ڀارت ڪلڀوشن جي رٽائرمينٽ جا ثبوت ڏيڻ ۾ ناڪام، وڪيلن دليل مڪمل ڪري ورتا

دي هيگ(م ڊ) انصاف جي عالمي عدالت ۾ ڀارت پنهنجي جاسوس ڪلڀوشن ياديو جي رٽائرمينٽ جا ثبوت فراهم ڪرڻ ۾ ناڪام رهيو. دي هيگ ۾ انصاف جي عالمي عدالت ۾ ڀارتي جاسوس ڪلڀوشن ياديو بابت ڪيس جي ٻڌڻي ٿي، ٻڌڻي دوران ڀارتي وڪيلن دليل ڏنا. سفارتي ذريعن موجب ڀارت ٻڌڻي دوران ڪلڀوشن ياديو جي رٽائرمينٽ جا ثبوت نه ڏئي سگهيو. سفارتي ذريعن موجب ڪلڀوشن ياديو کي حسين مبارڪ پٽيل جي نالي سان جاري پاسپورٽ تي به ڀارت عدالت ۾ تسلي بخش جواب نه ڏئي سگهيو. سفارتي ذريعن موجب ڪيس ۾ ڀارت لاءِ ڏکيائيون وڌي ويون آهن، حسين مبارڪ جي نالي سان پاسپورٽ ڀارتي حڪومت جاري ڪيو، ڪلڀوشن جعلي سڃاڻپ ڪارڊ تي سفر ڪندو رهيو آهي. ڀارتي وڪيل هريش سالوي چيو ته قونصلر پهچ بابت معاهدو آرٽيڪل 36 تي ترجيح نٿو رکي، ويانا ڪنوينشن ۾ جاسوس جي قونصلر پهچ تي به ڪا پابندي نه آهي، ڪلڀوشن ياديو کي فوري طور آزاد ڪيو وڃي. اٽارني جنرل پاڪستان انور منصور جي قيادت ۾ ڊاڪٽر فيصل ۽ خاور قريشي تي ٻڌل پاڪستان جو وفد عالمي عدالت ۾ موجود آهي. پاڪستاني وڪيل ڀارتي دليلن کانپوءِ اڄ ڪلڀوشن جي تخريبڪاري بابت ثبوت انصاف جي عالمي عدالت ۾ پيش ڪندا. پاڪستاني دليلن کان پوءِ 20 فيبروري تي هڪ ڀيرو ٻيهر ڀارت کي پنهنجو موقف پيش ڪرڻ جو موقعو ڏنو ويندو، جنهن کانپوءِ 21 فيبروري تي پاڪستان پنهنجا حتمي دليل ڏيندو. انصاف جي عالمي عدالت ڪلڀوشن ڪيس جي ٻڌڻي 18 کان 21 فيبروري تائين جاري رکندي. ٻئي طرف پرڏيهي کاتي جي ترجمان ڊاڪٽر محمد فيصل چيو آهي ته ڪلڀوشن ياديو ڪيس ۾ پيش ڪيل ڀارتي دليلن ۾ ڪا به نئين ڳالهه نه هئي. جاري ڪيل ويڊيو بيان ۾ هن چيو ته انصاف جي عالمي عدالت ۾ ڀارتي دهشتگرد ڪمانڊر ڪلڀوشن ياديو جي ڪيس جو پهريون ڏينهن هيو. سندس چوڻ هو ته ڀارت پنهنجا دليل ڏنا پر انهن ۾ ڪا به نئين ڳالهه نه هئي، ڀارت اسان جي اعتراضن تي جواب نه ڏنو، جڏهن ته ان ڳالهه جو جواب اڃا تائين نه ڏنو ته هن وٽ حسين مبارڪ پٽيل جو پاسپورٽ ڪٿان آيو ۽ 17 ڀيرا سفر ڪهڙي طرح سان ڪيو. پرڏيهي ترجمان چيو ته ڪلڀوشن ياديو پاڪستان ۾ ڇا ڪري رهيو هو، ڀارت جواب نه ڏنو، جيڪڏهن اهو رٽائر هو ته ڪڏهن ٿيو؟ ڪو ثبوت؟ ڪا پينشن بڪ جي ڪاپي؟ ڊاڪٽر فيصل چيو ته هندستان بريت، آزادي ۽ ڪلڀوشن جي واپسي جو چوي ٿو پر ان ڳالهه جو جواب نٿو ڏي ته ڪلڀوشن جي دهشتگردي سبب متاثرن کي انصاف ڪيئن ملندو؟ اسان اڄ پنهنجا دليل ڏينداسين.