سنڌ حڪومت ۽ پوليس وچ ۾ اختلاف چوٽ چڙهي ويا، سرڪار نئين پوليس ايڪٽ کي حتمي شڪل ڏئي ڇڏي

ڪراچي (اسٽاف رپورٽر) سنڌ حڪومت جي پوليس سان اختلاف وڌي ويا ۽  سنڌ حڪومت جي سڌ سماءُ بابت صلاحڪار بيئرسٽر مرتضيٰ وهاب پوليس جي ڪارڪردگي تي سوال اٿاري ڇڏيا آهن. صوبائي صلاحڪار چيو ته پوليس جو ڪم پوليسنگ ڪرڻ آهي ۽ اسان جو ڪم قانوسازي ڪرڻ آهي، پر ائين لڳي ٿو ته ڪجهه آفيسرن پاليسي ٺاهڻ شروع ڪري ڇڏي آهي. ڪراچي ۾ صحافين سان ڳالهائيند مرتضيٰ وهاب چيو تهٻه ڏينهن پوليس ڪانفرنس هلي رهي هئي، ان دوران سنڌ ۾ پنج قتل ٿيا، ارشاد رنجهاڻي کي مٿي ۾ گوليون هنيون ويون جڏهن ته امن امان جي صورتحال خراب ٿي آهي اسٽريٽ ڪرائيم ۾ واڌ ٿي آهي. پوليس جو ڪم ڪانفرنس ڪرڻ ناهي پوليسنگ ڪرڻ آهي، جن ماڻهن جو تعلق عوام سان ناهي هوندو اهي اهڙا منصوبا آڻيندا آهن.  سندس چوڻ هو ته سنڌ اسيمبلي ۾ هن سال شروعات ۾ ٽياڪڙي جي ڪردار کي ڪارائتو بڻائڻ لاءِ هڪ بل پاس ڪيو ويو آهي. سنڌ پاڪستان جو پهريون صوبو آهي جتي اهو قانون آيو آهي. هن چيوته  انصاف ڪنهن معاشري جو اهم جزو آهي. هن قانون ذريعي اسان انصاف عام غريب ماڻهو تائين پهچائڻ چاهيون ٿا.  مرتضيٰ وهاب چيو ته سنڌ اسيمبلي ريڪارڊ قانوسازي ڪئي آهي. اسيمبلي ڪم ڪري رهي آهي هاڻ ججن کي پنهنجو ڪم ڪرڻو آهي. ٻئي طرف سنڌ حڪومت نئين پوليس ايڪٽ کي حتمي شڪل ڏئي ڇڏي آهي. نئين ايڪٽ تحت پوليس آفيسرن جي بدليون ۽ مقرريون اعليٰ اختياراتي ڪميٽي ڪندي.  عدالتي فيصلي تحت اڳوڻو ۽ آءِ جي اي ڊي خواجا ۽ موجودا آءِ جي ڊاڪٽر ڪليم امام اهو اختيار استعمال ڪري رهيا هئا.  وڏي وزير ان بي اختياري تي ڪاوڙ جو اظهار ڪري چڪو آهي.  سنڌ سرڪار پوليس آفيسرن جي بدلين ۽ مقررين جو اختيار واپس وٺڻ لاءِ سرگرم نظر اچي رهي آهي. سنڌ حڪومت پوليس ايڪٽ 2019ع مسودي کي حتمي شڪل ڏئي ڇڏي آهي.  نئين پوليس ايڪٽ کي هلندڙ مهيني جي آخر تائين سنڌ اسيمبلي ۾ پيش ڪرڻ جو امڪان آهي.  نئين پوليس ايڪٽ ۾ بدلي ۽ مقرري جو اختيار اعليٰ اختياراتي ڪميٽي وٽ هوندو. ان دوران ٽرانسفر جو فيصلو به ڪميٽي ڪندي. هر پوليس آفيسر کي هڪ مخصوص مدي لاءِ مقرر ڪيو ويندو. نئين ايڪٽ تحت پوليس آفيسرن جي ڪارڪردگي جي نگراني لاءِ صوبائي سطح تي پبلڪ سيفٽي ڪميشن جوڙي ويندي.  جنهن ۾ سنڌ اسيمبلي جا مخالف اڳواڻ ۽ ريٽائرڊ جج پڻ شامل هوندا.  شهري جي شڪايتن جي ترت ازالي لاءِ صوبائي سطح تي ڪمپلين رجسٽر ڪميٽي به بڻائي ويندي.03