ڀارت باهه سان کيڏي رهيو آهي، پائليٽ کي آزاد ڪرڻ لاءِ ڪوبه دٻاءُ نه هو: پرڏيهي وزير

1Shares

اسلام آباد/لاهور(بيورو+م ڊ) پرڏيهي وزير شاهه محمود قريشي چيو آهي ته اسان امن جو پيغام ڏيڻ چاهيون ٿا ۽ ان لاءِ ڀارتي پائليٽ جي آزاديءَ جو فيصلو ڪيو ويو. برطانوي نشرياتي اداري سان ڳالهائيندي شاهه محمود قريشي جو چوڻ هو ته پاڪستان غير رياستي عنصرن کي ملڪ ۽ خطي جي امن کي خطري ۾ وجهڻ جي اجازت نه ڏيندو، اسان انتهاپسند گروپن خلاف ڪارروائي جو ارادو رکون ٿا. هن چيو ته حڪومت ڪنهن مليشيا يا جنگجو تنظيم کي هٿيارن جي استعمال ۽ ان ذريعي دهشتگردي ڦهلائڻ جي اجازت نه ڏيندي، جيڪڏهن ڪو گروپ ائين ڪري ٿو ته حڪومت ان خلاف ڪارروائي جو ارادو رکي ٿي. هن چيو ته اسان غير رياستي عنصرن کي پنهنجي ملڪ ۽ خطي جي هن پاسي بيهارڻ جي اجازت نٿا ڏئي سگهون. هن چيو ته پاڪستان تي ڀارتي پائليٽ کي آزاد ڪرڻ لاءِ ڪوبه دٻاءُ نه هو ۽ نه ئي ڪا مجبوري هئي، اسان کين اهو پيغام ڏيڻ چاهيون ٿا ته اسان توهان جي ڏک ۾ واڌ نٿا چاهيون، اسان توهان جي شهرين جي بدسلوڪي نٿا چاهيون، اسان ته امن چاهيون ٿا. هن چيو ته جيڪڏهن اسان کي جيش محمد بابت شاهديون مليون ته ڪارروائي ٿيندي. ٻئي طرف لاهور ۾ پريس ڪانفرنس ڪندي پرڏيهي وزير شاهه محمود قريشي چيو ته ڀارت ۾ مقبوليت وڌائڻ جو سولو طريقو پاڪستان دشمني آهي، ڀارت قوم پرستي کي اڀاري پنهنجي ساک داءَ تي لڳائي ڇڏي، جنهن کي نظر ۾ رکندي اسان جي پرڏيهي وزارت پلواما حملي کان گهڻو اڳ ئي سفيرن کي خاص طور بريفنگ ڏيڻ شروع ڪري ڇڏي هئي. لاهور ۾ پريس ڪانفرنس ڪندي شاهه محمود قريشي چيو ته ان حوالي سان مان ڪيترن ئي ملڪن جي پرڏيهي وزيرن سان ڳالهه ٻولهه ڪئي ۽ صورتحال بابت آگاهه ڪيو، روس جي تازي دوري تي به ڀارت جي امڪاني جارحيت جو خدشو ظاهر ڪيو هو ۽ گذريل ڏينهن روسي پرڏيهي وزير سان ٽيليفونڪ گفتگو به مقصد واري رهي، جڏهن پلواما حملو ٿيو ۽ نئين دهلي جارحيت جو مظاهرو ڪيو ته روس کي منهنجون ڳالهيون ياد هيون. هن او آءِ سي اجلاس ۾ شرڪت نه ڪرڻ جي حوالي سان واضح ڪيو ته پارليامينٽ ۾ ڪو اختلاف سامهون نه آيو، سڀني گڏيل طور هڪ ٺهراءُ منظور ڪيو، جنهن تي آصف علي زرداري جون صحيحون موجود آهن. پرڏيهي وزير انڪشاف ڪيو ته قرارداد جي منظوري کان اڳ غير رسمي ملاقات دوران ن ليگ اڳواڻ اياز صادق ٻڌايو ته اسان جي پارٽي ۽ پ پ جو وڏو طبقو سمجهي ٿو ته جيڪڏهن حڪومت او آءِ سي اجلاس ۾ شرڪت ڪندي ته يڪجهتي جو جيڪو پيغام ڏيڻ چاهيون ٿا، ان ۾ خال پئجي ويندو، اياز صادق واضح ڪيو ته او آءِ سي اجلاس ۾ شرڪت جي حڪومتي فيصلي تي خواجا آصف، خورشيد شاهه ۽ رضا رباني سميت ٻيا اڳواڻ بائيڪاٽ ڪندا. سندس چوڻ هو ته هٿياربند فوجن ثابت ڪيو ته اهي جارحيت جي مقابلي جي ڀرپور صلاحيت رکن ٿيون، پاڪستان امن جو خواهشمند آهي پر ڪنهن به نوعيت جي حملي جي صورت ۾ ردعمل ڏيڻ ضروري هو. شاهه محمود قريشي چيو ته يورپي ۽ برطانوي پارليامينٽ ميمبرن کي خط لکڻ جو فيصلو ڪيو آهي، جڏهن ته نئين دهلي ۽ واشنگٽن حڪومت ۾ ويجها لاڳاپا آهن، تنهن ڪري آمريڪا ڀارت تي دٻاءُ وجهي سگهي ٿو. سندس چوڻ هو ته جئي پور جيل ۾ شاڪر الله جي حفاظت ڀارتي جيل اختيارين جي ذميواري هئي، جيڪا انهن پوري نه ڪئي. هن واضح ڪيو ته ڀارتي پائلٽ به مڇريل ماڻهن جي وچ ۾ هو پر پاڪ فوج جي جوانن فوري طور پهچي اڀي نندن کي بچايو، شاڪر الله جو موت انساني الميو آهي. پرڏيهي وزير چيو ته پاڪستاني ميڊيا کي خراج پيش ڪيان ٿو، جنهن امن لاءِ هاڪاري ڪردار ادا ڪيو. هن هڪ ڀيرو ٻيهر واضح ڪيو ته جنگي قيدي ڀارتي پائلٽ کي رها ڪرڻ لاءِ ڪو عالمي دٻاءُ نه هو.

1Shares

اپنا تبصرہ بھیجیں