پنجاب جو صوبائي وزير فياض چوهاڻ هندن خلاف غيراخلاقي بيان ڏيڻ تي عهدي تان فارغ

3Shares

 لاهور(بيورو) هندو ڪميونٽي بابت غير اخلاقي بيان تي پنجاب جي وڏي وزير طرفان استعيفيٰ گهرڻ کانپوءِ سڌ سماءَ واري وزير فياض الحسن چوهاڻ وزارت تان استعيفيٰ. ڏئي ڇڏي. رپورٽ موجب پنجاب جي وڏي وزير عثمان بوزدار سڌ سماءَ واري وزير فياض الحسن چوهاڻ کي وزيراعليٰ جي ايوان طلب ڪيو جتي ان کان غير ذميواراڻي بيان تي استعيفيٰ گهري. پنجاب جي وڏي وزير جي ترجمان شهباز گل هڪ وڊيو بيان ۾ چيو ته پنجاب جي وڏي وزير فياض چوهاڻ جي بيان کان مڪمل لاتعلقي ۽ ڏک جو اظهار ڪيو آهي. عثمان بوزدار چيو آهي ته تحريڪ انصاف جي حڪومت ڪنهن اهڙي بيان جي اجازت نه ڏيندي جنهن سان رنگ، نسل، مذهب يا ذات جي بنياد تي ڪنهن جا جذبات مجروح ٿين. وڏي وزير جي ترجمان موجب عثمان بوزدار فياض چوهاڻ سان ملاقات ۾ کيس پنهنجي ناراضگي کان آگاهه ڪيو جهن ته ان ملاقات کانپوءِ فياض چوهاڻ وزارت تان استعيفيٰ جو فيصلو ڪيو آهي. ذريعن جو چوڻ آهي ته پنجاب جي وڏي وزير عثمان بوزدار فياض چوهاڻ جي سڌ سماءَ واري وزارت جي قلمدان تان استعيفيٰ کي قبول ڪري ورتو آهي. وزيراعظم عمران خان پنجاب جي سڌ سماءَ واري وزير فياض الحسن چوهاڻ جي اقليتي برادري خلاف تڪراري بيان تي ڪاوڙ جو اظهار ڪيو آهي. صوبائي وزير فياض الحسن چوهاڻ اقليتي برادري خلاف تڪراري بيان تي تنقيد جي ور چڙهي ويو اهي، وزيراعظم جي صلاحڪار نعيم الحق سماجي رابطن واري ويب سائيٽ ٽوئيٽر تي چيو ته اقليتي برادري خلاف توهين جوڳي بيان تي  فياض الحسن چوهاڻ خلاف ڪارروائي ٿيندي، پنجاب جي وڏي وزير عثمان بزدار سان مشاورت کانپوءِ صوبائي وزير خلاف ايڪشن ورتو ويندو. ناڻي واري وفاقي وزير اسد عمر ۽ انساني حقن بابت وزير شيرين مزاري به فياض الحسن چوهاڻ جي بيان جي مذمت ڪئي آهي. ٻئي طرف پنجاب جي سڌ سماءَ واري وزير فياض الحسن چهاڻ جي هندو برادري بابت بيان جي وضاحت ۽ ان جي معذرت سامهون اچي وئي. فياض الحسن چوهاڻ پنهنجي وضاحتي بيان ۾ چيو ته هن پنهنجي خطاب دوران پاڪستان ۾ موجود هندو برادري کي مخاطب نه ڪيو پر سندس مخاطب نريندر مودي، ڀارتي وفج ۽ انڊين ميڊيا هئي. پنجاب جي سڌ سماءَ واري وزير چيو ته سندس ريمارڪس سان پاڪستان ۾ موجود هندو برادري جي دل آزاري ٿي ته هو ان لاءِ معذرت خواهه آهي. هن چيو ته منهنجي بيان قطعي طور تي پاڪستان هندو ڪميونٽي خلاف نه هو، جيڪو به منهنجي وطن طرف ميري اک سان ڏسندو ان جو منهن ٽوڙ جواب ڏيندس. فياض الحسن چوهاڻ چيو ته منهنجي رت جو آخري ڦڙو به وطن لاءِ حاضر آهي.03

3Shares

اپنا تبصرہ بھیجیں