خانگي اسڪولن فيس ڪٽوتي واري فيصل تي عمل نه ڪيو ته سخت ڪارروائي ٿيندي: سنڌ هاءِ ڪورٽ

1Shares

ڪراچي(اسٽاف رپورٽر) سنڌ هاءِ ڪورٽ چيو آهي ته خانگي اسڪولن کي فيسن ۾ ڪٽوتي تي فيصلي تي عمل ڪرڻو پوندو، ٻي صورت ۾ سخت ڪارروائي ٿيندي. عدالت ۾ اهي ريمارڪس ڪراچي ۾ خانگي اسڪولن جي فيسن ۾ اضافي بابت ڪيس جي ٻڌڻي دوران سامهون آيا. ٻڌڻي دوران هڪ خانگي اسڪول طرفان واڌو فيس جو چالان موڪلڻ تي به ڇنڊ پٽي وئي. خانگي اسڪولن جي وڪيل عدالت کي ٻڌايو ته فيسن ۾ 20 سيڪڙو ڪٽوتي مالڪن لاءِ برداشت جوڳي ناهي، سنڌ هاءِ ڪورٽ ريمارڪس ڏنا ته اسڪول فيس ڪٽوتي جي حڪم تي عمل ڪن. عدالت طرفان چيو ويو ته صفائي جو موقعو ملڻ کانپوءِ سخت ڪارروائي ٿيندي. سنڌ حڪومت حڪمن تي عمل نه ڪندڙ اسڪولن خلاف ڪارروائي جي اڳڀرائي رپورٽ عدالت ۾ پيش ڪئي. حڪومتي وڪيل ٻڌايو ته اسڪول مالڪن ۽ والدين جو ڪيترن ئي معاملن تي اتفاق نه ٿي سگهيو، والدين کي شروعاتي 5 هزار رپين تي ڪٽوتي کان ڇوٽ تي اعتراض آهي. خانگي اسڪولن جي وڪيل چيو ته ڌرين جو 22 نڪتن تي اتفاق ٿي چڪو آهي، اسڪول مالڪ 10 سيڪڙو گهٽتائي لاءِ تيار آهن، 20 سيڪڙو لاٿ برداشت جوڳي ناهي. عدالت ٻن اسڪولن کان جماعتن جي درجي بندي جي حساب سان فيس اسٽرڪچر طلب ڪيو. عدالت نومبر کان جنوري تائين جاري ريوائزڊ فيس چالان پيش ڪرڻ جو به حڪم ڏنو. والدين عدالت کي ٻڌايو ته هڪ اسڪول فيس گهٽائڻ بدران اضافي چالان موڪليو آهي. جسٽس محمد علي مظهر چيو ته عدالتي حڪمن موجب توهان جي فيس 12665 رپيا هجڻ گهرجي پر توهان چالان 15000 رپين جو جاري ڪيو آهي. اسڪولن جي وڪيل چيو ته نظرثاني ٿيل چالان جاري ڪيو ويو آهي، عدالت چيو ته ان غلطي تي توهان کي شوڪاز جاري ٿيڻ گهرجي. ڪيس جي وڌيڪ ٻڌڻي 18 مارچ تائين ملتوي ڪئي وئي.

1Shares

اپنا تبصرہ بھیجیں