حڪمرانن کي گهر ڀيڙو ڪرڻ جو وقت اچي ويو آهي، 18هين ترميم کي ختم ڪيو ويو ته هڪ لت سان حڪومت ختم ڪري ڇڏينداسين:آصف/بلاول

لاڙڪاڻو/نئون ديرو(بيورو+ن هه) اڳوڻي صدر آصف علي زرداري ۽ پ پ چيئرمين بلاول ڀٽو زرداري چيو آهي ته ليمڪ کائيندڙ گڏو وزيراعظم چوي چيپ ته کيس سنڌ جي ضرورت ناهي، هن کي صوبي جا وسيلا گهرجن. ڳڙهي خدا بخش ڀٽو ۾ شهيد ذوالفقار علي ڀٽو جي ورسي جي جلسي کي خطاب ڪندي پ پ چيئرمين بلاول ڀٽو زرداري چيو ته سياسي انجنيئرنگ سان بي نامي وزيراعظم کي مسلط ڪرڻ ڇا انساني حقن جي ڀڃڪڙي ناهي،  18هين ترميم کي ختم ڪيو ويو ته هڪ لت سان حڪومت ختم ڪري ڇڏينداسين. هن چيو ته شهيد ڀٽو جي آئين کي ختم ڪرڻ جي سازش ڪامياب ٿيڻ نه ڏينداسين، اسان ملڪ کي ون يونٽ بڻجڻ نه ڏينداسين، هي سمجهن ٿا ته شهيد بي بي جو پٽ ڊڄي ويندو، هي احتساب نه پر سياسي انجنيئرنگ ۽ انتقام آهي، سنڌ جا ڪيس پنڊي ڇو منتقل ڪيا ويا؟ ڌانڌلي ۽ سياسي انجنيئرنگ سان بي نامي وزيراعظم کي مسلط ڪرڻ جي آءِ ٽي ڪڏهن ٺهندي. سندس چوڻ هو ته ڇا شهيد ڀٽو جو قتل ڪيس سست روي جو شڪار ناهي؟ جعلي اڪائونٽن بابت اسان تي ڪوڙا الزام آهن، خان صاحب سنڌ جو عوام چوي ٿو ته هاڻي اوهان جي وڌيڪ ضرورت ناهي، هي ڪهڙو وزيراعظم آهي جو مودي ۽ ڪالعدم تنظيمن خلاف ڳالهائي نٿو، انڪم سپورٽ پروگرام مان بينظير ڀٽو جو نالو خارج ڪرڻ جي سازش ٿي رهي آهي. پ پ چيئرمين چيو ته ڇا مشرف، شهيد اڪبر بگٽي، گم ٿيل ماڻهن ۽ اصغر خان ڪيس سست روي جو شڪار ناهن؟ اسان کي اميد آهي ته عدالتن مان انصاف ملندو، وزيراعظم صرف اپوزيشن لاءِ شير بڻيل آهي، اهي اڄ به شهيد ذوالفقار علي ڀٽو جي نظرئي کان ڊڄن ٿا، احتساب جي نالي تي سياسي انجنيئرنگ ٿي رهي آهي. بلاول ڀٽو زرداري وڌيڪ چيو ته حڪومت کي اصل چهرو ڏيکارڻ تي اسان جي مٿان نيب جي تلوار لٽڪائي وئي، رڳو ڀٽن کي ڇو قتل ڪيو وڃي ٿو. هن چيو ته اڄ جي ڏهاڙي عوام جي اميدون جو قتل ٿيو، آئين ڏيندڙ جو قتل ڪيو ويو. هن چيو ته جنهن ٽٽل ملڪ کي جوڙيو، هارايل قوم کي پيرن تي بيهاريو، جنگي قيدي واپس آندا، ملڪ کي ايٽمي طاقت بڻايو، کيس ڇو قتل ڪيو ويو؟. بلاول چيو ته آصف علي زرداري 8 سال اڳ عدالت ۾ درخواست ڏني ته ڀٽو جي رت جو جواب ڏنو وڃي، ڀٽو ڇو قتل ٿيندا رهيا، سندن رت جو حساب ڪير ڏيندو؟، پ پ لاءِ انصاف جي تارازو جو توازن ڇو خراب ٿي ويندو آهي. ان موقعي تي جلسي کي خطاب ڪندي اڳوڻي صدر آصف علي زرداري حڪومت کي گهر ڀيڙو ڪرڻ جلد ڪارڪنن کي تيار رهڻ جي هدايت ڪري ڇڏي. آصف علي زرداري چيو ته ڀٽو جي سوچ اڄ به زنده آهي، لڳي پيو ته اڄ ئي کيس مٽيءَ ماءُ حوالي ڪيو هجي. هن چيو ته چونڊن وقت ئي چيو هو ته 18هين ترميم جي خاتمي لاءِ مٿس ڪيس ڪيا ويا، سندس ڳالهه کي نه مڃيو ويو. آصف علي زرداري چيو ته عمران خان مهانگائي ڪري عوام کي 50 سال پوئتي ڪري ڇڏيو آهي. سندس چوڻ هو ته عام واهپي جون شيون ٻيڻيون مهانگيون ٿي ويون آهن، اهڙي صورتحال ۾ غريب زنده نه رهي سگهندو، پر حڪمرانن کي احساس ناهي. هن چيو ته ڪارڪن ۽ جيالا تيار ٿي وڃن، حڪمرانن کي گهر ڀيڙو ڪرڻ جو وقت اچي ويو آهي. اڳوڻي صدر آصف علي زرداري چيو ته عوام ساڻن گڏ آهي، هو حڪمرانن کي ٻاهر ڪڍي ساهه کڻندا. سندس چوڻ هو ته عوام صبر ڪري جلد حڪمرانن کي ڪڍڻ لاءِ تحريڪ جو اعلان ڪيو ويندو. آصف علي زرداري چيو ته حڪمران چون پيا ته پئسا ناهن، ملڪ لاءِ جهاد ڪيو ويندو، حڪمرانن کي ايوانن مان ڪڍڻ لاءِ اسلام آباد جو رخ ڪيو ويندو. اڳوڻي صدر آصف علي زرداري چيو ته حڪمرانن کي نه روڪيو ويو ته اهي ملڪ کي سئو سال پوئتي ڌڪي ڇڏيندا.