مودي ٻيهر اقتدار ۾ آيو ته امن ڳالهيون بحال ٿيڻ ۾ اڳڀرائي ٿيندي، ڪشمير مسئلو حل ڪرڻو پوندو: وزيراعظم

اسلام آباد(م ڊ) وزيراعظم عمران خان چيو آهي ته پاڪستان ۽ ڀارت جي وچ ۾ صرف ڪشمير مسئلو تڪرار بڻيل آهي جنهن جو حل ڳالهين ذريعي ئي نڪري سگهي ٿو. برطانوي ٽي وي چينل کي انٽرويو ڏيندي وزيراعظم عمران خان چيو ته ڪشمير مسئلي کي حل ڪرڻو پوندو. هي مسئلو جيئن دير ٿيندي تيئن وڌندو ويندو. تڪراري علائقي ڪشمير ۾ امن ٻنهي پاڙيسري ملڪن لاءِ فائديمند آهي. پاڪستان ۽ ڀارت وچ ۾ ڳالهين ذريعي مسئلا حل ٿي سگهن ٿا. وزيراعظم عمران خان چيو ته ڪشمير ۾ جيڪو ڪجهه ٿي رهيو آهي اهو اتان جي ماڻهن جو رد عمل آهي. جيڪڏهن اسان ڪشمير جي مسئلي کي حل ڪري وياسين ته ان مان گهڻائي فائدا حاصل ڪري سگهون ٿا. هن چيو ته ڀارت ۽ پاڪستان جي حڪومتن جي پهرين ترجيح غربت ۾ گهٽتائي آڻڻ آهي ۽ غربت ۾ گهٽتائي آڻڻ جو حل اهو آهي ته اسان پنهنجي تڪرارن کي ڳالهين ذريعي حل ڪريون. هڪ سوال جي جواب ۾ وزيراعظم چيو ته پاڪستان تي ڀارت ٻئي ڀيري حملو ڪري ها ته اسان وٽ جواب ڏيڻ کان سواءِ ٻيو ڪو به آپشن موجود نه هو. هڪ سوال جي جواب ۾ عمران خان چيو ته پابندي مڙهيل تنظيمن جيش محمد ۽ ان جهڙين ٻين پارٽين کي ڪنٽرول ڪرڻ لاءِ ڪارروايون هلي رهيون آهن ۽ حڪومت طرفان جيش محمد جي مدرسن تي به ڪنٽرول ڪيو ويو آهي. پاڪستان جي مستقبل لاءِ حڪومت انهن پارٽين جي خلاف ڪارروايون ڪرڻ لاءِ پرعزم آهي. وزيراعظم آسيه بي بي معاملي بابت پڇيل سوال جي جواب ۾ چيو ته آسيه بي بي خيريت سان آهي ۽ اها ڪجهه هفتن ۾ پاڪستان ڇڏي ويندي، ان حوالي سان ٿورو مونجهارو آهي ۽ مان ميڊيا سان ان باري ۾ ڳالهه ٻولهه نٿو ڪري سگهان، پر يقين ڏياريان ٿو ته آسيا بيبي محفوظ آهي. هن چيو ته جيڪڏهن ڀارت جي چونڊن ۾ مودي ٻيهر ڪامياب ٿئي ٿو ته امن ڳالهيون بحال ٿيڻ جا بهتر موقعا پيدا ٿيندا، جيڪڏهن ڪانگريس چونڊن ۾ ڪامياب ٿئي ٿي ته شايد اها پاڪستان سان ڪشمير مسئلي جي حل ۾ ٿوري مونجهاري جو شڪار ٿئي، ڇاڪاڻ ته انهن کي ساڄي ڌر جي پارٽين جي رد عمل جو ڊپ هوندو. سندس چوڻ هو ته ڪڏهن به نه سوچو هو ته اهڙي صورتحال ڏسندا، جيڪا ڀارت ۾ جاري آهي، جتي مسلمانن تي حملا ڪيا پيا وڃن. ڀارت جا مسلمان ڪڏهن اتي تمام گهڻو خوش هئا پر ڪيترن ئي سالن کان اهي هندو انتهاپسند قومپرستن جي ڪري سخت پريشان آهن. وزيراعظم چيو ته نريندر مودي به اسرائيلي وزيراعظم جيان خوف ۽ قومپرست جذبن جي بنياد تي اليڪشن وڙهي رهيو آهي، ڪشمير مسئلي کي ائين ئي نٿو ڇڏي سگهجي، ڪشمير مسئلو حل ڪرڻو پوندو.