12 مئي سانحي کي 12 ورهيه گذري ويا، متاثرن کي انصاف نه ملي سگهيو

0Shares

ڪراچي(اسٽاف رپورٽر) 12 مئي سانحي کي 12 سالن کان وڌيڪ عرصو گذري ويو آهي پر متاثرين کي اڄ تائين انصاف ناهي ملي سگهيو. هن ڏينهن تي ڪراچي ۾ هٽايل چيف جسٽس جي اچڻ وقت پرتشدد واقعن ۾ 50 کان وڌيڪ ماڻهو قتل ۽ هڪ سئو کان وڌيڪ زخمي ٿي پيا هئا. تفصيل موجب  12 مئي سانحي کي گذرئي 12 سال مڪمل ٿي ويا آهن. وڪيل برادري اڄ به هن ڏينهن کي ڪارو ڏينهن ڪري ملهائيندي آهي. شهيدن جي ياد ۾ وڪيل 12 مئي کي ڪارو ڏينهن طور ملهائيندا آهن ۽ عدالتي ڪم ڪارن جو بائيڪاٽ ڪيو ويندو آهي ۽ جنرل باڊي جو  اجلاس منعقد ڪيو ويندو آهي جنهن ۾ واقعي جي شفاف جاچ ۽ ملوث جوابدارن کي سزا ڏيڻ جو مطالبو ڪيو ويندو آهي. 12 مئي 2007ع تي وڪيلن جي تحريڪ زورن تي هئي. ان وقت جي هٽايل چيف جسٽس افتخار محمد چوڌري جي ڪراچي اچڻ جي موقعي تي ان جي آجيان جي لاءِ ايندڙ سياسي ڪارڪنن تي نامعلوم ماڻهن گوليون هلايون هيون جنهن سبب وڪيلن سميت 50 ڄڻا فوت ٿي ويا هئا. مذڪوره سانحي ۾ هڪ سئو ٽيهه ڄڻن کان وڌيڪ زخمي ٿي پيا هئا جڏهن ته درجنين گاڏين ۽ ٻئي قيمتي سامان کي باهيون ڏنيون ويون هيون. جڏهن ته 16 ڪيسن ۾ ميئر ڪراچي سميت 40 کان وڌيڪ ايم ڪيو ايم جا ڪارڪن نامزد آهن. اهم ترين شاهراهن کي ڪنٽينر هڻي بند ڪيو ويو جنهن سبب وڪيل ۽ جج عدالت، جڏهن ته هٽايل چيف جسٽس ايئرپورٽ تائين محدود ٿي ويو هو. ان وقت جي چيف جسٽس سنڌ هاءِ ڪورٽ جسٽس صبيح الدين جاچ جي لاءِ لارجر بينچ به جوڙي هئي. پر اڄ تائين نه ته قاتل گرفتار ٿي سگهيا ۽ نه ئي وري ڪنهن کي سزا ملي سگهي آهي. ياد رهي ته هن ڪيس ۾ درخواست گذار اقبال ڪاظمي ڪيس کي ٻيهر ٻڌڻ لاءِ سانحي جي جاچ لاءِ عدالتي ڪميشن ٺاهڻ جي اپيل ڪئي هئي جڏهن ته عدالتي معاونين ڪميشن ٺاهڻ جي حق ۾ دليل به ڏنا هئا. درخواست ۾ اڳوڻي صدر پرويز مشرف، ايم ڪيو ايم اڳواڻ، اڳوڻو گهرو صلاحڪار ۽ ميئر ڪراچي وسيم اختر کي به ڌر بڻايو ويو هو ۽ چيو ويو هو ته اڳوڻي صدر پرويز مشرف جي حڪم تي ايم ڪيو ايم ڪراچي ۾ قتل عام ڪرايو. 2008ع ۾ سنڌ هاءِ ڪورٽ جي لارجر بينچ درخواستن کي ٻڌڻ جوڳو قرار ڏنو هو جڏهن ته سنڌ حڪومت طرفان ڪميشن ٺاهڻ جي مخالفت ڪئي وئي ۽ موقف اختيار ڪيو ويو ته سمورن متاثرن کي معاوضي جي ادائگي ڪئي وئي آهي. ياد رهي ته اڳوڻي چيف جسٽس ثاقب نثار به 12 مئي 2018ع تي هاءِ ڪورٽ کي 3 مهينن اندر ڪيس اُڪلائڻ جو حڪم ڏنو هو.

0Shares
کیٹاگری میں : سنڌ

اپنا تبصرہ بھیجیں