وڏي وزير ارشاد رانجهاڻي جي قتل جو سختيءَ سان نوٽيس ورتو، عدالتي جاچ ڪرائڻ جو فيصلو، ڪميٽي قائم

ڪراچي(چيف رپورٽر) سنڌ جي وڏي وزير  سيد مراد علي شاهه ارشاد رانجھاڻي جي قتل جو سختيءَ سان نوٽس وٺندي ڪيس جي عدالتي جاچ ڪرائڻ جو فيصلو ڪيو آھي. وڏي وزير چيف سيڪريٽري سنڌ ممتاز علي شاھھ کي ھدايت ڪئي تھ ھُو رجسٽرار سنڌ ھاءِ ڪورٽ کي ھڪ خط لکي جنھن ۾ ارشاد رانجھاڻي جي قتل جي جوڊيشل انڪوائري ڪرڻ جي درخواست ڪئي وڃي. وڏي وزير سيد مراد علي شاھھ چيو تھ اسان ڪنھن کي بھ قانون ھٿ ۾ کڻڻ جي اجازت نٿا ڏئي سگھون. واضح رھي تھ ارشاد رانجھاڻي کي 6 فيبروري اربع ڏھاڙي ڀينس ڪالوني جي يونين ڪائونسل چيئرمين رحيم شاھھ ڀريل بازار ۾ قتل ڪيو ۽ ان متاثر زخمي شخص کي اسپتال وٺي وڃڻ نھ ڏنو ۽ اھو گذاري ويو. انھيءَ کان پھرين وڏي وزير سيد مراد علي شاھھ انسپيڪٽر جنرل پوليس سنڌ ڊاڪٽر ڪليم امام کي سينئر پوليس آفيسر کان ان قتل جي جاچ ڪرائڻ جي ھدايت ڪئي ھئي. ھن چيو تھ سندس حڪومت شھر ۾ سياسي عزم جي ڪري امن امان بحال ڪيو آھي ۽ ان ۾ پوليس، رينجرز ۽ پاڪ آرمي جون بي پناھھ قربانيون شامل آھن. ھن چيو تھ ھاڻي حڪومت ڪنھن کي بھ رياست اندر رياست قائم ڪرڻ ۽ سندن ھٿن ۾ بندوق کڻڻ جي اجازت نٿي ڏئي سگھي. ھن ارشاد رانجھاڻي واقعي جو حوالو ڏيندي چيو تھ ڪنھن شخص کي ڌاڙيل قرار ڏئي قتل نٿو ڪري سگھي. ھن چيو تھ سندس شھر ۾ اھڙي قسم جي واقعن جي اجازت نٿو ڏئي سگھان ۽ ڪراچي جيڪو امن جو مرڪز ۽ بين الاقوامي راندين جو حب بڻجي رھيو آھي، جتي ھر ايندڙ ڏينھن ڪاروباري سرگرمين ۾ واڌ ٿي رھي آھي. ھن چيو تھ اھو شھر ھتي رھندڙ ھر پُرامن شھريءَ جو آھي پر ھتي ڏوھارين، قاتلن ۽ قانون ھٿ ۾ کڻڻ وارن لاءِ ڪراچيءَ ۾ ڪابھ جاءِ نھ آھي. مراد علي شاھھ آءِ جي پوليس کي حڪم ڏنو تھ ھُو ھڪ سينئر پوليس آفيسر جي سربراھيءَ ۾ پوليس اھلڪارن جي ٽيم جوڙي جيڪا ان قتل جي مختلف پاسن ۽  وڪڙن سان جاچ ڪري سگھي. ھن چيو تھ ھن وقت تائين جي ھڪ تفصيلي رپورٽ سندس پيش ڪئي وڃي جنھن ۾ قاتل ۽ مقتول جي مڪمل ڄاڻ، قتل جي پوسٽ مارٽم رپورٽ، ڪنھن ايف آءِ آر داخل ڪرائي ۽ اڃا تائين ڪا گرفتاري عمل ۾ آئي آھي يا نھ؟. کين مڪمل رپورٽ پيش ڪئي وڃي. وڏي وزير سيد مراد علي شاھھ آءِ جي پوليس تي زور ڀريو تھ سندس ان ڪيس تي روزاني ٿيندڙ اڳڀرائيءَ بابت آگاھھ ڪيو وڃي. ٻئي طرف اي آءِ جي ڪراچي امير شيخ معاملي جي جاچ لاءِ ٽه رڪني ڪميٽي جوڙي ڇڏي آهي جنهن جي سربراهي ڊي آءِ جي ايسٽ عامر فاروقي ڪندا جڏهن ته ايس پي ايسٽ، ايس ايس پي جاچ ملير به شامل آهن.