ڪراچي ۾ ٻيهر ٽارگيٽ ڪلنگ، مذهبي اڳواڻ مولانا تقي عثماني تي قاتلاڻو حملو، 2 محافظ مارجي ويا

ڪراچي/گلشن اقبال(اسٽاف رپورٽر+ن هه) ڪراچي ۾ ٻيهر ٽارگيٽ ڪلنگ، مذهبي اڳواڻ مولانا تقي عثماني تي قاتلاڻو حملو، 2 محافظ مارجي ويا. تفصيل موجب نيپا چورنگي وٽ ٻن موٽرسائيڪلن تي سوار 4 هٿياربندن ٻن گاڏين کي نشانو بڻائيندي ڇتي فائرنگ ڪري ڏني، مولانا تقي عثماني ۽ سندس گهرڀاتي محفوظ رهيا، گوليون لڳڻ سبب مولانا تقي عثماني جو محافظ محمد فاروق ۽ هڪ خانگي محافظ صنوبر خان مارجي ويا، عامر شهاب سخت زخمي ٿي پيو، هٿياربند فرار ٿيڻ ۾ ڪامياب ٿي ويا. امدادي ٽيمن واقعي واري هنڌ پهچي مارجي ويلن جا لاش ۽ زخمين کي اسپتال منتقل ڪيو، پوليس ۽ رينجرز علائقي کي ڪڙو چاڙهي ڇڏيو، سي سي ٽي وي فوٽيجن جي مدد سان جاچ شروع شروع ڪري ڇڏي. ايڊيشنل آءِ جي امير شيخ جو چوڻ آهي ته واقعو فرقيواراڻي سازش نه پيو لڳي پر ڪراچي جو امن تباهه ڪرڻ جي ڪوشش آهي، حملي ۾ مولانا تقي عثماني محفوظ رهيو، 2 محافظ مارجي ويا. ٻئي طرف هڪ بيان ۾ مفتي تقي عثماني حملي جا تفصيل ٻڌائيندي چيو ته حملي آور پهريان اڳيان آيا ۽ پوءِ پٺيان اچي فائرنگ ڪري ڏني. هن چيو ته ڪجهه اندازو ئي نه ٿيو ته ٿي ڇا رهيو آهي، ائين محسوس ٿي رهيو هو جيئن گولين جو مينهن وسي رهيو هجي. هوڏانهن وزيراعظم عمران خان واقعي جي مذمت ڪندي مولانا تقي عثماني جي سيڪيورٽي گارڊ جي مارجڻ تي ڏک جو اظهار ڪيو. وزيراعظم چيو ته مفتي تقي عثماني جهڙي قدر جوڳي شخصيت تي حملو سازش آهي ۽ ان سازش کي وائکو ڪرڻ لاءِ هر ممڪن ڪوشش ڪئي وڃي.  ٻئي طرف اڳوڻي صدر آصف علي زرداري واقعي جي مذمت ڪندي چيو ته پي ايس ايل جي ڪاميابي کان ڪراچي جا دشمن ساڙ ۾ سڙي ويا آهن ۽ شهر جو امن خراب ڪندڙن کي سختيءَ سان چيڀاٽيو وڃي. هن چيو ته الله جو شڪر آهي ته مفتي تقي عثماني محفوظ رهيو پر دهشتگردن ۽ انهن جي سهولتڪارن کي پڪڙيو وڃي ۽ ڪراچي جو امن خراب ڪرڻ جي سازش ڪندڙن کي قانون جي پڪڙ ۾ آندو وڃي.  هوڏانهن سنڌ جي وڏي وزير سيد مراد علي شاهه واقعي جو نوٽيس وٺندي ملوث جوابدار ترت گرفتار ڪرڻ جو حڪم ڏئي ڇڏيو آهي. سيد مراد علي شاهه چيو آهي ته واقعو ٽارگيٽ ڪلنگ هجي يا ڪا ٻي ڪارروائي، جوابدار جلد کان جلد گرفتار ڪيا وڃن. ٻئي طرف فنڪشنل ليگ سنڌ جي جنرل سيڪريٽري سردار رحيم به مولانا تقي عثماني تي حملي جي مذمت ڪئي.