري تقريب ۾ شريڪ ٿيندو، سندس مان ۾ ايوان صدر ۾ آجياڻو ٿيندو، جنهن ۾ وزيراعظم سوڌو اعليٰ سياسي ۽ عسڪري قيادت شرڪت ڪندي. ذريعن موجب پاڪستان ۽ قطر وچ ۾ 6 کان 8 ارب ڊالر جا معاهدا غور هيٺ ايندا، توانائي ۽ پٽرو ڪيميڪل جي شعبن ۾ سهڪار تي ڳالهه ٻولهه ٿيندي، سياحت، زراعت، انجنيئرنگ جي شعبن ۾ سيڙپڪاري تي بريفنگ ڏني ويندي. قطر جي سيڙپڪارن کي فوڊ پراسيسنگ، پيڪجنگ ۽ انفرا اسٽرڪچي جي شعبن تي پڻ بريفنگ ڏني ويندي، ان سان گڏوگڏ سي پيڪ سان سلهاڙيل روڊن ۾ خانگي شعبي جي حصيداري تي ڳالهه ٻولهه ڪئي ويندي، جڏهن ته پاڪستان جي ٽن وڏن هوائي اڏن تي سيڙپڪاري بابت خيالن جي ڏي وٺ ڪئي ويندي.

0Shares

اپنا تبصرہ بھیجیں