پاڪ چين وچ ۾ مختلف شعبن ۾ سهڪار وارن يادداشتنامن تي صحيحون

اسلام آباد (بيورو) چين جي نائب صدر وانگ ڪشان پاڪستان ۽ چين وچ ۾ مختلف شعبن ۾ سهڪار جي يادداشتن تي صحيحون ڪري ڇڏيون. چيني نائب صدر وانگ ڪشان اعليٰ سطحي وفد سان گڏ ٽن ڏينهن جي دوري تي پاڪستان پهتو، ايئرپورٽ تي پرڏيهي وزير شاهه محمود قريشي ۽ منصوبابندي بابت وزير خسرو بختيار سندس آجيان ڪئي. چيني نائب صدر جي مان ۾ ايوان صدر ۾ هڪ خاص تقريب رٿي وئي، جنهن ۾ صدر عارف علوي معزز مهمان کي اعليٰ ترين سول اعزاز ”نشان پاڪستان“ سان نوازيو، جڏهن ته وانگ ڪشان اسلام آباد ۾ فرينڊز آف سلڪ روڊ سيمينار ۾ پڻ شرڪت ڪئي. هوڏانهن چيني نائب صدر وزيراعظم هائوس پهتو، جتي عمران خان سندس آجيان ڪئي ۽ ٻنهي اڳواڻن ۾ وفدن جي سطح تي ملاقات ٿي، جنهن کانپوءِ پاڪستان ۽ چين وچ ۾ مفاهمت جي يادداشتن تي صحيح ڪرڻ جي تقريب ٿي. پاڪستان ۽ چين معاشي، ٽيڪنيڪي معاملن ۽ ڊزاسٽر مئنيجمينٽ جي شعبي ۾ سهڪار جي ايم او يوز تي صحيحون ڪيون. چيني نائب صدر گنڌارا جو به دورو ڪندو، جتي کيس گنڌارا جي قديم تهذيب جي حوالي سان بريفنگ ڏني ويندي. پرڏيهي کاتي جي ترجمان موجب چيني نائب صدر چائنا ڪميونسٽ پارٽي جي پرڏيهي معاملن جو اهم رڪن آهي، سندس دوري جو مقصد پاڪ – چين اعليٰ سطحي ڏي وٺ جو سلسلو جاري رکڻ آهي. سندس چوڻ هو ته نومبر 2018 ۽ تازو بيلٽ اينڊ روڊ فورم ۾ وزيراعظم جي شرڪت سان اعليٰ سطحي ڏي وٺ ۾ تيزي آئي آهي. ٻئي طرف  چيني صدر چيو ته سي پيڪ گڏيل ترقي جو منصوبو آهي، چين پاڪستان سان هر ممڪن سهڪار جاري رکندو، سي پيڪ سان خطي ۾ ترقي ۽ خوشحالي جو دور شروع ٿيندو. 04