ٿرڪول ملڪي تاريخ جو بهترين منصوبو آهي، جيڪو لوڊشيڊنگ جو خاتمو ڪري ڇڏيندو: وڏو وزير

ڪراچي(اسٽاف رپورٽر) وڏي وزير سيد مراد علي شاهه ٿرڪول پاور پلانٽ جي 10 اپريل تي ٿيل افتتاح جي مڪمل تياري جي حوالي سان وزيراعليٰ هائوس ۾ هڪ اهم اجلاس جي صدارت ڪئي. اجلاس ۾ صوبائي وزير توانائي امتياز شيخ، وڏي وزير جي سڌ سماءَ واري صلاحڪار مرتضيٰ وهاب، چيئرمين پي اينڊ ڊي محمد وسيم، وڏي وزير جي پرنسپل سيڪريٽري ساجد جمال ابڙو، سيڪريٽري فنانس نجم شاهه، سيڪريٽري توانائي مصدق خان، سي اي او ايس اي سي ايم سي عبدالفضل ۽ ٻين لاڳاپيل آفيسرن شرڪت ڪئي. وڏي وزير چيو ته ٿرڪول مان بجلي جي پيداوار ملڪي ترقي ۾ پهريون اهم ۽ وڏو قدم آهي ۽ اسان کي پورو يقين آهي ته ان منصوبي جي ڪري لوڊشيڊنگ جو خاتمو ٿي ويندو.  هن چيو ته ٿرڪول انرجي پراجيڪٽ ملڪي تاريخ جو بهترين منصوبو آهي، جنهن سان سڄي ملڪ کي فائدو ٿيندو ۽ ان جا مثبت اثر پوندا. وڏي وزير چيو ته اسان ڪول مائننگ سان متاثرن جي بحالي لاءِ جيڪي قدم کنيا آهن اهي مثالي آهن ۽ ان جو مثال پاڪستاني تاريخ ۾ نٿو ملي. مراد علي شاهه چيو ته متاثرن لاءِ سٺا گهر، سندن ٻارن کي بهترين تعليم، سٺي صحت جي سهولت ۽ پراجيڪٽ ۾ حصيداري، اهي تمام سٺا قدم آهن، جيڪي اسان ٿر جي عوام لاءِ کنيا آهن. هن چيو ته ٿر فائونڊيشن ٿر جي عوام جي ڀلائي لاءِ ڀرپور ڪم ڪندي ۽ اهو منصوبو سنڌ حڪومت ۽ اينگرو جي پبلڪ پرائيويٽ پارٽنر شپ جو زبردست مثال آهي. وڏي وزير مراد علي شاهه محترمه بينظير ڀٽو جي خواب جي تعبير تي پوري قوم کي واڌايون ڏنيون ۽ ان موقعي تي ٿرڪول پاور پراجيڪٽ فيز ٽو شروع ڪرڻ جي هدايت پڻ جاري ڪري ڇڏي.