سامونڊي طوفان ۾ شدت، ڪيٽيگري ون ۾ تبديل، مهاڻن جي سمنڊ ۾ وڃڻ تي پابندي

0Shares

ڪراچي/ٺٽو/سجاول(اسٽاف رپورٽر+نمائندن وٽان)  ڪراچي کان ڏکڻ طرفان سامو نڊي طوفان ”وايو“ شدت اختيار ڪري ويو. ان ڏس ۾  موسميات کاتي چيو آهي ته سامونڊي طوفان جي ڪري خميس ۽ جمعي ڏينهن سنڌ جي سامونڊي پٽيءَ تي طوفاني هوائن سان برساتون پئجيسگهن ٿيون، سنڌ جي مهاڻن کي اونهي سمنڊ ۾ نه وڃڻ ۽ اختيارين کي اڳواٽ اپاءَ وٺڻ جي هدايت ڪئي وئي آهي. موسميات کاتي طرفان جاري ڪيل سائيڪلون الرٽ موجب هوا جي گهٽ دٻاءُ سبب عربي سمنڊ ۾ پيدا ٿيل طوفان ”وايو“ ڪيٽيگري ون ۾ تبديل ٿي ويو آهي سامونڊي طوفان ڪراچي کان ڏکڻ طرف 725 ڪلوميٽر جي فاصلي تي عربي سمنڊ ۾ موجود آهي ۽ تيزيءَ سان اُتر طرف وڌي رهيو آهي. موسميات کاتي جو چوڻ آهي ته سامونڊي طوفان “وايُو” سڀاڻي ڀارتي گُجرات جي سامونڊي پٽي سان ٽڪرائجي ويندو. ايندڙ 24 ڪلاڪن تائين سامونڊي طوفان جي شدت برقرار رهڻ جو امڪان آهي، جڏهن ته طوفان جي ڪري خميس ۽ جمعي ڏينهن سنڌ جي سامونڊي علائقن بدين، ٺٽي ۽ ٿرپارڪر ضلعن ۾ طوفاني هوائن سان برسات پوڻ جو امڪان آهي. موسميات کاتي جي اختيارين الرٽ ۾ ٻڌايو ته ڪراچي ۾ ايندڙ ٽن ڏينهن تائين هيٽ ويوَ جهڙي صورتحال برقرار رهي سگهي ٿي، ڏينهن جي وقت سامونڊي هوائون بند رهنديون ۽ هوا ۾ گهِم جو تناسب وڌيڪ هجڻ ڪري گرمي جي شدت محسوس ڪئي ويندي. موسميات کاتي موجب سمنڊ ۾ هوا جو دٻاءُ خميس ۽ جمعي تائين برقرار رهندو، جنهن جي ڪري هيٽ ويو جي لهر برقرار هوندي. اختيارين سنڌ جي مهاڻن کي اربع کان جمعي تائين اونهي سمنڊ ۾ نه وڃڻ جي هدايت ڪئي آهي ۽ واڳيل اختيارين کي خبردار ڪيو آهي ته سامونڊي طوفان ”وايو“ کي نظر ۾ رکندي اڳواٽ ئي اپاءَ ورتا وڃن.هوڏانهن ضلعي انتظاميا سجاول طرفان سامونڊي پٽي ۾ الرٽ جاري ڪندي ماهي گيرن کي سمنڊ ۾ وڃڻ کان روڪيو ويو آهي . ٻئي طرف بدين، ٺٽو ۽ سجاول ضعن ۾ ريڊ الرٽ جاري ڪري عملي جون موڪلون رد ڪيون ويون آهن، ٽنهي ضلعن جي ڊي سيز، پاران لاڳاپيل کاتن جي عملدارن سان سان گڏجاڻيون ڪيون ويون، مهاڻن کي سمنڊ ۾ وڃڻ کان روڪيو ويو آهي.

0Shares
کیٹاگری میں : سنڌ

اپنا تبصرہ بھیجیں