جمهوريت بچائڻ جو مطلب ڪرپشن بچائڻ آهي، آصف ۽ شريف خاندان کي اين آر او نه ملندو: وزيراعظم

0Shares

اسلام آباد (بيورو) وزيراعظم عمران خان چيو آهي ته سمورين اپوزيشن پارٽين کي پنهنجي ڪرپشن ظاهر ٿيڻ تي پريشاني آهي ۽ ان ئي بنياد تي موجوده حڪومت خلاف اسلام آباد ۾ مارچ ڪرڻ جي ڌمڪي ڏني پئي وڃي. جناح ڪنوينشن سينٽر اسلام آباد ۾ تحريڪ انصاف جي 23هين يوم تاسيس تقريب کي خطاب ڪندي عمران خان چيو ته الله مون کي سياست ۾ اچڻ کان اڳ سڀني نعمتن سان نوازيو ۽ ماڻهن جي خدمت ڪرڻ لاءِ سياست ۾ آيس، اهي جمهوريت بچائڻ جو گوڙ ڪري پنهنجي چوري بچائڻ چاهين ٿا، اسيمبلي ۾ گوڙ ڪرڻ جو مقصد اين آر او حاصل ڪرڻ آهي. هن واضح ڪيو ته اڳوڻي صدر جنيل پرويز مشرف نواز شريف ۽ آصف علي زرداري کي اين آر او ڏنو، جنهن سبب ملڪ جو 6 هزار ارب رپين جو قرض 30 هزار ارب رپين تائين پهچي ويو پر مان ڪنهن کي به اين آر او نه ڏيندس، ڇو ته مان الله کي جوابده آهيان. سندس چوڻ هو ته مديني جي رياست جهڙي سونهري اصولن کان پري رهڻ اسان جي پٺ تي هجڻ جو وڏو سبب آهي، 22 سال حڪمراني ڪندڙ هڪ اسپتال تعمير نه ڪري سگهيا، جتي سندن علاج ممڪن ٿي سگهي، جڏهن هڪ حڪمران چوري ڪندو آهي ته سڄو نظام تباهه ٿي ويندو آهي، مخلص اڳواڻ ملڪ ۽ قوم جي ترقي ۾ اهم ڪردار ادا ڪندا آهن ۽ ان جو مثال مهاتير محمد آهي، جنهن جي ڪري ملائيشيا ترقي حاصل ڪئي. عمران خان چيو ته تحريڪ انصاف جي 23 ورهين جي جدوجهد مثال آهي، سٺو ۽ برو وقت ايندو رهندو آهي ۽ ڪجهه ماڻهو دلبرداشتا ٿي ويندا آهن، جڏهن ته ڪجهه بيهجي ويندا آهن، هيءَ واحد پارٽي آهي جيڪا ڪنهن شارٽ ڪٽ نه پر مسلسل جدوجهد جي نتيجي ۾ وجود ۾ آئي ۽ هيءَ پارٽي ئي ملڪ کي معاشي بحران مان ڪڍندي. وزيراعظم “بلاول صاحبا” واري جملي جي وضاحت ڪندي چيو ته بلاول ڀٽو صاحب! ڪڏهن ڪڏهن غلطي ٿي ويندي آهي. عمران خان چيو ته جمهوريت بچائڻ جو مطلب ڪرپشن بچائڻ آهي، گوڙ ڪندڙن کي ڪنهن به ريت اين آر او نه ملندو، اسيمبلي ۾ گوڙ ڪندڙ جمهوريت بچائڻ جون ڳالهيون ڪندا آهن، انهن ماڻهن پاران جمهوريت کي بچائڻ جو مطلب پنهنجي ڪرپشن بچائڻ آهي پر انهن کي اين آر او نه ملندو. هن چيو ته هڪ طرف مولانا فضل الرحمان اسان جي خلاف تياري ڪري رهيو آهي ته ٻئي طرف بلاول ڀٽو صاحب اسان جي خلاف ڳالهيون ڪري ٿو، شهباز شريف ويو ته 1100 ارب رپين جو خسارو ڇڏي ويو، نواز شريف علاج لاءِ ملڪ کان ٻاهر وڃڻ چاهي ٿو، شهباز شريف جي اقتدار ۾ ايندي ئي سندس 11 ڪمپنيون ٺهي وڃن ٿيون پر اهڙي ڪا به اسپتال نه ٺهي، جتي سندن علاج ٿي سگهي، ان ۾ ڪو به شڪ ناهي ته مهانگائي آهي ۽ اهو به احساس آهي ته ماڻهو پريشان آهن، عثمان بوزدار ثابت ڪندو ته پنجاب ۾ ان کان بهتر ڪو به وڏو وزير ناهي آيو. سندس چوڻ هو ته تحريڪ انصاف جا 23 سال ٻڌائين ٿا ته جدوجهد ڪيئن ٿيندي آهي، 15 سالن تائين ماڻهو مذاق اڏائيندا رهيا ۽ تحريڪ انصاف کي ٽانگا پارٽي ڪوٺيندا رهيا، ڪير سوچي به نه پئي سگهيو ته ملائيشيا پاڪستان کان اڳتي نڪري ويندو، مهاتير محمد کانپوءِ اتي به چور حڪمران اچي ويا، عوام 93 ورهين جي ڄمار ۾ کيس ٻيهر چونڊيو، قائداعظم محمد علي جناح لنڊن جو مهانگو ترين وڪيل هو پر هن 40 سالن تائين جدوجهد ڪئي، اهڙي طرح نيلسن منڊيلا پنهنجي قوم لاءِ 27 سال جيل ڀوڳيو، جڏهن توهان جدوجهد ڪري اڳتي ايندا آهيو ته توهان سٺي ۽ خراب وقت مان گذري ايندا آهيو جدوجهد هڪ قسم جي ٽريننگ هوندي آهي، جيڪا توهان کي مضبوط بڻائيندي آهي.

0Shares

اپنا تبصرہ بھیجیں