والاريل ڪشمير جون حالتون انتهائي خراب آهن، ڳالهيون ٿيڻ گهرجن: جرمن پرڏيهي وزير

اسلام آباد(بيورو) جرمنيءَ جي پرڏيهي وزير هائيڪو ماس  پاڪستاني هم منصب شاهه محمود قريشي سان ملاقات ڪئي آهي. ملاقات دوران ٻن طرفن لاڳاپن، خطي ۾ امن امان جي صورتحال ۽ افغانستان ۾ امن قائم ڪرڻ سميتمختلف معاملن تي ڳالهيون ڪيون ويون. پرڏيهي وزير شاهه محمود قريشي جرمن هم منصب سان گڏ پريس ڪانفرنس ڪندي پلواما حملي کانپوءِ ڀارت طرفان مداخلت توڙي خطي ۾ امن امان جي ڇڪتاڻ جي صورتحال کان آگاهه ڪيو. شاهه محمود قريشي چيو ته پاڪستان خطي ۾ امن جو خواهشمند آهي، اهو ئي سبب آهي ته ڀارتي اڳرائي باوجود وزيراعظم عمران خان خير سگالي جي جذبي تحت ڀارتي پائليٽ کي انڊيا حوالي ڪيو. هن چيو ته دهشتگردي خلاف ويڙهه علائقائي ۽ عالمي مسئلو آهي، دهشتگردن پشاور ۾ آرمي پبلڪ اسڪول تي حملو ڪيو، دهشتگردي جي خاتمي لاءِ نيشنل ايڪشن پلان تي عملدرآمد ڪري رهيا آهيون. ڪشمير مسئلي تي ڳالهائيندي شاهه محمود قريشي جو چوڻ هو ته والاريل ڪشمير ۾ انساني حقن جون سنگين ڀڃڪڙيون ٿي رهيون آهن، ڪشمير مسئلي جي حل لاءِ ڳالهيون اڻٽر آهن، مسئلي تي عالمي برادري ۽ گڏيل قومن کي نوٽيس وٺڻ گهرجي. جرمني جي پرڏيهي وزير طرفان ٻنهي ملڪن کي پنهنجا معاملا ڳالهين ذريعي حل ڪرڻ تي زور ڀريو ويو. هائيڪو ماس چيو ته اسان افغانستان ۾ امن قائم ڪرڻ لاءِ پاڪستان جي خدمتن کي قدر جي نظر سان ڏسون ٿا. ٻنهي پرڏيهي وزيرن ۾ واپار، اقتصادي ۽ ثقافتي سهڪار ۽ سيڙپڪاري کي هٿي ڏيڻ تي اتفاق ڪيو.  جرمني پرڏيهي وزير چيو ته پاڪستان سان سٺا لاڳاپا آهن، افغان امن عمل ۾ پاڪستان جي ڪردار کي ساراهيون ٿا، پاڪستان سان واپار سميت ٻين شعبن ۾ سهڪار کي اڳيان وڌائينداسين، پاڪستان ۾ سيڙپڪاري جا بهترين موقعا موجود آهن. ٻئي طرف وزيراعظم عمران خان سان جرمن پرڏيهي وزير هائيڪوماس ملاقات ڪئي آهي، جنهن ۾ اهم معاملن تي خيالن جي ڏي وٺ ڪئي وئي آهي. وزيراعظم هائوس ۾ ٿيندڙ ملاقات دوران ٻنهي اڳواڻن وچ ۾ پاڪ_جرمن لاڳاپن ۽ خطي جي سلامتي صورتحال تي ڳالهيون ٿيون. ذريعن مطابق پاڪ_ڀارت هاڻوڪي ڇڪتاڻ ۽ پاڪستان پاران ڪيل امن وارن قدمن تي وزيراعظم عمران خان ۽ جرمن پرڏيهي وزير وچ ۾ ڳالهه ٻولهه پڻ ٿي.