12 مئي سانحي جي ذميوارن خلاف ڪارروائي نه ڪرڻ سان تشدد واري ايجنڊا کي هٿي ملي: سپريم ڪورٽ

اسلام آباد(بيورو) سپريم ڪورٽ فيض آباد ڌرڻي پاڻمرادي نوٽيس ڪيس جو لکت ۾ فيصلو جاري ڪري ڇڏيو. جسٽس مشير عالم ۽ جسٽس قاضي فائز عيسيٰ تي ٻڌل ٻه رڪني بينچ 43 صفحن تي ٻڌل فيصلو جاري ڪيو جنهن جي ڪاپيسپريم ڪورٽ جي ويب سائيٽ تي موجود آهي جنهن ۾ چيو ويو آهي ته شهرين کي سياسي پارٽيون ٺاهڻ ۽ ان جو ميمبر بڻجڻ سميت هر شهري ۽ سياسي پارٽي کي اجتماع ۽ احتجاج جو حق حاصل آهي. فيصلي ۾ چيو ويو آهي ته اجتماع ۽ احتجاج پرامن ۽ قانون جي دائري ۾ هجڻ گهرجي جنهن سان ٻين شهرين جي آزاداڻي اچ وڃ متاثر نه ٿيڻ گهرجي. سپريم ڪورٽ فيصلي ۾ هدايت ڏندي ته سياسي پارٽين بابت قانون تي عمل نه ڪندڙ سياسي پارٽي خلاف اليڪشن ڪميشن ڪارروائي ڪري ۽ هر سياسي پارٽي کي پنهنجي فنڊز جي ذريعن بابت جوابدا هجڻ گهرجي. فيصلي ۾ چيو ويو آهي ته رياست کي غير جانبدار ۽ منصفاڻو هجڻ گهرجي، قانون جو عمل سڀني تي هجڻ گهرجي، چاهي اهي حڪومت ۾ هجن يا ادارن ۾، آزاداڻو ڪم ڪرڻ گهرجي. سپريم ڪورٽ پنهنجي فيصلي ۾ 12 مئي واري سانحي جو به ذڪر ڪيو ۽ چيو ته 12 مئي سانحي تي ذميوارن خلاف ڪارروائي نه ڪرڻ سان تشدد وسيلي ايجنڊا حاصل ڪرڻ جي حوصلا افزائي ٿي ۽ قتل، قتل جي قدم ۾ ملوث حڪومت ۾ شامل وڏن ماڻهن خلاف ڪارروائي نه ڪرڻ سان خراب مثال قائم ٿيو ۽ تشدد وسيلي ايجنڊا حاصل ڪرڻ جي حوصلا افزائي ٿي. فيصلي ۾ چيو ويو ته رياست کي غير جانبدار ۽ منصفاڻو هجڻ گهرجي، قانون سڀني تي لاڳو ٿيڻ گهرجي، ڀلي اهو حڪومت ۾ هجي يا ادارن ۾، حڪومت جو ڪو به ادارو يا ايجنسي پنهنجو مينڊيٽ نه اورانگهي، سڀني کي حدن ۾ رهي آزاداڻو ڪم ڪرڻ گهرجي، شهرين کي سياسي پارٽيون ٺاهڻ ۽ انهن جو ميمبر بڻجڻ سميت هر شهري ۽ سياسي پارٽيءَ کي احتجاج جو حق آهي، احتجاج پرامن ۽ قانون جي دائري ۾ هجڻ گهرجي، جنهن سان ٻين شهرين جي آزاداڻي چرپر متاثر نه ٿيڻ گهرجي، اليڪشن ڪميشن سياسي پارٽين بابت قانون تي عمل نه ڪندڙ سياسي پارٽين خلاف ڪارروائي ڪري.