ميگا مني لانڊرنگ ڪيس: آصف زرداري، فريال ٽالپر ۽ ٻين جي ضمانت ۾ 11 مارچ تائين واڌ

ڪراچي(اسٽاف رپورٽر) ميگا مني لانڊرنگ ڪيس ۾ عدالت اڳوڻي صدر آصف علي زرداري سميت 11 جوابدارن جي وقتي ضمانت ۾ 11 مارچ تائين واڌ ڪري ڇڏي. ڪراچي جي بينڪنگ ڪورٽ ۾ ميگا مني لانڊرنگ ڪيس جي ٻڌڻي ٿي ته آصف علي زرداري عدالت ۾ پيش نه ٿيو. آصف زرداري ۽ فريال ٽالپر جي گرفتاري کان اڳ ضمانت جو مدو اڄ ختم ٿي رهيو هو، اڳوڻي صدر جي وڪيل فاروق ايڇ نائيڪ جي حاضري کان ڇوٽ جي درخواست ڏني جنهن کي عدالت منظور ڪري ورتو. عدالت ايف آءِ اي جي وڪيل کان سوال ڪيو ته اسلم مسعود ڪٿي آهي جنهن تي ايف آءِ اي پراسيڪيوٽر عدالت کي ٻڌايو ته هو رستي ۾ آهي اڄ عدالت ۾ پيش ڪيو ويندو، هو 7 مارچ تائين راهداري رمانڊ ۾ آهي. عدالت ميگا مني لانڊرنگ ڪيس جي وڌيڪ ٻڌڻي 11 مارچ تائين ملتوي ڪندي آصف زرداري سميت 11 جوابدارن جي وقتي ضمانت ۾ به ايندڙ ٻڌڻي تائين واڌ ڪري ڇڏي. آصف زرداري جي وڪيل فاروق ايڇ نائيڪ ڪيس جي ملتوي ٿيڻ کانپو3 ميڊيا سان ڳالهائيندي چيو ته نيب ڪيس اسلام آباد منتقلي جي درخواست اسان کي فراهم ڪئي آهي ۽ اسان نيب جي مخالفت ڪئي ۽ جواب داخل ڪرائڻ لاءِ مهلت گهري آهي. فاروق ايڇ نائيڪ موجب 11 مارچ تي ڪيس جي منتقلي بابت نيب جي درخواست تي جواب ڏينداسين، ڪيس ڪراچي جو آهي ته ڪراچي ۾ ئي ٻڌو وڃي، آصف زرداري ڪراچي ۾ ناهي ان لاءِ اڄ هو پيش نه ٿيو.