پنجاب جو سينيئر وزير عليم خان آف شور ڪمپني ۽ آمدني کان وڌيڪ اثاثا رکڻ تي نيب هٿان گرفتار، وزارت تان مستعفي

لاهور(بيورو) قومي احتساب بيورو ( نيب ) پنجاب جي سينيئر وزير عليم خان کي گرفتار ڪري ورتو. رپورٽن موجب نيب لاهور عليم خان کي آف شور ڪمپني اسڪينڊل ۽ آمدني کان وڌيڪ اثاثن جي جاچ لاءِ طلب ڪيو هو جنهن لاءِ هو نيب آفيس پهتو جتي کيس گرفتار ڪيو ويو .  ذريعن جو چوڻ آهي ته نيب عليم خان کي آف شور ڪمپني اسڪينڊل ۾ گرفتار ڪري ورتو آهي. ذريعن موجب عليم خان اڄ ٺوڪر نياز بيگ تي موجود نيب جي آفيس پهتو جتي ميڊيان سان غير رسمي ڳالهه ٻولهه دوران سندس چوڻ هو ته اڄ جنهن معاملي تي طلب ڪيو ويو آهي ته ان تي واپسي تي ڳالهائيندس.  ذريعن ٻڌايو ته نيب جي آفيس مان عليم خان جو اسٽاف اڪيلو روانو ٿيو ۽ سينيئر  وزير نيب جي آفيس مان ٻاهر نه آيو. نيب ترجمان عليم خان جي گرفتاري جي تصديق ڪندي ٻڌايو ته سينيئر وزير کي آمدني کان وڌيڪ اثاثن جي ڪيس ۾ گرفتار ڪيو ويو آهي. ٻئي طرف قومي احتساب بيورو ( نيب ) پنجاب جي سينيئر صوبائي ۽ پي ٽي آءِ اڳواڻ عليم خان جي گرفتاري جا تفصيل جاري ڪري ڇڏيا.  نيب ترجمان موجب پاناما اسڪينڊل جاچ ۾ اڳڀرائي تحت عليم خان کي گرفتار ڪيو ويو آهي.  ترجمان ٻڌايو ته عليم خان پارڪ ويو هائوسنگ سوسائٽي ۾ اختيارين جو ناجائز استعمال ڪيو، هن هائوسنگ سوسائيٽي جي سيڪريٽري ۽ قومي اسمبلي جي ميمبر طور اختيارن جو ناجائز استعمال ڪيو.  نيب ترجمان موجب عليم خان پاڪستان ۽ پرڏيهه ۾ آمدني کان وڌيڪ اثاثا ٺاهيا، هن لاهور  ۽ ڀرپاسي ۾ اي اينڊ اي ڪمپني ٺاهي 1500 کان وڌيڪ اثاثا ٺاهيا، هن ان زمين جي خريداري تي تسلي بخش جواب نه ڏنو. قومي احتساب بيورو طرفان جاري ڪيل تفصيل موجب وڌيڪ ٻڌايو ويو آهي ته عليم خان تي آمدني کان وڌيڪ اثاثن جو الزام آهي، عليم خان 2005ع ۽ 2006ع دوران گڏيل عرب امارتن ۽ برطانيا ۾ ڪيئي آف شور ڪمپنيون ٺاهيون، سندس طرفان ريڪارڊ ۾ مبينا ڦير ڦار ڪئي وئي،  ان مٽا سٽا کي نظر ۾ رکندي عليم خان کي گرفتار ڪيو ويو آهي. نيب ترجمان موجب عليم خان پڇيل سوالن جو جواب نه ڏئي سگهيو، تسلي بخش جواب نه ملڻ تي عليم خان کي گرفتار ڪيو ويو. نيب ترجمان موجب سڀاڻي عليم خان کي احتساب عدالت ۾ پيش ڪيو ويندو. ٻئي طرف عليم خان صوبائي وزارت تان استعيفيٰ ڏئي ڇڏي. عليم خان چيو ته مان اخلاقي طور وزارت تان استعيفيٰ ڏئي رهيو آهيان. عليم خان پنهنجي استعيفيٰ پنجاب جي وڏي وزير عثمان بوزدار حوالي ڪري ڇڏي.