جعلي اڪائونٽس ڪيس ۾ عبدالغني مجيد ۽ ٻين خلاف پهريون ريفرنس داخل ڪرڻ جي منظوري

اسلام آباد (بيورو) نيب جي ايگزيڪٽو بورڊ مبينا جعلي اڪائونٽن واري ڪيس ۾ پهريون ريفرنس داخل ڪرڻ جي منظور ڏئي ڇڏي جيڪو اومني گروپ جي چيف ايگزيڪٽو عبدالغني مجيد ۽ ٻين خلاف آهي. نيب جي پڌرنامي موجب قومي احتساب بيورو جي نيب چيئرمين جسٽس ( ر ) جاويد اقبال جي صدارت هيٺ نيب هيڊ ڪوارٽر اسلام آباد ۾ ايگزيڪٽو بورڊ جو اجلاس ٿيو جنهن ۾ ڪرپشن جا 6 ريفرنس داخل ڪرڻ جي منظور ڏني وئي جنهن ۾ هڪ ريفرنس ميبنا جعلي اڪائونٽن بابت آهي. نيب جي پريس ريليز ۾ ٻڌايو ويو آهي ته ايگزيڪٽو بورڊ مبينا جعلي اڪائونٽن واري ڪيس ۾ اومني گروپ آف ڪمپنيز جي چيف ايگزيڪٽو عبدالغني مجيد ۽ ٻين خلاف بدعنواني جو ريفرنس داخل ڪرڻ جي منظوري ڏني آهي. عبدالغني مجيد اومني گروپ جي سربراهه انور مجيد جو پٽ آهي جيڪو ايف آءِ اي جي تحويل ۾ آهي. جوابدار تي مبينا جعلي اڪائونٽ ۽ غيرقانوني طور تي 7 ايڪڙ سرڪاري زمين کي ريگولرائز ڪرائڻ جو الزام آهي جنهن سان قومي ناڻي کي 1.422 ارب رپين جو نقصان پهتو. پريس پڌرائي موجب ايگزيڪٽو بورڊ اڳوڻي سيڪريٽري ورڪرز ويلفيئر فنڊ افتخار رحيم خان ۽ ٻين خلاف بدعنواني جو ريفرنس داخل ڪرڻ جي منظور ڏني، جوابدارن تي مبينا طور ڪرپشن ۽ فنڊن ۾ گهوٻين جو الزام آهي جنهن سان قومي ناڻي کي اٽڪل 466 ملين رپين جو نقصان پهتو. بروڊ اڳوڻي ڊائريڪٽر اربن پلاننگ، سي ڊي اي غلام سنڌو ۽ ٻين خلاف به ڪرپشن جو ريفرنس داخل ڪرڻ جي منظوري ڏني، جوابدارن مبينا طور بدعنواني ۽ اختيارن جو ناجائز اسپتل ڪندي ڊپلوميٽڪ انڪليوز ۾ شٽل بس سورس لاءِ 4.5 ايڪڙ زمين الاٽ ڪرڻ جو الزام آهي جنهن سان قومي ناڻي کي 408.32 ملين رپين جو نقصان ٿيو. پڌرنامي ۾ وڌيڪ ٻڌايو ويو آهي بورڊ اڳوڻي ايڊمنسٽريٽر ڪراچي ميٽروپوليٽن ڪارپوريشن ( ڪي ايم سي ) محمد حسين سيد ۽ ٻين خلاف ڪرپشن جو ريفرنس داخل ڪرڻ جي منظور ڏني. جوابدارن تي مبينا طور اختيارن جو ناجائز استعمال ڪندي فلاحي مقصد لاءِ مخصوص پلاٽ غيرقانوني طور الاٽ ڪرڻ جو الزام آهي جنهن سان قومي ناڻي کي وڏو نقصان پهتو. ايگزيڪٽو بورڊ جي اڳوڻي سيڪريٽري اسپيشل انشيٽو ڊيپارٽمنٽ سنڌ اعجاز احمد خان ۽ ٻين خلاف به ڪرپشن جو ريفرنس داخل ڪرڻ جي منظوري ڏني، جوابدارن تي مبينا طور غيرقانوين طور اختيارن جو ناجائز اسپتال ڪندي من پسند ماڻهن کي پاڻي سپلائي اسڪيمن جو ٺيڪو ڏيڻ جو الزام آهي جنهن سان قومي ناڻي کي 29.25 ملين رپين جو نقصان پهتو. بورڊ علي گوهر ڏاهري ۽ ٻين خلاف به ڪرپشن جو ريفرنس داخل ڪرڻ جي منظور ڏني، جوابدارن تي مبينا طور تي اختيارن جو ناجائز استعمال ڪرڻ ۽ غيرقانوني ڀرتين جو الزام آهي جنهن سان قومي ناڻي کي اٽڪل 74.85 ملين رپين جو نقصان پهتو. ٻئي طرف جعلي اڪائونٽس ڪيس ۾ اهم اڳڀرائي ٿي آهي، قومي احتساب بيورو راولپنڊي ٽي ريفرنس تيار ڪري ورتا آهن جن ۾ اڳوڻو صدر آصف زرداري سڌو سنئون جوابدار نامزد ناهي. ذريعن موجب نيب راولپنڊي جعلي اڪائونٽس ڪيس بابت 3 ريفرنسز تيار ڪري هيڊڪوارٽر موڪلي ڇڏيا. ذريعن جو چوڻ آهي ته ٽنهي ريفرنسز ۾ نجم زمان، علي ميمڻ ۽ ٻيا جوابدار فهرست ۾ شامل آهن ۽ سمورا جوابدار پهريان کان نيب جي تحويل ۾ آهن. ذريعن موجب نيب ريفرنسز ۾ نامزد ماڻهو اڳوڻي صدر آصف زرداري جا ويجها ساٿي سمجهيا ويندا آهن جڏهن ته آصف زرداري ريفرنسز ۾ سڌو سئون جوابدار ناهي.