العزيزيه اسٽيل ملز ريفرنس: نواز شريف سزا معطلي لاءِ ٻيهر عدالت سان رابطو ڪري ورتو

0Shares

اسلام آباد(بيورو) اڳوڻي وزيراعظم نواز شريف العزيزيه  اسٽيل ملز ريفرنس ۾ 7 سال قيد واري سزا جي معطلي لاءِ هڪ دفعو ٻيهر اسلام آباد هاءِ ڪورٽ سان رابطو ڪري ورتو آهي. احتساب عدالت گذريل سال اڳوڻي وزيراعظم کي العزيزيه اسٽيل ملز ريفرنس ۾ 7 سال قيد جي سزا ٻڌائي هئي جنهن جي خلاف سندس وڪيل طرفان داخل درخواست ۾ عدالت کان طبي بنيادن تي سزا معطلي جي اپيل ڪئي وئي هئي. درخواست ۾ موقف اختيار ڪيو ويو آهي ته احتساب عدالت جي 24 ڊسمبر 2018ع تي ٻڌايل سزا خلاف اپيل داخل ڪئي هئي جنهن تي فيصلي تائين سزا معطل ڪري طبي بنيادن تي ضمانت ڏني وڃي. درخواست ۾ چيو ويو آهي ته ڊاڪٽرن جي راءِ آهي ته نوازشريف کي ڪيترائي خطرناڪ مرض آهن جڏهن ته درخواست سان گڏ ميڊيڪل رپورٽون ۽ ڊاڪٽرن جي راءِ کي به گڏ ڪيو ويو آهي. درخواست ۾ موقف اختيار ڪيو ويو آهي ته سياسي مخالفن ۽ حڪومتي ماڻهن طرفان پروپيگنڊا ڪئي وئي ته علاج جي لاءِ ضمانت جي درخواست اين آر او آهي ۽ سزا معطلي جي درخواست کي اين آر او چوڻ توهين عدالت جي زمري ۾ اچي ٿو. درخواست ۾ چيو ويو آهي ته جيڪڏهن سزا معطل ڪئي وئي ته ان سان پراسيڪوشن جي ڪيس تي ڪوبه فرق نه پوندو. اڳوڻي وزيراعظم طرفان سزا معطلي جي درخواست ۾ نيب، جج، احتساب عدالت ۽ سپرنٽينڊنٽ ڪوٽ لکپت جيل کي به ڌر بڻايو ويو آهي. ياد رهي ته اسلام آباد هاءِ ڪورٽ ان کان اڳ نوازشريف کي طبي بنيادن تي سزا معطلي جي درخواست رد ڪئي هئي جنهن کان پوءِ هن فيصلي جي خلاف سپريم ڪورٽ سان رجوع ڪيو هو. سپريم ڪورٽ علاج جي حوالي سان نوازشريف جي 6 هفتن جي لاءِ سزا معطل ڪئي هئي ۽ ان کان پوءِ اعليَ عدالت ان ۾ واڌ جي درخواست رد ڪئي هئي جنهن کان پوءِ کيس واپس ڪوٽ لکپت جيل وڃڻو پيو.

0Shares

اپنا تبصرہ بھیجیں