پاڪستان جو ڇڪتاڻ جي خاتمي لاءِ پهريون قدم، گرفتار پائليٽ اڀي نندن آزاد، ڀارتي اختيارين حوالي

لاهور(بيورو) ڀارتي پائليٽ اڀي نندن کي واهگا بارڊر ڀارتي اختيارين جي حوالي ڪيو ويو. ڀارتي پائليٽ کي سخت سيڪيورٽي ۾ واهگا بارڊر پهچايو ويو آهي، جتي ملڪي ۽ پرڏيهي ميڊيا نمائندن جو وڏو تعداد موجود آهي. سفارتي ذريعن جو چوڻ آهي ته ايئر اتاشي گروپ ڪيپٽن جي ٽي ڪرين اڀي نندن جا سفري دستاويز کڻي لاهور روانو ٿي ويو جيڪو ان کي ڀارت ڇڏڻ ويندو. پرڏيهي لاڳاپن بابت يورپي ڪائونسل ڀارتي پائليٽ آزاد ڪرڻ جي پاڪستاني قدم کي ڀليڪار ڪيو آهي، يورپي ڪائونسل جو چوڻ آهي ته ڀارتي پائليٽ جي آزادي پاڪستان طرفان سٺو سنوڻ آهي ۽ ٻنهي ملڪن وچ ۾ ڇڪتاڻ ختم ڪرڻ لاءِ اهو ئي موقعو آهي. ٻئي طرف ڀارتي پائليٽ اڀي نندن واپسي کان اڳ پنهنجي ويڊيو بيان ۾ تسليم ڪيو ته پاڪستاني فوج تمام پروفيشنل آهي پر ٻئي طرف ڀارتي ميڊيا هر ڳالهه کي وڌائي پيش ڪندي آهي. هن چيو ته منهنجو نالو ونگ ڪمانڊر اڀي نندن آهي، ڀارتي ايئر فورس جي ويڙهاڪ جهاز جو پائليٽ آهيان، پاڪستان ۾ هڪ ٽارگيٽ ڳولڻ جي ڪوشش ڪري رهيو هيس ته پاڪستان ايئر فورس جي جهاز منهنجو جهاز ڪيرايو. سندس چوڻ هو ته مون جهاز مان ٽپو ڏنو، جڏهن منهنجي پيراشوٽ کلي ته مون وٽ پسٽل هيو، جتي مون لينڊ ڪيو، اتي ماڻهو تمام گهڻا هئا، مون پسٽل ڦٽو ڪري ڀڄڻ جي ڪوشش ڪئي. ڀارتي پائليٽ چيو ته پاڪستاني فوج جا 2 ماڻهو مون ڏانهن آيا ۽ مونکي بچائي ورتو، ان کانپوءِ فوج جو ڪپتان آيو، هن مون کي ڪجهه به ٿيڻ نه ڏنو، پوءِ اهو مونکي پنهنجي يونٽ وٺي ويو ۽ فرسٽ ايڊ ڏني، جنهن کانپوءِ مونکي اسپتال منتقل ڪري علاج ڪرايو ويو. اڀي نندن چيو ته ڀارتي ميڊيا هر ڳالهه کي وڌائي پيش ڪندي آهي، مون پاڪستاني فوج سان گڏ وقت گذريو، پاڪستاني فوج تمام گهڻي پروفيشنل آهي، پاڪستاني فوج مان تمام گهڻو متاثر ٿيو آهيان، ڀارتي ميڊيا ننڍي ڳالهه کي وڌائي پيش ڪندي آهي، جنهن سبب ماڻهو ڳالهين جي پٺيان لڳي جوش ۾ اچي ويندا آهن.