جنگ جي حالت ۾ اچي چڪا آهيون، ڀارت باهه سان پيو کيڏي، پنهنجو اتحاد ڏيکارڻو پوندو: قومي اسيمبلي ميمبر

اسلام آباد(بيورو) اپوزيشن لائن آف ڪنٽرول جي ڀڃڪڙي تي پارليامينٽ جو گڏيل اجلاس گهرائڻ جو مطالبو ڪري ڇڏيو. ڊپٽي اسپيڪر قاسم سوري جي سربراهي ۾ قومي اسيمبلي جي اجلاس دوران اعتراضي نقطي تي خورشيد شاهه چيو ته وزيراعظم چوندو هو ته ڀارت جارحيت ڪئي ته سوچينداسين به نه ۽ سوچڻ گهرجي به نه، اسان جنگ جي حالت ۾ اچي ويا آهيون، پارليامينٽ ويهي ۽ فيصلو ڪري، اسان کي ڀارت ۽ دنيا کي ڏيکارڻو آهي ۽ پورو ملڪ گڏ رکڻو آهي. مسلم ليگ ن جي خواجا آصف چيو ته جهڙي طرح هي حڪومت هلائي رهيا آهن ايئن حڪومت ناهي هلندي، او آءِ سي ۾ سشما سوراج کي گهرائڻ پاڪستان جي توهين آهي سفارتي س طح تي اسان جي ناڪامي آهي جو ڀارتي پرڏيهي وزير کي او آءِ سي ۾ گهرايو ويو، اسان کي ان معاملي تي او آءِ سي جي اجلاس جو بائيڪاٽ ڪرڻ گهرجي. مسلم ليگ ن جي سردار اياز صادق چيو گذريل پنجن سالن ۾ پاڪستان اسلامي تعاون جي تنظيم جي هر پارلياماني ميٽنگ ۾ شرڪت ڪئي، پر هاڻ پاڪستان کي ڪنهن صورت او آءِ سي جي اجلاس ۾ نه وڃڻ گهرجي، او آءِ سي جي همت ڪيئن ٿي جو هن ڀارت کي گيسٽ آف آنر گهرايو، ڇا ڀارت کي دعوت ڏيڻ کان اڳ پاڪستان کان پڇيو ويو هو. پارلياماني معاملن بابت مملڪتي وزير علي محمد خان جو چوڻ هو ته ڀارت رات جي اونداهي ۾ بزدلاڻي ڪارروائي ڪئي، اسان جي امن جي خواهش کي ڪمزوري نه سمجهيو وڃي، ڀارت بزدلاڻي حرڪن کان پاسو نه ڪيو ته جواب ڏيڻ ڄاڻون ٿا، ڀارت جا هزارين ٽڪرا ڪيا ويندا. جي يو آءِ ف جي مولانا اسعدالرحمان جو چوڻ هو ته ڀارت جارحيت جي مذمت ڪريون ٿا، اسان پاڪستان جي سالميت تي سوديبازي به ڪنداسين، حڪومت کي ان حوالي سان هڪ گڏيل پاليسي ڏيڻ گهرجي. عوامي نيشنل پارٽي جي امير حيدر هوتي چيو ته ايوان جي ميمبر جي حيثيت سان فخر آهي ته ان معاملي  تي مڪمل اتحاد جو مظاهرو ڪيو ويو، اختلاف راءِ هڪ قدرتي عمل آهي، اسان کي حڪومت سان ۽ حڪومت کي اسان سان شڪايتون هونديون پر جڏهن ملڪي سلامتي جو معاملو هوندو آهي ته ملڪ سڀ کان پهريان هوندو آهي، ڀارت ۾ هن وقت اليڪشن آهي، مودي صاحب خطي جي سلامتي کي داءُ تي لڳائي ڇڏيو آهي. ٻئي طرف نواز ليگ اڳواڻ خواجا آصف چيو ته او آءِ سي ۾ ڀارت جي شرڪت اسان لاءِ توهين آهي، ڀارتي ڀڃڪڙي سلامتي جو معاملو آهي، ان معاملي تي سڄي قوم متحده آهي، ڀارت طرفان هڪ پيغام وڃڻ گهرجي ته سڄو ملڪ پاڪ فوج سان گڏ بيٺل آهي. خواجا آصف چيو ته او آءِ سي ۾ ڀارت جي شرڪت اسان لاءِ توهين آهي، ڪشميرين جو رت وهايو پيو وڃي ته ٻئي طرف او آءِ سي ۾ ڀارت کي گهرايو پيو وڃي. هن