فواد چوڌري کي عليم خان بابت بيان مهانگو پئجي ويو، نيب نوٽيس وٺي ڇڏيو

اسلام آباد (بيورو) اطلاعات ۽ نشريات کاتي واري وفاقي وزير فواد چوڌري چيو آهي ته عليم خان تي سرڪاري خزاني کي نقصان پهچائڻ جو ڪوبه الزام ناهي. عليم خان کي به ضمانت ملڻ گهرجي.اطلاعات واري وزير فواد چوڌري سماجي رابطي جي ويب سائيٽ ٽوئيٽر تي ٽوئيٽ ڪندي چيو آهي ته اربين روپيه ڪرپشن ڪندڙن کي ته ضمانت آساني سان ملي سگهي ٿي پوءِ هڪ ڪاروباري ماڻهو کي ضمانت ڇو نٿي ملي.؟ عام تاثر آهي ته عليم خان مخالف ڌر جي گوڙ ڪرڻ سبب نه ڪيل ڏوهه جي سزا ڀوڳي رهيو آهي. عليم خان جو ڏوهه ايترو وڏو ناهي جنهن جي ان کي ايتري وڏي سزا ڏني پئي وڃي. هن چيو ته جيڪڏهن اربين روپيه کائيندڙ ڏوهارين کي آرام سان ضمانت ملي ٿي سگهي ته هڪ ڪاروباري شخص جنهن مٿان سرڪاري خزاني کي نقصان پهچائڻ جو ڪوبه الزام ناهي ان کي به ضمانت تي آزادي ملڻ گهرجي. ٻئي طرف نيب سڌ سماءَ واري وزير فواد چوڌري جي بيانن جو نوٽيس ورتو آهي. نيب طرفان جاري ڪيل پڌرائيءَ موجب فواد چوڌري طرفان عليم خان جي ڪيس بابت بيان جو نوٽيس ورتو ويو آهي، وفاقي وزير طرفان نيب بابت ماضي ۽ تازن بيانن جو جائزو وٺڻ جو فيصلو ڪيو ويو آهي. پڌرائيءَ ۾ چيو ويو آهي جائزو ورتو ويندو ته فواد چوڌري نيب جي معاملن ۾ مداخلت جي ڪوشش ته نه ڪئي، وفاقي وزير جا بيان جاچ جي اثرانداز ٿيڻ جي ڪوشش ته ناهن. پڌرائيءَ موجب نيب جو واسطو ڪنهن سياسي جماعت، گروهه يا فرد سان ناهي، نيب جي پهرين ۽ آخري وابستگي رڳو رياست پاڪستان سان آهي. نيب طرفان جاري نوٽيفڪيشن موجب قومي احتساب بيورو ڦُريل ناڻي جي واپسي لاءِ ڪم ڪندڙ سڀ کان وڏو ادارو آهي.03