ڪراچي ڪنگز جي لاهور قلندرز ۽ پشاور زلميءَ جي اسلام آباد يونائيٽيڊ کي شڪست

دبئي (اسپورٽس نيوز) پاڪستان سپر ليگ جي چوٿين ايڊيشن جي 20 هين ميچ ۾ ڪراچي ڪنگز سخت مقابلي کانپوءِ لاهور قلندرز کي 5 وڪيٽن تان شڪست ڏئي ڇڏي. لاهور قلندرز ڪراچي ڪنگز کي ميچ کٽڻ لاءِ 134 رنسن جو هدف ڏنو جيڪو ڪراچي ڪنگز 5 وڪيٽن جي نقصان تي پورو ڪري ميچ پنهنجي نالي ڪري ورتي. دبئي جي انٽرنيشنل ڪرڪيٽ اسٽيڊيم ۾ کيڏيل ميچ ۾ ڪراچي ڪنگز ٽاس کٽي لاهور کي پهريان بيٽنگ جي دعوت ڏني. لاهور طرفان اننگز جي شروعات فخر زمان ۽ گوهر علي ڪيو پر گوهر پهرين ئي اوور ۾ 4 رنسون ٺاهي عماد جو وسيم جو شڪار بڻيو. فخر زمان 18 رنسون ٺاهي سگهيو جڏهن ته حارث سهيل پنهنجي ٽيم جي اسڪور ۾ 20 رنسون جو اضافو ڪيو . تجربيڪار اي بي ڊي ويليئرز 33 رنسن جي اننگز کيڏي جڏهن ته سهيل اختر 29 رنسن جو واڌارو ڪيو. اهڙي ريت لاهور قلندرز مقرر 20 اوورن ۾ پنجن وڪيٽن جي نقصان تي 133 رنسون ٺاهيون. ڪراچي ڪنگز طرفان افتخار احمد ٻه جڏهن ته عماد وسيم، محمد عامر ۽ عمر خان هڪ هڪ وڪيٽ حاصل ڪئي. جواب ۾ ڪراچي ڪنگز 134 رنسن جو هدف 19 ڏهائي 1 اوور ۾ پنجن وڪيٽن جي نقصان تي حاصل ڪري ورتو. ڪراچي طرفان ليونگ اسٽون 38 ۽ افتخار احمد 33 رنسون ٺاهي نمايان رهيو. ميچ ۾ زبردست ڪارڪردگي جو مظاهرو ڪرڻ تي افتخار احمد کي مين آف دي ميچ قرار ڏنو ويو. پاڪستان سپر ليگ جي چوٿين ايڊيشن جي 21 هين ميچ ۾ پشاور زلمي سخت مقابلي کانپوءِ اسلام آباد يونائيٽيڊ کي 4 وڪيٽن تان شڪست ڏئي ڇڏي.دبئي ڪرڪيٽ اسٽيڊي۾ ۾ کيڏي ويندڙ ميچ ۾ پشاور زلمي ٽاس کٽي اسلام آباد يونائيٽيڊ کي پهريان بيٽنگ جي دعوت ڏني. يونائيٽيڊ طرفان اننگز جي شروعات ليوڪ رونڪي ۽ ڊيلپورٽ ڪئي پر ٻئين اوور جي پهرئين بال تي ليوڪ رونڪي 9 رنسون ٺاهي آئوٽ ٿي ويو. ڪيمرون ڊيلپورٽ 71 رنسن جي شاندار اننگز کيڏي جڏهن ته فلپ سالٽ 28 ۽ محمد آصف 23 رنسن جي اننگز کيڏي، اسلام آباد يونائيٽيڊ مقرر 20 اوورن ۾ 176 رنسون ٺاهيون ۽ پوري ٽيم آئوٽ ٿي وئي.پشاور زلمي طرفان حسن علي، ابتسام شيخ ۽ وهاب رياض ٻه ٻه رانديگر آئوٽ ڪيا جڏهن ته هڪ وڪيٽ عميد آصف جي حصي ۾ آئي. پشاور زلمي هينئر تائين 6 مان 4 ميچون کٽيون آهن جڏهن ته اسلام آباد يونائيٽيڊ 7 مان 4 ميچن ۾ ڪامياب رهي.06