گوادر ۾ پرل ڪانٽيننٽل هوٽل تي حملو، گارڊ شهيد، سيڪيورٽي فورسز سان ويڙهه ۾ 3 دهشتگرد مارجي ويا

گوادر(م ڊ) گوادر ۾ فائيو اسٽار هوٽل پرل ڪانٽيننٽل تي دهشتگردن حملو ڪري ڇڏيو جنهن جي نتيجي ۾ گارڊ شهيد ٿي ويو جڏهن ته سيڪيورٽي فورسز سان ويڙهه ۾ 3 دهشتگرد مارجي ويا حملي جي ذميواري بي ايل اي قبولي ورتي آهي پاڪ فوج جي شعبي آءِ ايس پي آرجي بيان موجب 3 دهشتگردن زبردستي پرل ڪانٽيننٽل هوٽل ۾ داخل ٿيڻ جي ڪوشش ڪئي، هوٽل جي مرڪزي گيٽ تي گارڊ دهشتگردن کي روڪيو ته هنن گارڊ تي گولي هلائي ۽ کيس شهيد ڪري ڇڏيو. بيان ۾ چيو ويو آهي ته فورسز پاران هوٽل کي ڪڙو چاڙهي ان ۾ موجود ماڻهن کي حفاظت سان ٻاهر ڪڍيو ويو، دهشتگردن جي هوٽل جي سڀ کان مٿين منزل تي وڃڻ واري ڪوشش ناڪام بڻائي وئي جنهن بعد ڪليئرنس آپريشن شروع ڪيو ويو. ان کان اڳ ايس ايڇ او گوادر اسلم بنگلزئي جو چوڻ هو ته اسان کي 4 لڳي 50 منٽن تي اِهو اطلاع مليو ته 3 کان 4 دهشتگرد پرل ڪانٽيننٽل هوٽل ۾ داخل ٿيا، جڏهن ته سيڪيورٽي فورسز ۽ حملي آورن جي وچ ۾ فائرنگ جي ڏي وٺ ٿي. هن چيو ته هوٽل ۾ ڪو به پرڏيهي موجود نه هو. صوبائي گهرو وزير ضيا لانگو چيو ته سيڪيورٽي فروسز جي آپريشن ۾ ايف سي، پوليس ۽ ليويز فورسز حصو ورتو جڏهن ته دهشتگردن جي فائرنگ ۾ هوٽل ۾  موجود ماڻهو زخمي به ٿيا. هن چيو ته ريسڪيو ڪيل ماڻهن کي هيلي ڪاپٽر جي ذريعي محفوظ مقام ڏانهن منتقل ڪيو ويو آهي، هوٽل جي اسٽاف جي انگ بابت في الحال ٻڌائڻ ممڪن ناهي جڏهن ته صورتحال واضح ٿيڻ تي وڌيڪ تفصيل بابت آگاهه ڪيو ويندو. پوليس جو چوڻ هو ته نيول ڪمانڊوز ۽ ٿرٽي ون بريگيڊ هوٽل جي اندر داخل ٿي ڪارروائي ۾ حصو ورتو جڏهن ته پاڪ بحريا جي هيليڪاپٽر وسيلي عمارت جي فضائي نگراني ڪئي وئي انسپڪٽر جنرل پوليس (آءِ جي پي) بلوچستان محسن حسن بٽ به هوٽل ۾ ڪنهن پرڏيهي جي موجود نه هئڻ جي تصديق ڪندي چيو ته 2 کان 3 حملي آورن پهرين فائرنگ ڪئي ۽ پوءِ هوٽل جي اندر داخل ٿيا. سندس چوڻ هو ته ان صورتحال ۾ پاڪ فوج کي طلب ڪيو ويو جڏهن ته هوٽل مان ماڻهن کي ڪڍڻ وارو عمل 95 سيڪڙو مڪمل ٿي چڪو آهي ۽ رڳو هوٽل جو عملو اندر موجود آهي. هن چيو ته سندس خيال ۾ حملي آور ٻيڙي جي ذريعي هوٽل ۾ حملي جي لاءِ آيا.