افغان امن ڳالهين لاءِ پاڪستان جو دورو ڪرڻو هو پر سفري پابندين سبب نٿا وڃي سگهون: افغان طالبان

ڪابل(م ڊ) طالبان پاڪستان ۾ آمريڪا سان امن ڳالهين کي رد ڪندي چيو آهي ته انهن جا گهڻا ميمبر سفر نه ٿا ڪري سگهن ڇو ته آمريڪا ۽ گڏيل قومن طرفان بليڪ لسٽ ۾ شامل آهن. افغان طالبان جي وفد کي افغان مفاهمتي عملجي سلسلي ۾ اڳ ئي طئي ٿيل شيڊول موجب اسلام آباد پهچڻو هيو پر گڏيل قومن ۽ آمريڪا پاران لڳايل سفري پابندين سبب طالبان پاڪستان ناهن اچي رهيا. پرڏيهي خابرو اداري موجب افغان طالبان جي قطر ۾ موجود سياسي آفيس مان جاري ڪيل بيان ۾ چيو ويو آهي ته ڳالهيون ڪندڙ ٽيم کي افغان امن ڳالهين جي سلسلي ۾ پاڪستان جو دورو ڪرڻو هو جيڪو سفري پابندين سبب ملتوي ڪيو ويو پر ڳالهين لاءِ نئين تاريخ طئي ڪئي ويندي. افغان طالبان جي وفد جي وزيراعظم عمران خان ۽ آمريڪا جي افغان مفاهمتي عمل واري خاص نمائندي خلمي خليل زاد ۽ ٻين اختيارين سان ملاقات ڪرڻي هئي پر دورو ملتوي ڪرڻ بابت وڌيڪ تفصيلن فراهم ناهن ڪيا ويا.واضح رهي ته افغانستان ۾ آمريڪا پاران مڇريل ڊگھي ويڙهه جي خاتمي لاءِ طالبان ۽ آمريڪا وچ ۾ ڳالهين جا ڪيترائي دور ٿي چڪا آهن، ۽ ان سلسلي ۾ ڳالهين جو هڪ دور اڄ اسلام آباد ۾ شيڊول هيو. طالبان وفد جا 9 ميمبر گڏيل قومن ۽ آمريڪي پابندين جي فهرست ۾ شامل آهن. افغان طالبان پاران پاڪستان جو دورو هن وقت ملتوي ڪيو ويو آهي جڏهن ته افغانستان پاران گڏيل قومن ۾ افغان طالبان جي دوري تي احتجاج ڪيو ويو. گڏيل قومن جي سيڪيورٽي ڪائونسل ۾ افغان نمائيندي پاران جمع ڪرائيل خط ۾ چيو ويو هو ته طالبان ۽ پاڪستان جون ڳالهيون افغانستان جي خودمختياري جي خلاف آهن. طالبان ۽ افغانستان جون مخالف ڌر وارين جماعتن جي اڳواڻن وچ ۾ ماسڪو ۾ 5 ۽ 6 فيبرپري تي ڳالهيون ٿيون جنهن ۾ اهم معاملن تي اتفاق ڪيو ويو پر  ان جا تفصيلن سامهون ناهن اچي سگھيا. افغان صدر اشرف غني پهريان به ڪيترائي ڀيرا طالبان کي ڳالهين جي آڇ ڪري چڪا آهن پر طالبان افغان قيادت کي آمريڪا کي ڪٺ پتلي قرار ڏيندي حڪومت سان ڳالهيون ڪرڻ کان انڪار  ڪري رهيا آهن ۽ هو سڌي ريت آمريڪا سان ڳالهيون ڪري رهيا آهن.