بجلي ۽ گئس جي صنعتي صارفين کي ايمنسٽي اسڪيم ۾ سيلز ٽيڪس جي رجسٽريشن ڪرائڻي پوندي: ايف بي آر چيئرمين

اسلام آباد(بيورو) ايف بي آر جي چيئرمين شبر زيدي واضح ڪيو آهي ته اڪائونٽس منجمند ڪرڻ جي حوالي سان قانون ۾ ڪا به تبديلي ناهي ڪئي وئي، بجلي ۽ گيس جي سمورن صنعتي صارفين کي ايمنسٽي اسڪيم ۾ سيلز ٽيڪس جي رجسٽريشن ڪرائڻي پوندي، پهرين جولاءِ کانپوءِ قانونسازي ڪري ڪارروائي ڪنداسين، پاڪستان ۾ هڪ لک ڪمپنيون ايس اي سي پي ۾ رجسٽرڊ آهن، ٽيڪس فائلر 50 هزار ڪمپنيون آهن، ايس اي سي پي چيئرمين کي خط لکيو آهي، ٻين 50 هزار ڪمپنين کي اهو ڪڍي يا مان ڪڍي ڇڏيندس، نان فائلر ڪمپنين کي ٽيڪس نيٽ ۾ آندو ويندو، قانون ۾ ڪٿي ڪمزوري آهي ته ويهي ڏسنداسين، اڻ رجسٽرڊ ادارا 2 سيڪڙو سيلز ٽيڪس ڏئي رجسٽرڊ ٿي سگهن ٿا، ايمنسٽي اسڪيم ۾ سيلز ٽيڪس جون رهتون ڪليئر ڪرائي سگهجن ٿيون، غلطي ڪندڙ ادارن کي سيلز ٽيڪس ۾ رجسٽرڊ ٿيڻ جو موقعوڏئي رهيا آهيون، صنعتي ادارن جو ري ايڪشن ڏسي سزا جو فيصلو ڪنداسين، اربع تي ايف بي آر عملدارن سان گڏ پريس ڪانفرنس ڪندي شبر زيدي ٻڌايو ته شڪايت اچي رهي هئي ته ماڻهن کي نوٽيس نه پيو ملي ۽ اڪائونٽس منجمند ڪيا پيا وڃن، اها هدايت ڪئي آهي ته جنهن جو اڪائونٽ منجمند ڪيو وڃي ان کي24 ڪلاڪ اڳواٽ آگاهه ڪيو وڃي، اڪائونٽ منجمند ڪرڻ جي حوالي سان قانون ۾ ڪا به تبديلي نه ڪئي وئي آهي، هن چيو ته ملڪ ۾ بجلي جا صنعتي صارفين 3 لک 41 هزار آهن، جڏهن ته سيلز ٽيڪس ۾ 38 هزار ادارا رجسٽرڊ آهن، هن چيو ته اڻ رجسٽرڊ ادارا 2 سيڪڙو سيلز ٽيڪس ڏئي رجسٽرڊ ٿي سگهن ٿا، پهرين جنوري کانپوءِ اهڙن ادارن خلاف سخت ڪارروائي ٿيندي، هن چيو ته هميشه ڪاروبار لاءِ ماحول پيدا ڪرڻو آهي، صنعتي ادارن کي سيلز ٽيڪس ۾ رجسٽر ٿيڻ گهرجي، هن چيو ته اسان پنهنجي قانون جو جائزو وٺنداسين، غلطي ڪندڙ ادارن کي سيلز ٽيڪس ۾ رجسٽرڊ ٿيڻ جو موقعو ڏئي رهيا آهيون، هن چيو ته سيلز ٽيڪس ايمنسٽي پهريون ڀيرو فراهم ڪئي، صنعتي ادارن کي موقعو ڏئي رهيا آهيون ته ٽِيڪس نيٽ ۾ شامل ٿي وڃن، هن چيو ته ايمنسٽي اسڪيم تائين فائلز جو انگ وڌائڻ جو ٽارگيٽ نٿا ڏئي سگهون، ڪوشش آهي ته ماڻهو پاڻ اچي ٽيڪس نظام ۾ شامل ٿين، في الحال پراڻي نظام موجب رجسٽرڊ ٿيندا، هن چيو ته اسان چاهيون ٿا ته ماڻهو رضاڪاراڻي طور ٽيڪس ۾ رجسٽرڊ ٿين.