تبديلين جا فيصلا ڪير ڪرائي رهيو آهي؟ نيب گردي ۽ معيشت گڏ نٿا هلي سگهن: بلاول ڀٽو

اسلام آباد(بيورو) پيپلز پارٽي جي چيئرمين بلاول ڀٽو زرداري جو چوڻ آهي ته حڪومتي نااهلي سبب عوام مهانگائي جي سونامي ۾ ٻڏي رهيو آهي. قومي اسيمبلي جي اسپيڪر اسد قيصر جي سربراهي ۾ ٿيندڙ اجلاس ۾ خيالن جو اظهار ڪندي  پ پ چيئرمين جو چوڻ هو ته عوام مهانگائي جي سونامي ۾ ٻڏي رهيو آهي، اهو صرف ۽ صرف حڪومت جي نااهلي جي ڪري ٿي رهيو آهي. گهرو وزير اعجاز شاهه جو نالو وٺڻ بنا بلاول ڀٽو چيو ته جن وزيرن جا دهشتگردن سان لاڳاپا آهن انهن کي فوري طور تي ڪڍيو وڃي. پ پ چيئرمين چيو ته پاڪستان جو عوام پريشان آهي ته اوچتو ناڻي واري وزير، گورنر اسٽيٽ بينڪ ۽ ايف بي آر چيئرمين کي ڪڍيو ويندو آهي، عوام سوال ڪري رهيو آهي ته فيصلا ڪير پيو ڪري، وزيراعظم ڪنهن جي به مقرري کان اڳ ان شخص سان ملاقات به نه ٿو ڪري، ايئن ته ناهي ته پاڪستان ۾ مقرري آءِ ايم ايف ڪري رهي آهي. هن جو چوڻ هو ته صرف ٽن منصوبن ۾ 13 ارب ڊالرن جي ڪرپشن ٿي آهي، ان معاملي جو احتساب ڪير ڪندو؟.  هن چيو ته نيب گردي ۽ معيشت گڏگڏ نه ٿيون هلي سگهن، نيب گردي جو احتساب ڪير ڪندو؟. پ پ چيئرمين چيو ته وفاقي حڪومت صوبن کي انهن جا پئسا نه پئي ڏئي ڇو ته وفاقي حڪومت ناڪام آهي.بلاول ڀٽو زرداري چيو ته تبديلين جا فيصلا ڪير ڪرائي رهيو آهي؟ نيب گردي ۽ معيشت گڏ نٿا هلي سگهن، اوچتو ناڻي واري وزير، اسٽيٽ بئنڪ جي گورنر ۽ ايف بي آر چيئرمين کي ڪڍڻ تي ماڻهو حيران ۽ پريشان آهن، رڳو ٽن منصوبن ۾ 13 ارب ڊالرز جي ڪرپشن ٿي، ٻڌايو وڃي ته ان معاملي جو احتساب ڪير ڪندو؟. هن چيو ته وفاقي حڪومت صوبن کي انهن جا پيسا نه پئي ڏي، ملڪ ۾ پي ٽي آءِ ۽ آءِ ايم ايف جي حڪومت آهي، حڪومت جي ناڪامي جي سزا پيٽرول، گئس، بجلي ۽ دوائن جي اگهن ۾ واڌ جي صورت ۾ ڀوڳي رهيا آهيون، جن وزيرن جا دهشتگردن سان لاڳاپا آهن، انهن کي فوري طور وفاقي ڪابينا مان ڪڍيو وڃي. ٻئي طرف قومي اسيمبلي ۾ وفاقي وزير مراد سعيد جي تقرير دوران مخالف ڌر پارٽين جي ميمبرن احتجاج ڪندي اسپيڪر جي ڊائيس جو گهيراءُ ڪيو ۽ سخت نعريبازي ڪئي.