چيو ته بالاڪوٽ ۾ ڇا ٿيوآ هي، ان جا تفصيل اچڻ اڃا باقي آهن، پر ميڊيا تي تفصيل اچي ويا آهن. نواز ليگ اڳواڻ چيو ته، هي مسئلو اسان جي موت جو مسئلو آهي، اسان فوج سان گڏ آهيون، اسان ايوان ۾ ڪا به اختلافي ڳالهه نه ٿا ڪرڻ چاهيون، جنهن سان ماحول خراب ٿئي. هن چيو ته اسان جو هڪ دوست ملڪ ان ملڪ کي بيسٽ آف آنر جو درجو ڏئي رهيو آهي، جنهن سبب اسان کي ان اجلاس جو به بائيڪاٽ ڪرڻ گهرجي. خواجا آصف چيو ته، پاڪستان جو 22 ڪروڙ عوام پنهنجي سرحدن جي حفاظت چاهي ٿو ۽ پنهنجي عزت چاهي ٿو ۽ اهو تحفط فوج کي ڏيڻو آهي. نواز ليگ اڳواڻ چيو ته،  ڪشمير معاملي تي به اسان گڏ آهيون، ڪشميرين جي مدد تي گهٻرائڻ نه گهرجي. هن چيو ته، اسان طرفان پيغام وڃڻ گهرجي ته اسان جا اختلاف پنهنجا آهن پر هن معاملي تي سڄو پاڪستان متحد آهي. خورشيد شاهه جي مطالبي جي حمايت ڪندي خواجا آصف چيو ته هي معاملو قومي سلامتي جو معاملو آهي، پارليامينٽ جي گڏيل سيشن جو اجلاس گهرايو وڃي. خواجا آصف چيو ته سڄي قوم فوج سان گڏ آهي، هن وقت سياست نه ڪئي وڃي، هي اتحاد ۽ قومي يڪجهتي جو مسئلو آهي. خورشيد شاهه چيو ته اسان جنگ واري حالت ۾ آهيو، پارليامينٽ ويهي فيصلو ڪري، اسان ڀارت ۽ دنيا کي ڏيکارن چاهيون ٿا ته سڄو ملڪ متحد آهي. اپوزيشن جماعتن ڀارتي ايئرفورس طرفان پاڪستاني سرحدن ۾ داخل ٿيڻ تي حڪومت کان پارليامينٽ جو گڏيل اجلاس گهرائڻ جو مطالبو ڪري ڇڏيو قومي اسيمبلي ۾ خطاب ڪندي خورشيد شاهه چيو ته اسان جنگ واري حالت ۾ آهيو، پارليامينٽ ويهي فيصلو ڪري. هن چيو ته، اسان ڀارت ۽ دنيا کي ڏيکارڻ چاهيون ٿا ته سڄو ملڪ متحد آهي. پيپلزپارٽي اڳواڻ چيو ته، وزيراعظم چئي ٿو ته ڀارت جارحيت ڪئي ته اسان نه سوچينداسين ۽ ايئن سوچڻ به نه گهرجي. هن چيو ته، ايوان جي ان معاملي تي متحده ٿيڻ جي ضرورت آهي، اڄ وزيراعظم کي هتي هئڻ گهرجي ها، ٿي سگهي ٿو ته حڪومتي بئنچن جي ڪا مجبوري هجي. خورشيد شاهه چيو ته ڀارت ياد رکي ته جهاد اسان لاءِ حلال آهي ۽ ايمان جو حصو آهي، تجربو اسان جو گهڻو آهي، اپوزيشن ڳالهائي ته تاثر ويندو آهي. خورشيد شاهه چيو ته پاڪستان سرڪار ڀارتي مداخلت کي سنجيدگي سان ڏسي، ملڪي سلامتي تي سمورا سياستدان هڪ پيج تي آهن. پيپلزپارٽي اڳواڻ  چيو ته جنگي حالتون آهن، اسان کي هندستان کان گهٽ نه سمجهيو وڃي، پارليامينٽ جو گڏيل سيشن گهرايو وڃي. هن چيو ته، اپوزيشن جي اپيل  آهي ته ٻن ٽن ڏينهن لاءِ پارليامينٽ فيصلو ڪري ۽ پارليامينٽ جي فيصلن تي حڪومت کي عمل ڪرڻو پوندو. خورشيد شاهه چيو ته، آئون سڀني ميمبرن کي اپيل ڪيان ٿو ته ڪا به اهڙي ڳالهه ايوان ۾ نه ڪئي وڃي، جنهن سان صورتحال خراب ٿئي.