گوادر جي پي سي هوٽل ۾ ڪليئرنس آپريشن مڪمل، نيوي اهلڪار سوڌو 5 ڄڻا شهيد، ٽنهي دهشتگردن کي ماريو ويو

0Shares

اسلام آباد/راولپنڊي(بيورو+م ڊ) آءِ ايس پي آر جو چوڻ آهي ته سيڪيورٽي فورسز پي سي گوادر ۾ ڪليئرنس آپريشن مڪمل ڪري ورتو، جنهن ۾ پاڪ بحريه جي سپاهي سميت 5 ڄڻا شهيد ٿيا. آءِ ايس پي آر موجب پي سي گوادر تي حملو ڪندڙ 3 دهشتگردن کي ماريو ويو آپريشن دوران هوٽل جا 4 ملازم ۽ پاڪ بحريه جو هڪ سپاهي شهيد ٿيو آهي. آپريشن دوران پاڪ فوج جا 2 ڪيپٽن، بحريه ۽ هوٽل جا 2-2 ملازم زخمي ٿيا. آءِ ايس پي آر موجب دهشتگردن هوٽل ۾ ترسيل مهمانن کي يرغمال بڻائڻ جي ڪوشش ڪئي پر گارڊز جي طرفان روڪڻ تي دهشتگرد ڏاڪڻ طرف ڀڳا ۽ فائرنگ شروع ڪري ڇڏيائون. دهشتگردن جي فائرنگ جي نتيجي ۾ گارڊ ظهور ۽ 3 ملازم فرهاد، بلاول ۽ اويس شهيد ٿي ويا. آءِ ايس پي آر موجب پاڪ فوج، پاڪ بحريه ۽ پوليس اطلاع ملندي ئي هوٽل پهچي وئي. فورسز مهمانن ۽ اسٽاف کي حفاظت سان ڪڍي دهشتگردن کي چوٿين فلور تي محدود ڪري ڇڏيو. دهشتگردن سي سي ٽي وي ڪيمرائون لاهي چوٿين فلور جي رستن تي بارودي سرنگون وڇائي ڇڏيون. فورسز طرفان چوٿين فلور تي پهچڻ لاءِ خصوصي رستا ٺاهيا ويا ۽ دهشتگردن کي ماريو ويو ۽ بارودي سرنگون صاف ڪيون ويون. جڏهن ته فائرنگ جي ڏي وٺ دوران پاڪ بحريه جو سپاهي عباس خان شهيد ٿي ويو آهي. ٻئي طرف وزيراعظم عمران خان گوادر ۾ فائيو اسٽار هوٽل تي دهشتگرد حملي جي مذمت ڪندي شهيد سيڪيورٽي گارڊ کي خراج عقيدت پيش ڪيو آهي. رپورٽ موجب وزيراعظم گوادر ۾ دهشتگردن جي طرفان فائيو اسٽار هوٽل تي ڪيل حملي جي سخت لفظن ۾ مذمت ڪئي آهي جڏهن ته هن سيڪيورٽي فورسز جي فوري طور تي ڪارروائي جي تعريف به ڪئي. عمران خان دهشتگردن جي آپريشن جي دوران شهيد سيڪيورٽي گارڊ کي خراج عقيدت پيش ڪيو. عمران خان چيو آهي ته سيڪيورٽي فورسز فوري طور تي ڪارروائي ڪندي قيمتي جانين کي بچايو. هن چيو ته دهشتگردن جي ان حملي سان اقتصادي منصوبن کي ناڪام بنائڻ جي ڪوشش ڪئي وئي پر دهشتگرد عناصرن کي سندن ناپاڪ مقصدن ۾ ڪامياب ٿيڻ نه ڏينداسين. واضح رهي ته گذريل ڏينهن گوادر جي فائيو اسٽار هوٽل ۾ حملي آورن داخل ٿي سيڪيورٽي گارڊ تي فائرنگ ڪئي جنهن سبب هو شهيد ٿي ويو جڏهن ته جوابي ڪارروائي ۾ 3 دهشتگرد مارجي ويا. ٻئي طرف چين گوادر حملي جي سخت لفظن ۾ مذمت ڪندي چيو آهي ته گوادر حملو اقتصادي منصوبن کي نقصان پهچائڻ جي ڪوشش هئي. تفصيل موجب چيني سفارتخاني طرفان جاري ڪيل بيان موجب چين چيو آهي ته گوادر ۾ دهشتگرد ڪارروائين سان اقتصادي منصوبن کي نقصان پهچائڻ جي ڪوشش ڪئي وئي. پر پاڪستاني قوم ۽ فورسز دهشتگردن جي ناپاڪ ارادن کي ڪامياب ٿيڻ نه ڏنو. پنهنجي بيان ۾ چيني سفارتخاني شهيد گارڊز جي وارثن سان تعزيت جو اظهار ۽ زخمي اهلڪارن سان به همدردي ڪئي آهي. ياد رهي ته گذريل ڏينهن گوادر پي سي هوٽل تي دهشٽگردن جي حملي ۾ هڪ سيڪيورٽي گارڊ شهيد ٿيو هو جڏهن ته سيڪيورٽي فورسز جي جوابي ڪارروائي ۾ 3 دهشتگرد مارجي ويا هئا. جڏهن ته هوٽل تي حملي جي ذميواري بلوچ لبريشن آرمي قبول ڪئي هئي.

0Shares

اپنا تبصرہ بھیجیں