ملڪ رياض توهين عدالت ڪيس ۾ معافي گهري ورتي، فرد جرم لاڳو ٿي چڪو، سزا ڏيڻ باقي آهي: سپريم ڪورٽ

اسلام آباد(بيورو) بحريا ٽائون جي سربراهه ملڪ رياض توهين عدالت ڪيس ۾ سپريم ڪورٽ کان غير مشروط معافي گهري ورتي آهي. سپريم ڪورٽ ۾ ارسلان افتخار ۽ ملڪ رياض بزنس ڊيل ۾ توهين عدالت ڪيس جي ٻڌڻي چيف جسٽس جي سربراهي ۾ ٽه رڪني بئنچ ڪئي. ملڪ رياض جي وڪيل ڊاڪٽر باسط عدالت کي آگاهه ڪيو ته ملڪ رياض خلاف توهين عدالت ڪيس پاڻمرادي نوٽيس ڪيس کي اڪلايو ويو آهي ۽ جڏهن فرد جرم لاڳو ٿيو ته عدالتي حڪمنامو نه آيو هو، جڏهن ته عدالتي حڪم نامي ۾ آيو ته ملڪ رياض ڪڏهن عدالت جي توهين ناهي ڪئي ۽ ملڪ رياض چيو هو ته سندس معاملو عدالت سان نه پر ارسلان افتخار سان آهي. چيف جسٽس آصف سعيد کوسا رمارڪس ڏنا ته ملڪ رياض تي فرد جرم لاڳو ٿي چڪو آهي ۽ هاڻي سزا ملڻ باقي آهي، اسان ان کي قانون مطابق ڏسنداسين. ڊاڪٽر باسط ملڪ رياض جي صحت جو ذڪر ڪندي چيو ته هو سخت بيمار آهي ۽ ان کي ڪينسر آهي، جڏهن ته عدالت ۾ لاڳاپيل ڊاڪٽرن جي ميڊيڪل رپورٽن کي پڻ پيش ڪيو ويو. چيف جسٽس آصف سعيد کوسا چيو ته ملڪ رياض عدالتي حاضري کان ڇوٽ واري ڪابه درخواست ناهي ڏني، توهان لاڳاپيل پاڪستاني ڊاڪٽرن جون روپوٽون پيش ڪيو ته اهي به قبول ڪنداسين، بار بار انگريز ڊاڪٽرن جو حوالو ڇو ٿا ڏيو؟ ملڪ رياض جي وڪيل چيو ته ملڪ رياض پروٽيسٽ ڪينسر جهڙي بيماري ۾ ورتل آهي. چيف جسٽس رمارڪس ڏنا ته التوا رڳو ٻن صورتن ۾ ملندي هڪ ته ملڪ صاحب لاڏاڻو ڪري وڃي يا جج صاحب لاڏاڻو ڪري وڃي. ڊاڪٽر باسط موقف اختيار ڪيو ته جناب کي ٻڌايان ته ملڪ رياض جي سرجري ٿيڻي آهي ۽ ڪينسر جهڙي موذي مرض ملڪ رياض جي ڪرنگهي جي هڏي کي به متاثر ڪيو آهي. چيف جسٽس چيو ته ٽرائل لاءِ شاهدن جي لسٽ اڳوڻي اٽارني جنرل کي ٺاهڻي هئي، جنهن ۾ ارسلان افتخار، افتخار چوڌري، يوسف رضا گيلاني، سيد يوسف ۽ سلمان علي خان شامل آهن، جڏهن ته ميڊيا وارن سان ته اوهان جي سٺي دوستي آهي ۽ توهان جي ڪا خبر به نٿي لڳي. هن چيو ته جيڪڏهن پريس ڪانفرنس جي بنياد تي ڪيس ٺهيو ته ان جي وڊيو ئي ڪافي آهي ۽ رڳو وڊيو جي تصديق ڪرڻي پوندي، وڊيو ۾ خبر پئجي ويندي ته ڳالهائڻ جو انداز ڪهڙو هو؟ چيف جسٽس چيو ته اسان ملڪ رياض کي 10 هفتا حاضري جي ڇوٽ ڏئي سگهون ٿا. ڊاڪٽر باسط عدالت کي آگاهه ڪيو ته ملڪ رياض فون ڪري چيو آهي ته مان عدالت کان غير مشروط معافي گهران ٿو ۽ مان اهو داغ کڻي مرڻ نٿو چاهيان ته عدالت جي عزت ناهيان ڪندو، هو هن وقت برطانيا ۾ آهي. ڊاڪٽر باسط موقف اختيار ڪيو ته ملڪ رياض هن وقت برطانيا ۾ آهي، ان ڪري هڪ هفتي اندر ان جي غير مشروط معافي جمع ڪرائي ويندي. عدالت رمارڪس ڏنا ته ملڪ رياض جي حاضري کان ڇوٽ واري درخواست جمع ڪرايو، ڪيس جي ٻڌڻي 21 فيبروري تائين ملتوي ڪئي وئي.