وفاقي سرڪار پي آءِ اي ۽ اسٽيل مل سميت 48 ادارن کي خانگائڻ جو فيصلو ڪري ڇڏيو

2Shares

اسلام آباد (بيورو) وفاقي حڪومت 5 سالن ۾ پي آءِ اي ۽ اسٽيل مل سميت 48 ادارن کي خانگائڻ جو فيصلو ڪري ڇڏيو.  قومي اسمبلي جي نجڪاري بابت اسٽينڊنگ ڪميٽي جو اجلاس سيد مصطفيٰ محمود جي صدارت هيٺ ٿيو جنهن ۾ نجڪاري ڪميشن جي سيڪريٽري رضوان ملڪ ڪميٽي کي نجڪاري پروگرام تي بريفنگ ڏني. نجڪاري ڪميشن سيڪريٽري ڪميٽي اڳيان پي ٽي آءِ حڪومت جو نجڪاري پروگرام پيش ڪيو جنهن تحت حڪومت پنجن سالن ۾ 48 ادارن جي خانگائڻ جو فيصلو ڪيو آهي. نجڪاري ڪميشن سيڪريٽري ٻڌايو ته هڪ کان ڏيڍ سالن دوران ست ادارا وڪرو ڪيا ويندا ، ايل اين جي جا پاور پلانٽ پهرين مرحلي ۾ وڪرو ڪيا ويندا، حويلي بهادر شاهه ۽ بلوڪي پاور پلانٽن جي به نجڪاري ڪئي ويندي. رضوان ملڪ بريفنگ ۾ ٻڌايو ته وومين بئنڪ، ايس ايم اي بئنڪ، جناح ڪنونشن سينٽر، لاهور انٽرنيشنل ايئرپورٽ، ماڙي ۽ لاکڙا جي پهرين مرحلي ۾ نجڪاري ڪئي ويندي جڏهن ته ٻئين مرحلي ۾ 3 کان پنجن سالن ۾ 41 ادارا وڪرو ڪيا ويندا. نجڪاري ڪميشن جي سيڪريٽري چيو ته پاڪستان اسٽيل مل خريدڻ لاءِ 5 کان 6 ڪمپنين سان ڳالهيون هلي رهيون آهن، انهن ڪمپنين جو تعلق چين ۽ روس سان آهي، نوان سيڙپڪار پاڪستان اسٽيل مل جي پيدواري صلاحيت 11 مان وڌائي 35 لک ٽن ساليانو تائين آڻڻ چاهين ٿا، پاڪستان اسٽيل کي پبلڪ پرائيويٽ پاٽنرشپ تي وڪرو ڪيو ويندو، پاڪستان اسٽيل مل جي بند ٿيڻ سان حڪومت کي ماهوار 40 ڪروڙ رپين جو نقصان ٿي رهيو آهي. نجڪاري ڪميشن جي سيڪريٽري موجب ن ليگ جي حڪومت گذريل پنجن سالن ۾ 5 ادارن جي نجڪاري ڪئي، 2013ع کان 2018ع ۾ 5 ادارا 173 ارب رپين ۾ وڪرو ڪيا ويا، پيپلز پارٽي جي 2008ع کان 2013 تائين جي دور ۾ هڪ اداري جي نجڪاري ڪئي وئي، مسلم ليگ ق جي 2002ع کان 2007ع جي دور ۾ 38 ادارن جي نجڪاري ڪئي وئي، ان عرصي دوران 38 ادارن جي نجڪاري 377 ارب رپين ۾ ڪئي وئي. رضوان ملڪ ٻڌايو ته پي آءِ اي ۽ پاڪستان اسٽيل جا نقصان 600 ارب رپين تائين پهچي چڪا آهن، پي آءِ اي جا نقصان 400 ارب رپين تائين آهن جڏهن ته پاڪستان اسٽيل جا نقصان 200 ارب رپين کان ٽپي چڪا آهن. موجودا حالتن ۾ پي آءِ اي کي ڪو به خريد نه ڪندو.03

2Shares

اپنا تبصرہ بھیجیں