سنڌ ۾ احتساب اين آر او جي ور چڙهندي نظر اچي رهيو آهي: جلال محمود شاهه

حيدرآباد(بيورو) سنڌ يونائيٽيڊ پارتي جي صدر سيد جلال محمود شاهه چيو آهي ته پي ٽي آئي حڪومت جو احتساب پنجاب تائين محدود آهي، آصف زرداري، مراد علي شاهه خلاف ثبوت هجڻ باوجود جاچ سرد خاني حوالي آهي. سنڌ ۾ احتساب اين آر او جي نظر لڳي رهيو آهي هن اهڙو اظهار ڪالهه حيدرآباد پريس ڪلب ۾ پريس ڪانفرنس دوران ڪيو. جلال محمود شاهه چيوته  پيپلزپارٽي جي 24 سالن جي اقتدار جي دوران سنڌ جو وقار مجروه ٿيو آهي پيپلز پارٽي ذوالفقار ڀٽو دور کان وٺي ڪري آصف زرداري تائين اقتدار خاطر ملڪ ٽٽڻ جون ڳالهيون ڪري واڳ ڌڻين کي بليڪ ميل ڪيو آهي پي ٽي آٰء حڪومت ڇهن مهينن دوران صرف پنجاب ۾ احتساب ڪيو آهي آصف زرداري،مراد علي شاهه تي ڪرپشن جا ڪيس داخل ٿيڻ باوجود آزاد آهن. هن وڌيڪ چيو ته تحريڪ انصاف کي عوام ان جي لاءِ ووٽ ڏنو هو ته ڪرپشن مافيا خلاف سخت ڪاروايون ڪيون وينديون پر لڳي رهيو آهي ته سنڌ ۾ احتساب اين آر او جي ور چڙهيل آهي هن چيو ته ذوالفقارعلي ڀٽو اقتدار حاصل ڪرڻ جي لاءِ بنگلاديشن جي مينڊيٽ کي قبول نه ڪيو هن چيو ته 1980 کان وٺي 2019 تائين پيپلز پارٽي 11 سال اقتدار جا مزا ورتا آهن جنهن دوران سرڪاري زمينن تي قبضا ڪرڻ ترقياتي فنڊن ۾ ڪرپشن ذريعي دولت ڪمائي آهي هن چيو ته آصف زرداري،بلاول ڀٽو زرداري،سيد مراد علي شاهه خلاف جڏهن به دائرو تنگ ٿيو آهي ته انهن کي سنڌ مان نڪرندڙ گيس تيل تي ملندڙ رائلٽي،18 ترميم ۽ هڪ ٻيو بنگلاديش ياد اچي ويندو آهي هن چيو ته پ پ جي اقتداري دور ۾ِ سياسي ڪارڪنن کي شهيد ڪرائڻ انهن کي کنڀي گم ڪرائڻ جي روايت وڌي وئي. هن چيو ته پيپلزپارٽي سنڌ جي زراعت کي هٿ وٺي تباهه ڪيو.کنڊ، ڪڻڪ جي خريداري ۽ بارداڻي جي ورهاست ۾ رڪارڊ ڪرپشن ڪري هارين ۽ آبادگارن کي تباهه ڪيو پاڻي جي هٿرادو کوٽ پيدا ڪري ٻيلي کاتي جي زمينن تي قبضاڪيا هن چيوته ملڪ کي قومپرستن مان نه پر ڪرپٽ سيا ستدانن ۽ بيوروڪريٽس مان خطرو آهي جن ملڪ جا اربين روپيا هڙپ ڪيا آهن هن مطالبو ڪيو ته آصف زرداري سيد مراد علي شاهه ۽ انهن جي ساٿين خلاف آئين جي آرٽيڪل 6 تحت گرفتار ڪري اسلام آباد جي عدالت ۾ ڪيس هلايو وڃي.ان موقعي تي امير علي ٿيٻو،منورخاصخيلي، عبدالسميع چانڊيو ۽ ٻيا پڻ موجود هئا .05