پاڪستان ۽ آءِ ايم ايف وچ ۾ بيل آئوٽ پيڪيج تي معاملا طئي ٿي ويا، معاهدي سان مهانگائي ۾ واڌ نه ٿيندي: اسد عمر

اسلام آباد(بيورو) پاڪستان جي عالمي مالياتي اداري (آءِ ايم ايف) سان معاملا طئي ٿي ويا آهن. ذريعن موجب آءِ ايم ايف ۽ عالمي بئنڪ سان ٿيندڙ اجلاسن کان پوءِ پاڪستاني وفد ناڻي واري وزير اسد عمر جي اڳواڻي ۾ پاڪستان واپس پهچي ويو آهي. ذريعن موجب پاڪستان ۽ آءِ ايم ايف وچ ۾ معاملا طئي ٿي ويا آهن ۽ اڃا لکت شڪل ڏيڻ باقي آهي. ذريعن موجب آءِ ايم ايف پاڪستان جي تجويز ڪيل اثاثا ڊڪليئرشن سان اختلاف نه ڪيو آهي، پاڪستان تجويز ڪيل اسڪيم جو مسودو آءِ ايم ايف  ۽ ايف اي ٽي ايف سان اڳ ئي شيئر ڪيو هو، ايف اي ٽي ايف به اسڪيم تي ڪو به اعتراض نه ڪيو آهي. ذريعن موجب آءِ ايم ايف سان بيل آئوٽ پيڪيج تي صحيحون اپريل ۾ ئي ڪيون وينديون، آءِ ايم ايف طرفان پاڪستان کي ملندڙ بيل آئوٽ پيڪيج ٽن سالن لاءِ هوندو پر پاڪستان کي ڇهه ارب ڊالر يا وري نو ارب ڊالر جو پئڪيج ڏيڻ اهو فيصلو ٿيڻ اڃا باقي آهي جنهن لاءِ آءِ ايم ايف جو وفد هلندڙ مهيني جي آخر ۾ پاڪستان جو دورو ڪندو ۽ دوري جي تاريخ ايندڙ هڪ ٻن ڏينهن ۾ طئي ڪئي ويندي. اثاثا ڊڪليئرشن اسڪيم کي آءِ ايم ايف جي دوري کان اڳ قانوني شڪل ڏني ويندي، اثاثا ڊڪليئريشن اسڪيم جي آخري منظوري اڄ ڪابينا مان ورتي ويندي. ڪابينا جي منظوري تي هڪ ٻن ڏينهن ۾ صدارتي آرڊيننس ذريعي اسڪيم لاڳو ڪئي ويندي، آرڊيننس جاري ٿيندي اثاثا ڊڪليئرشن اسڪيم فوري طور لاڳو ٿيندي. ٻئي طرف ناڻي واري وزير اسد عمر چيو آهي ته آءِ ايم ايف سان معاهدي جي نتيجي ۾ مهانگائي نه وڌندي. ناڻي بابت اسٽينڊنگ ڪميٽي جي اجلاس ۾ شرڪت کانپوءِ ميڊيا سان ڳالهائيندي اسد عمر چيو ته آءِ ايم ايف کان 6 کان 8 ارب ڊالرن جو معاهدو ٿيندو، آءِ ايم ايف سان ٺاهه کانپوءِ ساڍا ست ارب عالمي مالياتي بئنڪ کان ايندا. هن چيو ته آمريڪي دوري دوران ايف اي ٽي ايف جي صدر سان ملاقات ٿي، مان ڀارتي رويي بابت پنهنجي خدشن جو اظهار ڪيو. سندس چوڻ هو ته ايف اي ٽي ايف جي صدر خاطري ڪرائي ته فيصلا ميرٽ تحت ڪيا ويندا. ناڻي واري وزير اسد عمر چيو ته پرڏيهي امداد سان پاڪستان جي مٽاسٽا ناڻي جي ذخيرن ۾ اضافو ٿيندو ۽ پاڪستان جلد ئي بانڊ جاري ڪندو. هن چيو ته آءِ ايم ايف سان اصولي اتفاق ٿي ويو آهي، آءِ ايم ايف جو وفد اپريل جي آخري هفتي ۾ پاڪستان ايندو، آءِ ايم ايف سان معاهدي جي فورن بعد ورلڊ بينڪ ۽ ايشيائي ترقياتي بينڪ کان فنڊ ملندا، معاشي سڌارن تي ڪم ٿي رهيو آهي، آءِ ايم ايف پروگرام کانپوءِ ڪيپيٽل مارڪيٽ جي حالت بهتر ٿيندي، معاشي استحڪام نظر ايندو. سندس چوڻ هو ته آءِ ايم ايف سان معاهدي جي شرطن جو عام ماڻهوءَ تي اثر نه پوندو ۽ ان سان مهانگائيءَ ۾ واڌ نه ٿيندي، آءِ ايم ايف سان 6 کان 8 ارب ڊالر جو معاهدو ٿيندو، معاهدي کانپوءِ ساڍا 7 ارب عالمي بينڪ کان ملندا، ايشين ڊولپمينٽ بينڪ مان ايندڙ امداد ان کانسواءِ هوندي، جڏهن ته آءِ ايف سي کان به فنڊ ملندا. ناڻي واري وزير اسد عمر چيو ته گذريل حڪومت جي ڇڏيل مالي خساري سبب سخت قدم کڻڻا پئجي رهيا آهن، ملڪي معيشت ۾ بهتري بابت حڪومتي قدمن سان عوام تي بار پوندو، ن ليگ جن شين جا اگهه نه وڌايا، اهي مهانگيون ڪرڻيون پيون.. هن چيو ته ايف اي ٽي ايف کي سفارشن تي عملدرآمد جو مسودو اماڻينداسين، مسودي تي عملدرآمد جو جائزو وٺڻ لاءِ اي ٽي ايف جو وفد مئي جي ٽئين هفتي ۾ پاڪستان ايندو، اي ايم ايف سان چيني قرضن تي تازي دوري ۾ ڪا به ڳالهه ٻولهه ناهي ٿي. هوڏانهن آءِ ايم ايف پاران جاري ڪيل پڌرنامي ۾ چيو ويو آهي ته پاڪستاني اختيارين ۽ آءِ ايم ايف وچ ۾ واشنگٽن م تعميري ڳالهيون ٿيون. پڌرنامي موجب پاڪستاني اختيارين جي درخواست تي آءِ ايم ايف جو وفد اپريل مهينو ختم ٿيڻ کان پهريان پاڪستان جو دورو ڪندو.