مودي جي پاليسين ڪشمير مسئلي کي عالمي سطح تي اجاگر ڪيو آهي، پاڪستان امن جو رستو چاهي ٿو: پرڏيهي وزير

1Shares

اسلام آباد (بيورو) پرڏيهي وزير شاهه محمود قريشي چيو آهي ته مودي سرڪار اهو ڪم ڪري ڇڏيو آهي، جيڪو ڪا حڪومت نه ڪري سگھي، مودي جي پاليسين ڪشمير مسئلي کي عالمي سطح تي اجاڳر ڪيو آهي. خانگي ٽي وي چئنل جي پروگرام ۾ ڳالهه ٻولهه ڪندي شاهه محمود قريشي چيو ته گڏيل قومون، يورپين يونين، آمريڪا، برطانيا، روس، چين ۽ ترڪي سڀئي ڇڪتاڻ جو خاتمو چاهين ٿا. مودي سرڪار اهو ڪم ڪري ڇڏيو آهي، جيڪو ڪا حڪومت نه ڪري سگھي هئي ۽ مودي جي پاليسين ڪشمير مسئلي کي عالمي سطح تي اجاڳر ڪري ڇڏيو آهي، ان ڪري پاڪستان ۽ ڀارت جي معاملن ۾ عالمي برادري مداخلت ڪئي آهي. هوڏانهن پنهنجي بيان ۾ شاهه محمود قريشي جو چوڻ هو ته ڀارت ۾ ننڍو طبقو سياسي فائدن لاءِ خطي کي جنگ جي آڙاهه ۾ ڌڪڻ چاهي ٿو. پاڪستان امن جو رستو چاهي ٿو، جڏهن ته ڀارت مان به امن جي حمايت ۾ آواز اٿي رهيو آهي، سعودي جي پرڏيهي معاملن واري وزير عادل الجبير جي پاڪستاني دوري بابت شاهه محمود قريشي چيو ته سعودي وزير چيو هو ته هو پهريان نئين دهلي ويندو ۽ پوءِ  پاڪستان ايندو پر هاڻي اطلاع آهن ته سندس دورو دير جو شڪار ٿي ويو آهي. سعودي وزير معاملا حل ڪرڻ ۾ مدد ڪرڻ چاهي ٿو، پاڪستان امن لاءِ هر  وقت تيار آهي، ڪشمير مسئلو هاڻي سموري دنيا ۾ اجاڳر ٿي ويو آهي، خطي ۾ امن لاءِ ڪشمير مسئلي جو حل ضروري آهي. ٻئي طرف پرڏيهي وزير شاهه محمود قريشي چيو آهي ته او آءِ سي جي ٺهراءَ ۾ ڪشمير تي  پاڪستان جي موقف جي منظوري ڏني وئي آهي، اهڙي ڪاميابي تي پاڪستاني قوم کي مبارڪباد پيش ڪيان ٿو. ٽوئٽر تي هڪ بيان ۾ شاهه محمود قريشي چيو ته  او آءِ سي جي ٺهراءَ ۾ ڪشمير  کي خطي جي امن لاءِ اهم قرار ڏنو ويو آهي، ٺهراءَ ۾ والاريل ڪشمير ۾ ڀارتي دهشتگردي جي مذمت ڪئي وئي.  هن چيو ته او آءِ سي ڀارتي اڳرائي جي مذمت ڪئي ۽ پاڪستان جي دفاع واري حق کي قبول ڪيو، پاڪستاني قوم کي اهڙي ڪاميابي تي مبارڪباد پيش ڪيان ٿو. سندس چوڻ هو ته او آءِ سي ڏکي وقت ۾ پاڪستاني قوم سان گڏ بيٺل آهي.03

1Shares

اپنا تبصرہ بھیجیں