نيشنل ايڪشن پلان تي عملدرآمد لاءِ پارلياماني ڪميٽي جوڙڻ جو فيصلو، پهرين قومي ٽيرف پاليسي جي منظوري

اسلام آباد(بيورو) وزيراعظم عمران خان جي صدارت هيٺ ٿيندڙ وفاقي ڪابينا جي اجلاس ۾ ڪابينا پهرين قومي ٽيرف پاليسي جي منظوري ڏئي ڇڏي، جڏهن ته اقتصادي رابطا ڪميٽي جي اجلاس جي به منظوري ڏني وئي. وزيراعظم عمران خان جي صدارت هيٺ ٿيندڙ وفاقي ڪابينا جي اجلاس ۾ ڪابينا کي پاڪ_ڀارت ڇڪتاڻ واري صورتحال تي پاڪستان جي امن واري قدمن بابت آگاهه  ڪيو ويو. ذريعن مطابق وفاقي ڪابينا پهرين قومي ٽيرف پاليسي جي منظوري ڏئي ڇڏي آهي، ان کانسواءِ ڪابينا 26 فيبروري تي ٿيندڙ اي سي سي اجلاس جي فيصلن جي به منظوري ڏني آهي. ذريعن مطابق پي او ايف بورڊ، هيوي انڊسٽريز ٽيڪسلا جي بورڊ ۾ الڳ الڳ ميمبر پروڊڪشن ڪوآرڊينيشن جي مقرري جي به منظوري ڏني وئي، ان کانسواءِ پبلڪ سيڪٽر انٽر پرائزز ۾ چيف ايگزيڪيوٽو جي چونڊ جي طريقيڪار جي به منظوري ڏني وئي آهي. اجلاس ۾ نيشنل ايڪشن پلان تي عملدرآمد لاءِ پارلياماني رڳواڻن تي ٻڌل ڪميٽي جوڙڻ جي پڻ منظوري ڏني وئي. اجلاس دوران ڳالهائيندي وزيراعظم عمران خان چيو ته پابندي مڙهيل تنظيمن خلاف ڪارروائي ملڪي مفاد ۾ آهي، خطي ۾ ڇڪتاڻ ڪنهن به ملڪ جي مفاد ۾ ناهي. هن چيو ته پاڪستان اڳ به امن چاهيندو هو، هاڻي به امن جو خواهشمند آهي، ڀارتي اڳرائي جو جواب ڏيڻ مجبوري هئي. هن چيو ته خطي جو مستقبل امن سان واڳيل آهي، خطي ۾ ڇڪتاڻ ڪنهن به ملڪ جي مفاد ۾ ناهي. وزيراعظم چيو ته پاڪ_ڀارت ڇڪتاڻ جي مڪمل خاتمي لاءِ ڪوششون جاري آهن، جڏهن ته عالمي برادري پاڪستان جي موقف کي سمجهي رهي آهي، هن چيو ته اسان جا ڪنهن به ملڪ خلاف جارحاڻي عزم ناهن، اسان رڳي پنهنجو دفاع ڪيو، جڏهن ته اسان جي فوج هر صورتحال کي منهن ڏيڻ جي صلاحيت رکي ٿي. وفاقي ڪابينا جي اجلاس کانپوءِ ميڊيا کي بريفنگ ڏيندي سڌ سماءَ واري وفاقي وزير فواد چوڌري چيو ته پارلياماني اڳواڻن جي ڪميٽي جي سربراهي وزيراعظم يا پرڏيهي وزير ڪندو. هن چيو ته وفاقي ڪابينا موجوده صورتحال ۾ ملڪ ۾ اتفاق راءِ قائم رکڻ تي اتفاق ڪيو آهي، جڏهن ته معيشت جي استحڪام لاءِ پڻ ملڪ ۾ اتفاق راءِ آهي. هن چيو ته نيشنل ايڪشن پلان تي مڪمل عمل ڪيو پيو وڃي ۽ ان سلسلي ۾ فاٽا جو خيبرپختونخواهه ۾ انضمام تمام وڏو قدم هو. سندس چوڻ هو ته عالمي ميڊيا ۾ پڻ پاڪستان جي قدمن کي ساراهيو ويو، سڄي دنيا اهائي ڳالهه ڪري رهي آهي، جيڪا پاڪستان چئي رهيو آهي، سڄي دنيا نريندر مودي جي موقف کي تسليم نه ڪيو، جڏهن ته پاڪستان جي موقف کي عالمي سطح تي پذيرائي ملي. وفاقي وزير چيو ته پابندي مڙهيل تنظيمن بابت حڪمت عملي اپوزيشن پارٽين سان گڏجي طئه ڪئي ۽ وفاقي ڪابينا قومي سلامتي جي معاملي تي سمورين مخالف ڌر پارٽين کي گڏ کڻي هلڻ جو عزم ڪيو آهي. فواد چوڌري چيو ته طئه ٿيو ته پاڪستان جي سرزمين ڪنهن به ملڪ جي خلاف استعمال نه ٿيندي، نيب هڪ آزاد ادارو آهي ۽ نيب جا آفيسر اسان مقرر ناهن ڪيا، نيب جي ڪاررواين ۾ حڪومت جو ڪو به عمل دخل ناهي. هن چيو ته وزيراعظم پنجاب حڪومت کي چيو آهي ته نواز شريف کي علاج جون بهترين سهولتون فراهم ڪيون وڃن ۽ سندس علاج جي معاملي تي انتقامي ڪارروائي جو تاثر نه اچڻ گهرجي، پاڪستان ۾ علاج جون بهترين سهولتون موجود آهن، نواز شريف جتي چاهي پنهنجو علاج ڪرائي.