جمهوريت ۾ ٿرڊ امپائر نه پر عوام جي مرضي هلندي آهي، عمران خان سي پيڪ فنڊن جي رقم ڪيڏانهن ڪئي: بلاول

0Shares

اسلام آباد(بيورو) پاڪستان پيپلز پارٽي جي چيئرمين بلاول ڀٽو زرداري خبردار ڪيو آهي ته حڪومت کي پاڪ- چين اقتصادي راهداري منصوبن تي سمجهوتو نه ڪرڻ ڏينداسين، وزير اعظم عمران خان واعدي خلافي ڪندي منصوبن لاءِ مختص مالياتي فنڊن مان پنهنجي وزيرن کي رقم ڏياري. هن واضح ڪيو ته اسان سي پيڪ کي تڪرار نه بڻجڻ ڏينداسين ۽ حڪومت خاطري ڪرائي ته سي پيڪ تي ڪو به سمجهوتو نه ٿيندو.قانون وارو وزير چئي رهيو آهي ته اسان ريفرنڊم جي ذريعي صدارتي نظام آڻي سگهون ٿا؟ واري سوال تي بلاول ڀٽو جواب ڏنو ته ” قانون وارو وزير، قانون جو وزير نه پر بي قاعدگين جو وزير آهي ۽ هن کي موجوده حالتن ۾ اهڙا مشورا نه ڏيڻ گهرجن. هن چيو ته اڳوڻي صدر جنرل پرويز مشرف جي خلاف غداري جو ڪيس ٻڌڻي هيٺ آهي ان ڪري عمران خان سميت ٻيا وزير اهڙيون حرڪتون نه ڪن جو سڀاڻي انهن تي غداري جو ڪيس ٿي وڃي. هڪ سوال جي جواب ۾ هن چيو ته سردار اختر مينگل گم ٿيل ماڻهن سميت دهشتگردي بابت قومي اسيمبلي ۾ بهترين تقرير ڪئي پر حڪومت ۽ ميڊيا ان کي نظرانداز ڪيو. عاصمه جهانگير فائونڊيشن جي بندوبست هيٺ 18هين ترميم ۽ انساني حقن بابت معاملن تي رٿيل تقريب ۾ پاڪستان پيپلز پارٽي جي چيئرمين بلاول ڀٽو، پاڪستان مسلم ليگ ن جي سينيٽر مشاهد الله ۽ پشتونخواهه ملي عوامي پارٽي جي سينيٽر عثمان خان ڪاڪڙ ۽ ٻين اڳواڻن شرڪت ڪئي. تقريب کان پوءِ اڳواڻن صحافين سان گڏيل طور تي ڳالهه ٻولهه ڪئي. بلاول ڀٽو چيو ته بلوچستان جا مسئلا سڄي ملڪ جي مسئلن سان سلهاڙيل آهن ان ڪري بلوچستان جي مسئلن کي به ميڊيا جي ايتري ئي ڪوريج ملڻ گهرجي جيتري ٻين صوبن کي ملندي آهي. نيب بابت سوال تي هن چيو ته نيب جو قانون ڪارو قانون ۽ پرويز مشرف جو بڻايل ادارو آهي جنهن کي رڳو سياسي انتقام لاءِ بڻايو ويو. پيپلز پارٽي جي چيئرمين چيو ته نيب جي موجوده نظام ۾ مڪمل تبديلي جي ضرورت آهي. سندس چوڻ هو ته پاڪستان ۾ رڳو هڪ ئي امپائر آهي جيڪو رڳو عوام جو آهي، ان ڪري جمهوري ملڪن ۾ ڪنهن ٿرڊ امپائر جي گنجائش ناهي هوندي. هن چيو ته ملڪ ۾ جمهوريت پروان چڙهي رهي آهي ان ڪري جمهوري طريقي سان صدارتي نظام آڻي سگهون ٿا ۽ نه ئي اِهو ملڪ جي حق ۾ آهي. بلاول ڀٽو واضح ڪيو ته پيپلز پارٽي سميت ٻيون جمهوري پارٽيون به صدارتي نظام جي خلاف گڏ ٿي مخالفت ڪنديون. پشتونخواهه ملي عوامي پارٽي جي سينيٽر عثمان خان ڪاڪڙ چيو ته خوشي ڏيندڙ ڳالهه آهي ته سياسي پارٽيون 18هين ترميم تي اتفاق راءِ رکن ٿيون جڏهن ته فوجي عدالتن سميت ٻين قومي معاملن تي ڳالهيون ڪيون ويون،. پاڪستان مسلم ليگ ن جي سينيٽر مشاهد الله صحافين سان ڳالهائيندي چيو ته بلاول ڀٽو جهڙي نوجوان جو پارٽي کي ليڊ ڪرڻ خوشي ڏيندڙ آهي. هن بلاول ڀٽو کي دعا ڏيندي چيو ته الله بلاول ڀٽو کي ذگهي عمر ۽ صحت ڏئي، بلاول جو نظريو ملڪ جي لاءِ ڏاڍو سٺو آهي.03

0Shares

اپنا تبصرہ بھیجیں