اسلام آباد کي وفاقي راڄڌاني بڻائڻ وارو مقصد ختم ٿي ويو، لاهور ۽ ڪراچي کان به خراب حالت آهي: سپريم ڪورٽ

اسلام آباد(بيورو) سپريم ڪورٽ جي جسٽس گلزار احمد بني گالا حددخلين بابت ڪيس ۾ چيئرمين سي ڊي اي تي سخت ڪاوڙ جو اظهار ڪندي چيو ته اسلام آباد کي راڄڌاني وارو شهر ٺاهڻ وارو مقصد ختم ٿي ويو آهي. هتي نديون، نالا، گندگي جو ڍير بڻجي ويا آهن. اوهان جي ڪارڪردگي مايوس ڪن آهي. بهتر آهي ته اوهان ٻئي هنڌ هليا وڃو. جسٽس گلزار احمد جي سربراهي ۾ 2 رڪني بينچ بني گالا حددخلين متعلق ٻڌڻي ٿي. ان دوران عدالت عظميٰ ڪيپيٽل ڊولپمينٽ اٿارٽي(سي ڊي اي) جي چيئرمين کي گهرائي ورتو. ان سان گڏ جسٽس گلزار احمد چيو ته ڇا سي ڊي اي عامر علي احمد کي عدالت کي جاڳائڻو آهي. سي ڊي اي پنهنجو ڪم ڇو نٿي ڪري. عدالت حڪم ڪري رهي آهي پر سي ڊي اي ان تي عمل نٿي ڪري. ان دوران ٻڌڻي ۾ ڪجهه دير لاءِ وقفو ڪيو ويو. جنهن کان پوءِ جڏهن ٻڌڻي جي شروعات ٿي ته چيئرمين سي ڊي اي عدالت ۾ پيش ٿيو. جنهن تي جسٽس گلزار احمد پڇيو ته ڇا اوهان  ٻڌائيندو ته عدالت جي حڪم تي ڪيترو عمل ٿيو آهي.؟ جنهن تي چيئرمين جواب ڏنو ته مڪمل طور تي عدالتي حڪم تي عمل ناهي ٿي سگهيو. سي ڊي اي چيئرمين جي جواب تي جسٽس گلزار احمد سخت ڪاوڙ جو اطهار ڪندي چيو ته جيڪڏهن اوهان ان قابل نه آهيو ته هتي ويٺا ڇو آهيو.؟ هيستائين اوهان ڪيو ڇا آهي.؟ اکيون بند ڪريو ويٺا آهيو..؟ ڇا اوهان  پوري اسلام آباد کي ڪچي آبادي ٺاهڻ چاهيو ٿا. جسٽس گلزار احمد  چيو ته اسان کي هڪ ٽائيم ٻڌايو ته ڪيستائين عمل مڪمل ٿيندو جنهن تي چيئرمين سي ڊي اي چيو ته هڪ مهيني جي اندر منصوبي جون سموريون رڪاوٽون هٽايون وينديون. جنهن تي جسٽس گلزار چيو ته هڪ مهيني اندر اهو ممڪن آهي.؟ جنهن تي چيئرمين سي ڊي اي چيو ته عدالت هڪ مهيني جي مهلت ڏيو هڪ مهيني ۾ ڪارڪردگي ڏيکارينداسين. ان کان پوءِ عدالت چيئرمين سي ڊي اي کي هڪ  مهيني جي مهلت ڏئي ٻڌڻي هڪ مهيني لاءِ ملتوي ڪري ڇڏي.