اڳوڻي وزيراعظم يوسف رضا گيلاني کي پرڏيهه وڃڻ کان روڪيو ويو، پ پ جي سخت مذمت

لاهور/ ڪراچي(بيورو+چيف رپورٽر) اڳوڻي وزيراعظم يوسف رضا  گيلاني کي لاهور ايئرپورٽ تي ملڪ کان ٻاهر وڃڻ کان روڪيو ويو. رپورٽ موجب پيپلز پارٽي جو اڳواڻ ۽ اڳوڻو وزيراعظميوسف رضا گيلاني لاهور ايئرپورٽ وسيلي ٿائي ايئرلائن جي اڏام ذريعي بينڪاڪ وڃي رهيو هو ته کيس ايئرپورٽ تي ئي روڪيو ويو. ذريعن جو چوڻ آهي ته کيس اميگريشن ڪائونٽر  تي ايف آءِ اي اختيارين روڪيو آهي ڇو ته نيب ۾ سندس خلاف ڪيسن سبب يوسف رضا گيلاني جو نالو بليڪ لسٽ ۾ شامل آهي. اطلاعن موجب يوسف رضا گيلاني عالمي ڪانفرنس ۾ شرڪت لاءِ وڃي رهيو هو ۽ اڳوڻو ڊپٽي اسپيڪر قومي اسيمبلي فيصل ڪريم ڪنڊي به ساڻس گڏ هو. پرڏيهه وڃڻ کان روڪڻ تي ردعمل ڏيندي يوسف رضا گيلاني جو چوڻ هو ته مان پاڪستان ڇڏڻ جو تصور به نه ٿو ڪري سگهان، ڏيڍ مهينو اڳ ايشيا پيسفڪ ڪانفرنس ۾ شرڪت لاءِ نيپال ويس، هاڻ بينڪاڪ رستي سيئول وڃي رهيو هوس مون کي روڪي بنيادي انساني حقن کي پائمال ڪيو ويو جيتوڻيڪ سيئول ۾ ٿيندڙ ورلڊ سمٽ ۾ روانگي جي حوالي سان نيب جج کي آگاهه ڪري ڇڏيو هو. يوسف رضا گيلاني چيو ته اظهار جي آزادي کي دٻائي نئون پاڪستان تعمير نه ٿو ڪري سگهجي، پي ٽي آءِ حڪومت بنيادي انساني حقن بکيا اڊيڙڻ بند ڪري. هن چيو ته، پي ٽي آءِ حڪومت بنيادي انساني حقن  جون ڌڄيون اڏائڻ بند ڪري، جيڪڏهن هڪ اڳوڻو وزيراعظم ئي ڏاڍ جو شڪار هوندو ته عام ماڻهو کي ڪهرو تحفظ ملندو. يوسف رضا گيلاني چيو ته، پي ٽي آءِ انتقام کان پاسو ڪري، اهو عمران خان لاءِ به بهتر ٿيندو. اڳوڻي وزيراعظم چيو ته، آئون پاڪستان ڇڏڻ جو تصور به نه ٿو ڪري سگهان، آئون لاڳيتو عدالتن ۾ پيش ٿي، الزامن کي منهن ڏئي رهيو آهيان. هن چيو ته، مان بينڪاڪ کان سيول وڃي رهيس ته مون کي روڪي بنيادي انساني حقن جي ڀڃڪڙي ڪئي وئي. يوسف رضا گيلاني چيو ته، ڏيڍ مهينو اڳ مان ايشيا پيسفڪ ڪانفرنس ۾ شرڪت لاءِ نيپال ويس، پرڏيهي آفيس ۽ گهرو وزارت منهنجي پرڏيهي دورن کان آگاهه رهيا. هن چيو ته، سيول ۾ ٿيندڙ ورلڊ سمٽ ۾ روانگي بابت به نيب جج کي به آگاهه ڪري ڇڏيو هو. هوڏانهن پيپلز پارٽي جي چيئرمين بلاول ڀٽو زرداري چيو آهي ته آئين ۾ ڏنل حقن کي پائمال ڪرڻ نيازي حڪومت جو وڙ آهي. پ پ چيئرمين بلاول ڀٽو زرداري وزيراعظم يوسف رضا گيلاني کي پرڏيهه وڃڻ کان روڪڻ جي مذمت ڪندي چيو ته يوسف رضا گيلاني کي پرڏيهه سفر کان روڪڻ بنيادي حقن جي ڀڃڪڙي آهي، هو ڪوڙن ڪيسن کي منهن ڏئي رهيو آهي، سندس خلاف غير قانوني قدمن جو ازالو ڪيو وڃي. بلاول ڀٽو زرداري جو چوڻ هو ته آئين ۾ ڏنل حقن کي پائمال ڪرڻ نيازي حڪومت جو وتيرو آهي ۽ نيازي سرڪار پيپلز پارٽي جي افعال اپوزيشن کان ڊنل اهي، عمران خان ٻڌي وٺي اسان کيس پنهنجي مرضي جو نقاب لڳائڻ نه ڏينداسين ۽ جعلي مينڊيٽ واري سرڪاري جي ڪوڙن واعدن ۽ عوام دشمن پاليسين جو آپريشن ڪندا رهنداسين.